Génesis 43 - DIOSPA QHELQACHISQ

Benjaminta Egiptoman pusanku

¹ Chaywanpis Canaanpi yarqhayqa mana awantay atina jinaña karqa.

² Chayrayku Jacobpa churinkuna Egiptomanta trigota apasqanku tukukapojtinña, Jacob paykunata nerqa: Ujtawan Egiptoman rispa, mikhunanchejpaj trigota rantimullaychejtaj ari, nispa.

³ Judatajrí nerqa: Ña niykuña, chay wiraqocheqa sut'ita niwasqaykuta. Pay niwarqayku: Sichus sullk'aykichejta mana pusamuwankichejchu chayqa, ama kutimuwankichejchu, nispa.

⁴ Sichus Benjaminta pusajta saqewasqayku chayqa, rispa, trigota rantimusqayku.

⁵ Manapunichus munanki chayqa, mana riykumanchu, imaraykuchus chay runa sut'ita niwarqayku: Manachus sullk'aykichejta pusamuwankichej chayqa, ama kutimuwankichejchu, nispa.

⁶ Chantá Jacob, pichus Israel sutiyojllataj karqa, chay nerqa: Imaraykutaj kay jinata llakichiwankichejri? Imapajtaj chay runaman sullk'aykichej kasqantaraj willarqankichejri? nispa.

⁷ Paykunataj kuticherqanku: Chay runa noqaykumanta chantá ayllunchejmanta anchata tapuwarqayku: Tataykichej kawsashanrajchu? Wawqeykichej ujwanpis kanrajchu? nispa. Noqaykurí tapuwasqaykuman jina kuticherqayku ari. Imaynatataj yachaykuman karqa ninawaykuta: Sullk'aykichejta pusamuychej, nispari?

⁸ Chantá Judañataj tatan Israelta nerqa: Noqa Benjaminmanta cuentayoj kasaj, kachallay ari. Kunanpacha mikhunata rantej puririsqayku, ama qan, ni noqayku, nitaj wawaykukunapis yarqhaymanta wañunanchejpaj.

⁹ Noqa paymanta cuentallikusaj. Imapis kajtenqa, noqamanta cuentata mañawanki. Manachus pachanta chayachimpusqayki chayqa, noqata wiñaypaj juchachawanki.

¹⁰ Sichus qan mana jinata jark'akuwaj karqa chayqa, rispa jamuspa, iskay kutitaña chayamuykuman karqa, nispa.

¹¹ Chaymanta tatanku Jacob nerqa: Imanasuntaj. Jina kanan kajtenqa, kayta ruwaychej: Kaypi sumajnin kajmanta costalman churaspa, chay runaman jaywarinaykichejpaj apaychej: Uj chhika balsamota, uj chhika abeja misk'ita, sumaj q'apashaj jawinata, mirrata, nuezta, chantá almendrata ima.

¹² Qolqetapis uj jinatawan apaspa, chantá costalniykichejpi tarisqaykichej chay qolqeta ima, pay kikinmanpuni jaywankichej. Ichapis pantaspa churaykunkuman karqa.

¹³ Benjamintapis pusallaychejtaj. Chantá usqhayta rispa, chay runawan tinkumuychej.

¹⁴ Tukuy Atiyniyoj Diostaj chay runaj sonqonta llamp'uyachichun, qankunamanta khuyarikunanpaj. Ajinamanta qhepakoj wawqeykichejta, chantá Benjaminta ima kacharimponqa. Noqarí, sichus mana wawayoj qhepakunay kashan chayqa, jina mana wawayoj qhepakusaj, nispa.

¹⁵ Chantá Jacobpa churinkuna waqeta apariykukuspa, qolqetapis uj jinatawan aparqanku. Benjamintawan pusariykukuspataj, Egiptoman purirerqanku. Chayman chayaspataj, Josejpaman rerqanku.

¹⁶ Joserí sullk'an Benjamín paykunawan kashasqanta rikuspa, mayordomonta nerqa: Kay runakunata wasiyman pusay, chantá uj wakata ñak'aspa wayk'uchiy, imaraykuchus paykunaqa kunan chawpi p'unchayta noqawan mikhonqanku, nispa.

