Hageo 1 - DIOSPA QHELQACHISQ

Templota watej sayarichinku

¹ Babiloniapi kuraj kamachej Darío iskay watataña kamachishajtin, sojta kaj killa qallariyta, Tata Diosqa sut'inchaj Hageonejta parlarqa Judapi kamachej Salatielpa churin Zorobabelman, Josadacpa churin Josueman ima. Josadacqa kuraj kaj sacerdote karqa.

² Hageo nerqa: Tukuy Atiyniyoj Tata Dios kay jinata nin: Kay runakuna nishanku Temployta watej ruwanapaj manaraj tiempochu kasqanta, nispa.

³ Chantá Tata Dios sut'inchaj Hageonejta nillarqataj:

⁴ Kunanchu tiempo kashan, sumaj ruwasqa wasipi tiyarikunaykichejpaj, Temploy thuñisqallaraj kashajtin?

⁵ Noqa Tukuy Atiyniyoj Tata Diosmin niykichej: Imaynatachus purishasqaykichejta allinta reparakuychej.

⁶ Qankuna ashkhata tarpunkichej, pisitataj oqharinkichej. Mikhunkichej, manataj sajsakunkichejchu. Yakuta ujyankichej, chaywanpis yakumanta ch'akichikullankichejpuni. P'achallikunkichej chaypis, mana chirimanta jark'asunkichejchu. Jornalpi ganakusqaykichejpis mana imapaj wakinchu, nispa.

⁷ Noqa Tukuy Atiyniyoj Tata Diosmin ujtawan niykichej: Imaynatachus purishasqaykichejta allinta reparakuychej.

⁸ Chayrayku kunan orqoman rispa, kurkukunata apamuychej Temployta watej ruwanaykichejpaj. Noqataj chaymanta mayta kusikusaj, chaypitaj jatunchasqapuni kasaj. Noqa Tata Diosmin chayta nini.

⁹ Kunankama qankuna ashkhata mask'arqankichej, pisitataj tarerqankichej. Imatachus wasiykichejpi waqaychasqaykichejta noqa ujta phukuspalla chinkarparicherqani. Imajtintaj chayta ruwarqani? Imajtinchus waseyqa thuñisqallaraj kashan, qankunataj wasiykichej sumaj ruwasqa kanallanmanta phutikunkichej. Noqa Tukuy Atiyniyoj Tata Diosmin chayta nini.

¹⁰ Chaynejta parapis mana paramunchu, chajrapis mana poqonchu.

¹¹ Noqa mana parachimunichu jallp'aman, orqokunaman, trigo chajraman, uva huertaman, olivo sach'aman, tukuy chajraman, runakunaman, uywakunaman, tukuy ima ruwasqankumanpis, nispa.

Diospa nisqanta kasukunku

¹² Chantá Salatielpa churin Zorobabel, Josadacpa churin Josué, jinallataj tukuy runapis uyarerqanku, imatachus Tata Dios sut'inchajnin Hageonejta kamachisqa, chay parlasqanta. Jinataj tukuyninku manchachikorqanku.

¹³ Chantá Tata Diospa kachan Hageo paykunaman Diospa sutinpi kay jinata parlarqa: Tata Dios nisunkichej: Noqa qankunawan kashani, nispa.

¹⁴ Ajinata Tata Dios yuyaycharqa Judá suyupi kamachej Salatielpa churin Zorobabelta, ajinallataj Josadacpa churin kuraj kaj sacerdote Josuetapis, Diospa ayllunmanta tukuy runakunatapis ima. Jinapi paykunaqa Tukuy Atiyniyoj Tata Diospa Templonta watej ruwayta qallarerqanku.

¹⁵ Babiloniapi Darío iskay watataña kamachishajtin, sojta killamanta iskay chunka tawayoj kaj p'unchaypi Templota ruwayta qallarerqanku.