Génesis 38 - DIOSPA QHELQACHISQ

Judawan Tamarwan

¹ Chaypacha Judá wawqenkunamanta karunchakuspa, Jirá sutiyojpa wasinman tiyakoj rerqa. Payqa Adulán llajtayoj karqa.

² Chaypi Judaqa Canaán llajtayoj Súa sutiyojpa ususinwan rejsinakorqa. Chantá chay sipaswan casarakuspa, paywan puñuykorqa.

³ Chay warmitaj Judapaj onqoj rikhurispa, wawayoj karqa “Er” sutiwantaj suticharqa.

⁴ Chaymanta Judáj warmin ujtawan wijsallikuspa, qhari wawallatataj paqarichikorqa, chay wawatataj “Onán” sutiwan suticharqa.

⁵ Qhepanejman Judáj warmenqa ujtawan wawayojllataj karqa, chaytataj “Sela”, nispa suticharqa. Sela paqarisharqa chaypacha, Judaqa Quezib nisqa cheqapi tiyakusharqa.

⁶ Aswan qhepanejman Judaqa kuraj kaj churin Erta Tamar sutiyoj warmiwan casaracherqa.

⁷ Chaywanpis Judáj kuraj kaj churin Er mana Tata Diospa munasqanman jinachu purisqanrayku Tata Dios payta wañucherqa.

⁸ Chaymantataj Judaqa Onanta nerqa: Wañoj wawqeykej warminwan qanñataj casaray, paywan cuñadon jina imachus ruwanaykita junt'anaykipaj. Ajinamanta wawqeykej sutin mana chinkanqachu, nispa.

⁹ Onán yacharqa wañoj wawqenpa warminpi wawata rejsisqan mana paypa sutintachu apananta. Chayrayku chay warmiwan sapa kuti puñuykuspa, mujunta pampallaman surucherqa, wawqenpa miraynin ama paynejta kananpaj.

¹⁰ Chay jinata Onanpa ruwasqantarí Tata Dios mana allinpajchu qhawarqa. Chayrayku paytapis Tata Dios wañuchillarqataj.

¹¹ Chantá Judaqa ñojch'an Tamarta nerqa: Tataykej wasinman kutispa, warmisapa jina kakuy, sullk'a churiy Sela jatunyanankama, nispa. Chayta nerqa, imaraykuchus yuyarqa Sela Tamarwan casarajtin, Dios paytapis wañuchinanta. Jinamanta Tamarqa tatanpa wasinman tiyakoj riporqa.

¹² Chaymanta unayman jina Judajpa warmin Suáj wawan wañuporqa. Qhepamantaj Judaqa llakiy p'achanta lluch'ukaporqa. Chantá Timnat llajtaman rerqa, maypichus ovejankunaj millmanta ruthusharqanku, chayman. Adulán llajtayoj kawsaqen Jirapis paywan rillarqataj.

¹³ Tamartaj suegron Timnatman ovejaj millmata ruthuchej rishasqanta yacharqa.

¹⁴ Jinapi Tamarqa luto p'achanta lluch'ukuspa, umanta suk'umpaykukorqa, ama pipis payta rejsinanpaj. Chantá Enayin llajtaman yaykuna punkupi tiyaykukorqa. Chayqa Timnatman rej ñanpi karqa. Tamar yacharqa Selaqa waynaña kasqanta, yachallarqataj Judaqa nisqanman jina, mana sullk'a churinwan payta casarachisqanta.

¹⁵ Judá chay warmita rikuspa, yuyarqa phisu warmi kasqanta, imaraykuchus uyan qhatasqa karqa.

¹⁶ Ñanmanta ithirispataj, chay warmita nerqa: Qanwan puñuyta munayman, nispa. Ajinata nerqa mana yachaspa ñojch'an kasqanta. Chay warmitaj nerqa: Imatataj qowanki kunan qanwan puñuykojtiyri? nispa.

¹⁷ Judataj nerqa: Tropaymanta uj maltun chivota apachimusqayki, nispa. Warmitaj nerqa: Nisqaykita apachimunaykikama, prendata jina imallatapis saqeway, nispa.

¹⁸ Judataj taporqa: Imatataj prendata jina qoykimanri? nispa. Warmitaj nerqa: Kunkaykipi warkhukushanki, chay selloykita qoway. Chantá jap'ishanki, chay varatawan qoway, nispa. Judataj warmej nisqanta qorqa, chantá paywan puñuykorqa. Jinamanta Tamarqa Judapaj onqoj rikhurerqa.

¹⁹ Chantá wasinman kutipuspa, Tamarqa suk'umpanta lluch'ukuytawan, lutokuna p'achanta churaykakaporqa.

²⁰ Qhepanejman Judá uj maltun chivota Adulanmanta kaj kawsaqenwan apacherqa, chay warmi prendata qochikusqanta qopunanpaj. Kawsaqenrí mana chay warmita tarerqachu.

²¹ Jinataj chaypi tiyakojkunata taporqa: Manachu rikorqankichej Enayinmanta phisu warmi ñan patapi tiyaj, chayta? nispa. Paykunatajrí kuticherqanku: Mana kaypi ima phisu warmitapis rikuykuchu, nispa.

²² Chaymanta pay kutipuspa, Judaman willamorqa: Mana chay warmita tarinichu. Llajtayojkunapis niwanku chaynejpi mana ima phisu warmipis kasqanta, nispa.

²³ Chantá Judá nerqa: Jina jap'ikuchun prenda qosqayta, ama pipis noqanchejmanta alqochakunawanchejpaj. Noqaqa nisqayman jina uj chivota apacherqayki, qantaj mana chay warmita tarimunkichu, nispa.

²⁴ Kinsa killaman jina Judaman willaj jamorqanku: Tamar ñojch'aykeqa purisqanpi piwanchá puñuykorqa. Chayrayku kunanqa wijsayoj kashan, nispa. Judataj nerqa: Jawaman orqhospa, ruphaykuchiychej, nispa.

²⁵ Jawaman orqhoshajtinkutajrí, Tamarqa suegronman willacherqa: Pichus kay prendata saqewajpaj onqoj kashani. Allinta qhawaspa, kay sello, kay sello apaykachana watu, kay vara ima pejpatachus kasqanta rejsikapuchun, nispa.

²⁶ Judataj chaykunata qhawaspa, paypata kasqanta rejsikaporqa, nerqataj: Payqa maychus kajta ruwan, noqatajrí mana, imaraykuchus noqaqa mana payta churiy Selawan casaracherqanichu, nispa. Jinamanta Judá manaña jayk'ajpis Tamarwan ujtawan puñuykorqachu.

²⁷ Tamar onqokunan chayamojtin, iskay wawakunata paqarichikorqa.

²⁸ Paqarishaspa, ujnin kaj ñawpajta makinta jaywarqamorqa. Parterataj uj puka q'aytuwan makinman wataykorqa: Kay kaj ñawpajta llojsimun, nispa.

²⁹ Ñawpajta makinta jaywamoj wawarí chaypacha makinta aysaykakaporqa. Jinamanta wawqenraj ñawpajta paqarerqa. Chayrayku parteraqa chay wawata suticharqa “Fares”, nispa. Nerqataj: Ñawpajta llojsimunaykipaj imatataj ruwarqankiri? nispa.

³⁰ Chaymanta ujñataj paqarerqa, makinpi puka q'aytuyoj kaj, paytataj suticharqa: “Zeraj”, nispa.