Génesis 44 - DIOSPA QHELQACHISQ

Joséj ujyanan vaso

¹ Chay qhepata Joseqa mayordomonta kamacherqa: Kay runakunaj costalninkuman trigota junt'aykuchiy, atisqankuta apakunankupaj. Jinataj qolqe pagasqankuta sapa ujninkoj costalninkuman churaykapullankitaj.

² Chantá qolqe metalmanta vasoyta sullk'a kajpa costalninman churaykunki, trigomanta pagasqan qolqetawan khuskata, nispa. Mayordomotaj Joséj nisqanman jina kikinta ruwarqa.

³ Chantá tutamanta inti phawarqamuyta jina, Josejpa wawqenkuna burronkuta qhatiriykukuspa, riporqanku.

⁴ Jinapis llajtamanta manaraj karuta rishajtinku, José mayordomonta yachaykucherqa: Chay runakunata qhatiykuy, taripaspataj ninki: Imaraykutaj patronniyman allin kajmanta sajra kajwan kutichinkichejri? Ima nispataj patronniypa ujyanan

⁵ chantá qhawaspa imachus kananta yachanan vasota suwankichejri? Kaytaqa mana allintachu ruwankichej, nispa.

⁶ Mayordomotaj Joséj wawqenkunata taripaytawan, Joséj nisqanman jina kikinta nerqa.

⁷ Paykunataj kuticherqanku: Wiraqochi, imaraykutaj qan kay jinata nishawaykuri? Noqaykoqa mana jayk'aj chayta ruwaykumanchu.

⁸ Yachanki jina, noqaykoqa pagasqayku qolqeta costalniykupi tarisqaykuta Canaanmantapacha kutichimpuyku. Ima nispataj patronniykej wasinmanta qorinta, qolqentapis suwaykumanri?

⁹ Sichus mayqenniykojpa makinpi vason rikhurenqa chayqa, chay wañuchisqa kachun. Noqaykutaj wiraqochiykoj wata runan kasqayku, nispa.

¹⁰ Mayordomotajrí nerqa: Qankunaj nisqaykichejman jina kachun. Chaywanpis pejpapichá chay vaso rikhurenqa, chaylla wata runamanta qhepakonqa. Wakinkunataj ripuyta atillankichej, nispa.

¹¹ Chantá sapa ujninku usqhayllata burronkuta chajnaraytawan, costalninkuta phaskaraspa, qhawaykorqanku.

¹² Mayordomotaj kuraj kajmanta qallarispa, sullk'api tukuspa, costalninkuta mask'arqa. Jinaspataj, vasotaqa Benjaminpa costalninpi tarerqa.

¹³ Tarisqanta rikuspa, Benjaminpa wawqekuna llakikuspa, p'achankuta llik'irakorqanku. Chantá sapa ujninku burronkuman costalninkuta chajnaykuytawan, llajtaman kutirerqanku.

¹⁴ José wasillanpiraj kashajtin, Judawan, chantá wawqenkunawan ima chayaspa, pampakama k'umuykorqanku.

¹⁵ Josetaj paykunata nerqa: Imatataj kayta ruwawankichejri? Manachu yachankichej noqa watuyta yachaj kasqayta? nispa.

¹⁶ Chantá Judá kuticherqa: Wiraqochíy, imatataj niykumanri? Mana suwachu kasqaykuta rikuchinaykupaj, imatataj ruwayta atiykumanri? Diosqa unay mana allinta ruwasqaykuta kutichipushawayku. Makiykipi kashayku. Pejpa costalninpichus vasoyki rikhurerqa, chaywan khuska wata runayki kasqayku, nispa.

¹⁷ Chantá José nerqa: Mana ni imarayku chaytaqa ruwaymanchu. Pichus vasota apashajlla wata runay kanqa. Qankunarí ama imamantapis llakikuspa, tataykichejpa wasinman kutipullaychej. Manataj pipis ima nisonqachejchu, nispa.

¹⁸ Jinapi Judá Joseman qayllaykuspa, nillarqataj: Wiraqochíy, ama jina kaspa, mana pejpa uyarinanta nisusqayta uyaririway. Ama ari noqapaj phiñakuychu. Qanqa kikin faraonpis kawaj jina kanki.

¹⁹ Qan tapuwarqayku: Tataykichej, wawqeykichejpis tiyanrajchu? nispa.

²⁰ Noqaykutaj willarqayku tatayku allin machituña kasqanta, jinallataj wawqeykupis waynallaraj kasqanta. Paytaqa tatayku machuyayninpi rejserqa. Chantá nillarqaykutaj tataykoqa sullk'aykuta maytapuni munakusqanta, imaraykuchus warmin Raquelpi rejsisqan wawankuna iskaylla karqanku. Kuraj kaj wañunña, sullk'a kajllaña kawsashan, nispa.

²¹ Jinallataj qan niwarqayku sullk'aykuta pusamunaykuta, qan rejsiyta munasqaykirayku.

²² Noqaykutaj qanta nerqayku waynaqa tataykuta mana saqerpayayta atisqanta. Sapantachus saqenman chayqa, tatayku wañupunman, nispa.

²³ Chantá qan niwarqayku: Sullk'aykichejta manachus pusamunkichej chayqa, ama jamuwankichejchu, nispa.

²⁴ Noqaykutaj kaymanta kutiytawan, qan imatachus niwasqaykuta, tataykuman willarqayku.

²⁵ Jinapi aswan qhepaman tatayku niwarqayku: Trigota rantej ujtawan kutiychej, nispa.

²⁶ Noqaykutajrí nerqayku: Noqayku manapuni risqaykuchu, manachus sullk'aykuta pusasqayku chayqa. Sichus Benjamín mana noqaykuwan renqachu chayqa, Egiptota kamachej mana jap'iwasqaykuchu, nispa.

²⁷ Chantá tatayku kutichiwarqayku: Qankuna yachankichej Raquel warmiypi iskay wawallata rejsisqayta.

²⁸ Ujnenqa ripuspa chinkan, chaymantapachataj manaña payta rikunichu. Yuyani uj millay animal mithaspa, wañuchisqanta.

²⁹ Sullk'a wawaytawan pusajtiykichej, sichus imanakonqa chayqa, machu kayniypi llakiywan wañunaypaj qankuna juchayoj kankichej, nispa.

³⁰ Ajinaqa, sichus tataypaman kutipusaj, waynataj mana noqawan kutenqachu chayqa, wawanta mana rikuspa tatay wañonqa. Tatayku wawanta manchaytapuni q'ayachakusqanrayku manapuni paymanta kacharikuyta munanchu.

³¹ Mana payta rikuspa, llakiymanta wañonqa. Noqaykutaj juchayoj kasqayku, tatayku machuyayninpi llakiywan wañunanpaj.

³² Noqaqa tatayta nerqani kay waynamanta cuentayoj kanayta, chantá nillarqanitaj: Sichus noqa mana Benjaminta kutichimpusqayki chayqa, noqa wiñaypaj juchayoj kasaj, nispa.

³³ Chayrayku wiraqochíy, kay waynaj cuentanmanta noqa wata runaykimanta qhepakusaj. Paytaj wawqenkunawan llajtaykuman kutipuchun.

³⁴ Imaynatataj noqa mana sullk'ayta pusakapuspa tatayman kutiymanri? Mana atiymanchu. Mana tatayta llakiywan ñak'arejta rikuyta munanichu, nispa. Ajinata Judá Joseta nerqa.