Génesis 49 - DIOSPA QHELQACHISQ

Jacob manaraj wañupushaspa nisqan

¹ Chaymanta qhepaman Jacobqa churinkunata wajyachispa, nerqa: Qayllamuwaychej, noqataj nisqaykichej qhepanejman qankunawan imachus kananmanta:

² Jacobpa churinkuna, uyarinawaykichejpaj qayllamuychej, tataykichej Israelta uyariychej.

³ Rubén, qan kuraj kaj waway kanki. Qan kuraj kaj churiy kanki, kallpaypi kashaspa yumasqay. Maypaj qhawasqa kanapi, atiypipis ñawpajllapipuni karqanki.

⁴ Chaywanpis kunanqa manaña kuraj kaj jina maypaj qhawasqachu kanki, imaraykuchus qan mana sayachiy ashkha yaku rishaj jina kanki. Qanqa ujnin warmiywan puñuykorqanki, ajinamantataj puñunayta ch'ichichaspa, manakajpaj qhawawarqanki.

⁵ Simeonwan, chantá Leviwan ima wawqepura kanku, Armankoqa kallpawan mana allinta ruwanapaj kanku.

⁶ Tantakojtinku, mana paykunawan khuska kayta munanichu, nitaj sutiy p'enqayta ruwasqankupi rikhurichunchu, imajtinchus phiñasqa kashaspa, runakunata wañucherqanku. Phiñasqa kasqankuwan apachikuspataj, torokunaj ankunkuta p'iterqanku.

⁷ Millayta phiñakusqanku maldicisqa kachun, arí, maldicisqa kachun k'arajta phiñakusqanku. Noqarí Jacobpa miraynin ukhupi mirayninkuta ch'eqerachisaj, Israel suyupitaj paykunata qhallirparisaj.

⁸ Judá, wawqeykikuna mayta jatunchasonqanku. Qan awqaykikunata kunkankumanta jap'inki, wawqeykikunatajrí qanman k'umuykusonqanku.

⁹ Judaqa león uña jina. Jap'ej risqanmanta kutimuspa, payqa jatun leonpis kanman jina winkuykun, chantá phinkiykun. Pitaj payta t'ojpinmanri?

¹⁰ Judá ayllumanta kamachina varata ni pi qhechonqachu. Nillataj pipis mirayninpa makinmanta kamachina varata qhechonqachu varaj dueñon chayamunankama, pichus tukuy kay pachata kamachenqa, chay.

¹¹ Payqa burronta uva sach'aman watan, burritontataj uvaj k'ullunman. Chantá vinopi p'achanta t'ajsan, uva ch'irwasqanpitaj patanchana p'achanta t'ajsallantaj.

¹² Ñawenqa vinomantapis aswan puka, kirunpis lechemanta aswan yuraj.

¹³ Zabulón mama qocha kantunejpi tiyakonqa, maymanchus barcokuna chayamunku, chaypi. Jap'iyninpa mojonnintaj Sidonkama chayanqa.

¹⁴ Isacar sumaj kallpayoj burro jina kanchanpi winkurikuspa, samarin.

¹⁵ Samarina cheqaqa sumaj kasqanta rikorqa, jinataj sumajta poqoj jallp'a kasqantapis qhawarqa. Chayrayku wasanman q'epirichinankuta saqellarqa, wata runankutaj karqa.

¹⁶ Danqa Israelpata ujnin kaj ayllun jina ayllunpaj justiciata ruwanqa.

¹⁷ Payqa ñan patapi katari jina kanqa. Caballokunaj chakinkuta khanispa, caballopi rejta wasaman urmachenqa.

¹⁸ Tata Diosníy, suyani qan qhespichinawaykita.

¹⁹ Gadtaqa soldadokuna maqanakuspa, suwaj yaykuykonqanku. Paytajrí qhepankumanta paykunawan maqanakoj yaykonqa.

²⁰ Aserqa ashkha mikhuna patapi kanqa, kuraj kamachejkunaman sumaj mikhunata jaywanqa.

²¹ Neftaliqa taruka jina munasqanpi purej, k'achitu uña tarukitayoj jina.

²² Joseqa yaku kantupi kashaj sach'a jina. Sumajta poqon, thansantaj perqa pataman ch'iparikun.

²³ Paytaqa arcoyojkuna chejnerqanku, jinataj mana khuyakuspa, arconkuwan flecharqanku, qhatiykacharqankutaj.

²⁴ Joséj makinrí sinch'i kallpayoj kaspa, arcota sumajta jap'in Jacobpa atiyniyoj Diosninrayku, Israelta michejrayku, waqaychajninraykutaj.

²⁵ Tataykej Diosnin qanta yanapasuchun. Jinallataj Tukuy Atiyniyoj Dios saminchasuchun janajpa saminchayninkunawan, ukhu mama qochaj saminchayninwan ima. Qanmanta rikhurej warmikuna ashkha wawayoj kachunku.

²⁶ Tataykej saminchasusqanqa aswanmin jatun tataypa saminchawasqanmanta nisqaqa. Mana tukukoj orqokunakama saminchaynin kanqa, chay saminchaytaj Joséj umanpi sayachun, pichus wawqenkuna chawpimanta ajllasqa karqa, chaypata.

²⁷ Benjaminqa phiña atoj jina, imatachus jap'isqanta tutamanta mikhun, ch'isiyaykuytataj puchusqanta rak'iran, nispa.

²⁸ Chaykuna Israelpa chunka iskayniyoj ayllunkuna kanku, tatankutaj ajinata sapa ujta samincharqa.

Jacob wañupun

²⁹ Chantá Jacob nillarqataj: Wañuy patapiña kashani. Wawaykuna, qankuna Jet llajtayoj Efronpa jallp'anpi kaj chhanka jusk'upi p'ampamuwankichej, maypichus ñawpa tataykuna p'ampasqa kashanku, chaypi.

³⁰ Chay chhanka jusk'oqa Canaanpi, Macpela chaypi, Mamré chimpapitaj. Chay jallp'ata jatun tatay Abraham jitita Efronmanta rantikusqa, ayllun p'ampakunankupaj.

³¹ Chaypitaj Abrahamta, warmin Saratawan, Isaacta, warmin Rebecatawan ima p'amparqanku. Chayllapitaj noqa Leatapis p'amparqani.

³² Chay jallp'ata, jinataj chhanka jusk'uta, jatun tatay Abrahamqa Jetpa churinkunamanta rantikusqa, nispa.

³³ Chayta churinkunaman niytawantaj, Jacobqa puñunanman siriykuspa, kikinpi wañuporqa. Ajinata Jacob ñawpa tatankunawan tinkukapoj riporqa.