Habacuc 2 - DIOSPA QHELQACHISQ

¹ Allinta qhawasaj, imaynatachus qhawaj soldado qhawan, jinata. Chantá suyasaj rikunaypaj Tata Dios imatachus ninawanta, quejakusqayman jina kutichiwaspa.

Habacucman Tata Dios kutichin

² Tata Diostaj kutichiwarqa: K'anallapi qhelqay, imatachus rikuchisqayki, chayta, jinamanta waj runakuna chayta sumajta ñawirinankupaj.

³ Mosqoypi jina rikusqaykej junt'akunan tiempo manaraj chayamunchu. Chaywanpis junt'akonqapuni. Qheparisqanta rijch'asunki chaypis pacienciawan suyarillay, junt'akunan tiempotaj chayamonqapuni.

Millay ruwajkunapaj llakiy kanqa

⁴ Kay jinatamin qhelqay: Millayta ruwajkunaqa mayta runaykachanku. Chaywanpis cheqan runakunaqa Diosta mana wasanchasqankurayku kawsanqanku.

⁵ Mayta runaykachajkunaqa may atiyniyoj kayta munanku, mana samarikuspa mask'anku astawan astawan munaspa, chay atiy tukukuyniyoj kajtinpis. Siminkuta aya p'ampanata jina kicharinku, wañuy jinataj mana sajsakuyta atinkuchu. Chayrayku waj suyukunata jap'inankupaj ujmantaj ujmantaj phinkiykunku.

⁶ Chaywanpis chay tukuy jap'isqanku suyukuna asikuspa, kay jinata takipayanqanku: Ay qanmanta, mana qanpata kajllawan qhapajyaj. Mayk'ajkamataj mañarisqa imakunata tantaspa qhapajyankiri, nispa?

⁷ Chaywanpis qonqaymanta jinalla manusojkuna chayamonqanku, ñak'arichisojkunataj rijch'arispa, q'arallata saqerpayasonqanku.

⁸ Contraykipi waj suyukuna tantaykukuspa, tukuy kapuyniykita qhechusonqanku, imaynatachus qanpis paykunamanta qhechorqanki, jinata. Chaypacha may chhika runakunata wañurachisqaykimanta pagachisonqanku, kallpaykiman atinikuspa kay suyupi, chantá llajtakunapi tiyakojkunawan imatachus ruwasqaykimanta.

⁹ Ay, imarajchus kanqa qanpaj, imaraykuchus suwasqaykiwan wasiykiman junt'acherqanki, ama ima llakiyta rikunaykipaj.

¹⁰ Jinamanta wasiykita p'enqaywan junt'acherqanki. Chay chhika suyukunata tukuchiyta munaspa, qanllatataj tukuchikorqanki.

¹¹ Kunantaj perqamanta rumikuna, wasi kurkukunapis contraykipi qhaparenqanku.

¹² Ay, imarajchus kanqa qanmanta. Llajtaykikunata jataricherqanki runakunata wañuchispa, jinataj millay ruwaykuna patapi.

¹³ Tukuy Atiyniyoj Tata Diostajrí sayk'uy sayk'uywan tukuy ruwasqaykita qhasi manakajman tukuchenqa, imaraykuchus chay tukuy ruwasqayki ninawan ruphachisqa kanqa.

¹⁴ Chaypachataj kay pachaqa Tata Diospa jatun kayninmanta yachaywan junt'a kanqa, imaynatachus mama qochaman yaku junt'aykun, jinata.

¹⁵ Ay, imarajchus kanqa qanmanta, imaraykuchus qayllaykipi kajkunata chajrusqa vinowan machaykuchinki, q'alalla kayninkuta qhawanaykirayku.

¹⁶ Kunantajrí jatunpaj qhawasqa kanayki may p'enqaypi rikhurenqa, imaraykuchus Tata Dios qosonqa uj ujyanata, chaytaj sut'iman orqhonqa q'alalla kayniykita, may uyarisqa kasqaykitaj pampapi rikhurenqa.

¹⁷ Qan imatachus Líbano orqota millayta ruwasqaykeqa pataykiman urmamonqa, mancharikunkitaj k'ita animalkunata wañuchisqaykimanta. Chay jasut'i chayamusonqa runakunata wañurachisqaykirayku, chay suyoj contranta, runakunaj contranta ima millayta ruwasqaykiraykutaj.

¹⁸ Lanti ruwasqaña kaspa, ima allinpajtaj kanman? Ima allinpajtaj kanman llullaman pusaj lantiri? Chay lantikunaqa mana parlayta atinkuchu. Chayrayku pichus chaykunata ruwaj, imaynatataj chaykunapi atinikunmanri?

¹⁹ Ay, imarajchus kanqa qanmanta, imaraykuchus k'ullumanta llajllasqa lantita ninki: Rijch'ariy, nispa. Mana parlayta atej rumitataj ninki: Sayarikuy, nispa. Chaykunaqa imamantapis willasuyta atinkumanchuri? Mana, imaraykuchus, qoriwan chayrí qolqe metalwan lluch'isqa kaspapis, mana kawsayniyojchu kanku.

²⁰ Tata Diostajrí paypaj t'aqasqa Templonpi kashan. Chayrayku kay pachapi tukuy kajkuna ñawpaqenpi ch'inlla kachunku, nispa.