Hebreos 3 - DIOSPA QHELQACHISQ

Jesusqa Moisesmanta aswanmin

¹ Chayrayku Diospaj t'aqasqa wawqe panakuna, janaj pachapi tiyakunapaj wajyasqa kajkuna, Jesús pichus kasqanpi unanchaychej. Payqa Diospa kachan, jinataj Kuraj Kaj Sacerdote, noqanchejtaj paypi atinikunchej.

² Payqa Diospa churasqan kaspa, Diospa nisqanta tukuy imapi junt'arqa, imaynatachus Moisespis Diospa qosqan ruwanata junt'arqa, ajinata.

³ Chaywanpis Jesusqa Moisesmanta nisqa aswan jatunpaj qhawasqa kanan tiyan, imaynatachus wasichaj runaqa wasinmanta nisqa aswan jatunpaj qhawasqa, ajinata.

⁴ Tukuy wasipis runaj wasichasqanpuni. Tukuy imata ruwajtajrí Diospuni.

⁵ Moisesqa kamachi jina Diospa ayllunpi imachus ruwananta sumajta junt'arqa. Chay ruwasqantaj rejsicherqa Dios imamantachus aswan qhepaman parlanan karqa, chaykunata.

⁶ Cristorí Diospa Churin kaspa, Diospa ayllunpi imachus ruwananta sumajta junt'arqa. Noqanchejmin chay ayllun kanchej, sichus sonqonchejpi kallpachakusunchej, chantá Cristopi atinikuspa allin kajta suyakusqanchejpi sinch'ita sayasunchej chayqa.

Diosta mana wasanchanachu

⁷ Chayrayku Santo Espíritu nin: Kunan p'unchaychus parlasqanta uyariwajchej chayqa,

⁸ ama sonqoykichejta rumiyachiychejchu, imaynatachus Diospa contranpi oqharikojkuna ruwarqanku, jinataqa. Chaypacha ñawpa tataykichejkuna ch'innejta jamushaspa, noqawan churanakorqanku, pacienciay maykamachus kasqanta yachayta munaspa.

⁹ Chaypi ñawpa tataykichejkunaqa maykamachus pacienciay kasqanta yachayta munaspa, mana kasuwarqankuchu, tawa chunka wata junt'ata t'ukuna ruwasqayta rikushaspapis.

¹⁰ Chayrayku noqa chaypacha runakunapaj mayta phiñakuspa, nerqani: Paykuna sonqonkupi pantashallankupuni, manataj munasqayman jina puriyta munankuchu, nispa.

¹¹ Chayraykutaj k'araj phiñakuyniypi tiluspa, noqa nerqani: Paykuna samarinankupaj qosqay jallp'aman mana jayk'aj yaykonqankuchu, nispa.

¹² Chayrayku wawqe panakuna, sumajta qhawakuychej. Ama pipis qankunamanta mana allin sonqo, nitaj Diospi mana atinikuyta munaj sonqoyoj kachunchu, ajinamanta kawsashaj Diosmanta karunchakunanpaj.

¹³ Aswanpis, sapa p'unchay purajmanta kallpachanakuychej, tiempo kashajtillanraj. Pajtataj qankuna juchaj q'otiyasqan kaspa, sonqoykichejpi rumiyachisqa kawajchej.

¹⁴ Noqanchej Cristowan khuska chayaqeta jap'inanchejpaj churasqa kanchej, sichus Diospi atinikusqanchejpi qallariymanta tukukuykama sinch'ita sayasunchej chayqa.

¹⁵ Diospa Qhelqachisqanpi nin: Kunan p'unchaychus Diospa parlasqanta uyariwajchej chayqa, ama sonqoykichejta rumiyachiychejchu, imaynatachus Diospa contranpi oqharikojkuna ruwarqanku, jinataqa, nispa.

¹⁶ Pikunataj Diospa parlasqanta uyarispaña payta phiñacherqankuri? Israelitakuna karqanku, pikunatachus Moisés Egiptomanta orqhomusqa, chaykuna.

¹⁷ Pikunapajtaj Dios tawa chunka watata phiñasqa karqari? Payqa chay juchallikojkunapaj phiñakorqa, ayankutaj ch'innejpi wijch'usqa qhepakorqanku.

¹⁸ Pikunatataj Dios tiluspa nerqa: Qankunaqa samarinaykichejpaj qosqay jallp'aman mana yaykunkichejchu, nispari? Ajinata nerqa, pikunachus mana kasukorqankuchu, chaykunata.

¹⁹ Ajinataj karqa. Paykuna Diospa qosqan samarinaman mana yaykuyta aterqankuchu, Diospi mana atinikusqankurayku.