¹⁷ Mayordomoqa Joséj nisqanman jina kikinta ruwarqa, jinataj Joséj wawqenkunata Josejpa wasinman pusarqa.

¹⁸ Mayordomo paykunata Joséj wasinman pusashajtin, paykuna mancharikorqanku, ninakorqankutaj: Kay runaqa kutichipuwasqanchej qolqenmanta wasinman pusashawanchej. Kunantaj wata runanta jina jap'iwasunchej, burronchejkunatapis jap'ikapullanqataj, nispa.

¹⁹ Jinapi wasi punkuman qayllaykushaspa, Joséj mayordomonta parlapayarqanku:

²⁰ Wiraqochíy, unayña trigota rantikoj jamorqayku.

²¹ Kutipushaspataj, tambopi uj ch'isita puñorqayku. Chantá costalniykuta qhawaykuspa, sapa uj trigomanta pagasqayku qolqeta tarikaporqayku. Chayta kunan apamporqayku.

²² Kunan trigota rantikunaykupajqa waj qolqetapis apamullaykutaj. Noqayku mana yachaykuchu pichus chay qolqeta costalniykuman churaykusqanta, nispa.

²³ Mayordomotajrí kuticherqa: Ama manchachikuychejchu. Diosniykichej, tataykichejpa Diosninchari chay qolqeta costalniykichejman churaykorqa. Noqarí pagasqaykichej qolqetaqa jap'erqani, nispa. Chayta niytawantaj, mayordomoqa Simeonta carcelmanta orqhomuspa, paykunaman pusamorqa.

²⁴ Jinaspataj, tukuyninkuta Josejpa wasinman pusaykorqa. Chantá chakinkuta mayllakunankupaj yakuta jaywarqa, burronkukunamanpis qarallarqataj.

²⁵ Josejpa wawqenkunataj waqeta apasqankuta wakicherqanku, chawpi p'unchayta José chayamojtin, jaywanankupaj, imaraykuchus yacharqanku chaypi paykunawan mikhunanta.

²⁶ José chayamojtin, paykuna pampakama k'umuykuspa, napaykorqanku, chantá waqe apasqankuta jaywarqanku.

²⁷ Josetaj paykunata taporqa: Imaynataj kashankichej, walejllachu? nispa. Chaymanta tapullarqataj: Machituña niwarqankichej chay tataykichejrí, imaynataj kashanri? Kawsakushanrajchu? nispa.

²⁸ Paykunataj k'umuykuspa, nerqanku: Tataykoqa walejlla kakushan. Kawsakushanraj, nispa.

²⁹ Chantá José muyuyninta qhawarispa, Benjaminta rikorqa, piwanchus uj mamayoj, uj tatayojlla karqanku, chayta. Chantá nerqa: Kaychu sullk'aykichejqa, pimantachus willawarqankichej, chay? Wawáy, Tata Dios yanapasuchun, nispa.

³⁰ José sullk'anta rikukapuspa, yaqhapuni waqaywan atipachikorqa, imaraykuchus kusiymanta sonqon wawayarqa. Chayrayku usqhayllata puñunan cuartoman yaykuspa, waqarikorqa.

³¹ Sonqon tiyaykojtintaj, uyanta mayllarqokuytawan, llojsimorqa. Chantá kamachinkunata nerqa: Mikhunata qarallaychejña, nispa.

³² Josepaj waj mesapi mikhunata churarqanku, wawqenkunapajtaj waj mesapi. Egipto llajtayojkunapajrí mikhunata waj mesaman churapullarqankutaj, imaraykuchus paykunaqa hebreokunawan khuska mana mikhuyta munajchu kanku. Egipto llajtayojkunapaj hebreokunawan khuska mikhoyqa mana allinpajchu qhawasqa karqa.

³³ Josetajrí wawqenkunata kurajmanta sullk'aman jina tiyaracherqa. Paykunataj ujkuna ujkuna qhawanakuspa, mancharisqa t'ukusharqanku.

³⁴ Josetaj mikhunata jaywasqankumanta tukuyninkuman jaywacherqa. Benjaminmanrí uj phishqa jinatawan astawan yapasqata jaywarqa. Jinata José wawqenkunawan khuska manchay kusisqa mikhorqa, ujyarqa ima.