Habacuc 3 - DIOSPA QHELQACHISQ

Habacuc Dioswan parlarikun

¹ Kayqa sut'inchaj Habacucpa Dioswan parlarikusqan.

² Tata Diosníy, may uyarisqa kasqaykimanta yachaspa, ruwasqaykimantapis uyarispa, tukuy sonqowan yupaychayki. Chayrayku ñawpa tiempopi imatachus ruwasqaykita, kunanpis kikillantataj ruway noqaykupis chayta rejsinaykupaj. Phiñakushaspapis, khuyakuyniykita rikuchiwayku.

³ Diosqa Temán chaynejmanta jamun. Parán orqomanta May Llimphu Kaj Dios jamushan. Jatun kayninpa lliphipiynenqa kay pachaman junt'aykun, kay pachapis payta jatunchaywan junt'a kashan.

⁴ Lliphipiynenqa k'anchay jina, makinmantataj lliuj lliuj llojsimun, pakasqa atiynintapis rikuchin.

⁵ Paypa ñawpaqenta millay wañuchej onqoykuna purinku, chay qhepantataj k'ajaj onqoypis chayamullantaj.

⁶ Pay sayarejtin, kay pacha kharkatitin. Qhawashajtillan, suyukuna chujchurinku. Ñawpa orqokuna urmaranku, unayniyoj lomakunapis pampachakunku. Diospa ñanninkunarí wiñay wiñaypaj.

⁷ Noqaqa Cusanmanta kajkunata jatun llakiypi tukukushajta rikuni, Madianpi tiyakojkunatataj manchachikuywan k'umuykachashajta.

⁸ Tata Diosníy, mayukunaj contranpichu phiñakunki? Mama qochaj contranpichu lawrarishajta phiñakushanki? Chayraykuchu caballoykikunaman lloq'aykunki, maqanakupi atipaj carretaykikunamanpis?

⁹ Flechanapaj arcoyki ñapis wakichisqaña kashan, jinataj tukuy flechaykipis oqharinapajña kashan. Yakuwan jallp'api wayq'okunata khallanki.

¹⁰ Orqokunaqa rikususpa, kharkatitinku, parapis patamanta imata jina jich'akamun. Chantá mama qochapis chhika patata oqharikuspa, qhollchoqeyasqanwan manchayta ch'ajwarin.

¹¹ Intipis, jinataj killapis pakakunankumanta mana llojsimunkuchu, flechayki, lanzaykiwan lliphipirisqanrayku.

¹² Phiñakuyniykipi tukuy kay pachantinta purinki, phiñakuspataj, suyukunatapis saruranki.

¹³ Qan aylluykita yanapaj llojsimunki, jinallataj ajllakusqayki kamachejta yanapanki. Millay runaj wasinpa qhatantapis qan phirerqanki, cimientontapis ura k'uchunkama rikhuricherqanki.

¹⁴ Kurajninkuta arcowan flechaspa wañucherqanki. Chaypacha paykuna caballonkupi lloq'asqa phinkiykorqanku, sinch'i wayra jina manchay wapuykachaspa. Ajinaqa mana jark'akuyta atejkunata pakayllamanta wañuchiyta munarqanku.

¹⁵ Caballoykikunawan mama qochanejta purinki, chay phosoqeyashaj chhika jatuchaj qochanejta.

¹⁶ Kay tukuy imata uyarispa, manchachikorqani. Simiypis kharkatiterqa. Chakiy mana sayayta aterqachu, tukuy ukhuypis llawch'iyaporqa. Chaywanpis pacienciawan suyasaj, maypachachus Dios ñak'arichiwajninchej soldadokunata ñak'arichillanqataj, chay p'unchayta.

^17-18 Chaypachamari kusiywan junt'a kasaj kacharichiwajniy Tata Diosrayku. Amapis higo sach'akuna t'ikachunkuchu, nitaj uva sach'apis poqochunchu nitaj olivokunapis, nillataj chajrapis poqochunkuchu. Tropamanta ovejakunapis tukukapuchunku, amañapis wakakuna kachunkuchu. Chay tukuywanpis Tata Diosta yupaychallasajpuni, qhespichiwajniy Diosraykutaj kusikusaj.

¹⁹ Tukuyta Kamachej Tata Diosmin kallpata qowan. Chakiymanpis kallpata qon, taruka jina usqhay usqhayta phawarinaypaj. Astawan patanta purichiwan ama pipis imananawanpaj.