Génesis 36 - DIOSPA QHELQACHISQ

Esaujpa miraynin

¹ Kaykuna Esaúj miraynin kanku. Esaujta ujnin sutin Edom karqa.

² Esauqa Canaán llajtayoj warmikunawan casararqa: Jitita Elonpa ususin Adawan, chantá Anáj ususin Aholibamawan ima. Aholibamaqa heveo Sibonpa allchhin karqa.

³ Casarakullarqataj Ismaelpa ususin Basematwan. Payqa Nebayotpata panan karqa.

⁴ Esaú warmin Adapi rejsisqan churenqa Elifaz karqa, warmin Basematwan rejsisqan churintaj Reuel karqa.

⁵ Warmin Aholibamapitaj karqanku Jeús, Jalán, Coré ima. Chaykuna Canaanpi tiyakushajtin Esaujpata churinkuna karqanku.

⁶ Esauqa warminkunata, churinkunata, ususinkunata, pikunachus paywan tiyakorqanku, chaykunatawan pusariykukuspa, wawqen Jacobmanta karunchakunanpaj waj cheqaman riporqa. Jinallataj tukuy uywankunata, Canaanpi tiyakushaspa imatachus tarisqanta, tukuyninta apakaporqa.

⁷ Chayta ruwarqa, imaraykuchus iskayninku ashkha uywayoj karqanku, manataj khuska tiyakuyta aterqankuchu. Tiyakusharqanku, chay jallp'aqa uywankuta michinankupaj ancha pisi karqa.

⁸ Chayrayku Esauqa, pichus Edom nisqallataj karqa, pay Seir sutiyoj orqonejman tiyakoj riporqa.

⁹ Esaujpata miraynin kaykuna kanku. Payqa edomitakunaj ñawpa tatanku karqa. Paykunataj Seir sutiyoj orqonejpi tiyakorqanku.

¹⁰ Kaykuna kanku Esaujpata churinkunaj sutinku: Ada warminpi churin Elifaz karqa, Basemat warminpitaj churin Reuel karqa.

¹¹ Elifazpa churinkunataj karqanku Temán, Omar, Sefó, Gatán, Cenaz ima.

¹² Elifazpa ujnin warminpi karqa Timna. Payqa Elifazpaj uj qhari wawata rejserqa, sutintaj Amalec karqa. Paykuna Esaujpa warmin Adaj allchhinkuna karqanku.

¹³ Reuelpa churinkunarí karqanku: Najat, Zeraj, Samá, Miza ima. Chaykuna Esaujpata ujnin kaj warmin Basematpa churinkuna karqanku.

¹⁴ Esaujpata ujnin kaj warmin Aholibamaj wawankuna karqanku: Jeús, Jalán, Coré ima. Aholibamaqa Anáj ususin, Sibonpa allchhin karqa.

¹⁵ Esaujpa mirayninmanta kurajkuna kaykuna karqanku. Esaujpa kuraj kaj churin Elifazpa mirayninmanta: Temán, Omar, Sefó, Cenaz,

¹⁶ Coré, Gatán, Amalec ima karqanku. Chaykuna Edom jap'iypi Elifazpa mirayninmanta kurajkuna karqanku. Tukuy paykuna Adaj churinkuna karqanku.

¹⁷ Esaujpa churin Reuelpa churinkunamanta kurajkuna karqanku: Najat, Zeraj, Samá, Miza ima. Kaykuna Edom jap'iypi, Reuelpa mirayninmanta kurajkuna karqanku. Paykunaqa Esaujpa warmin Basematpa churinkuna karqanku.

¹⁸ Anáj ususin, Esaujpata ujnin kaj warmin Aholibamaj churinkunamanta kurajkuna karqanku: Jeús, Jalán, Coré ima.

¹⁹ Chay tukuyninku Edom nisqa Esaumanta mirajkuna karqanku, sapa ayllunkupi kurajkuna.

Seirpa miraynin

²⁰ Chay cheqapi tiyakoj horeo Seirpa churinkuna kaykuna karqanku: Lotán, Sobal, Sibón, Aná,

²¹ Disón, Eser, Disán ima. Paykuna Edom jap'iypi horeo Seirpa mirayninmanta kurajkuna karqanku.

²² Lotanpa churinkunataj karqanku Joriwan, Hemanwan ima. Lotanpa panantaj Timna karqa.

²³ Sobalpa churinkuna karqanku: Alván, Manajat, Ebal, Sefo, Onam ima.

²⁴ Sibonpa churinkuna karqanku: Ayawan, chantá Anawan ima. Anaqa tatan Sibonpa burronkunata ch'innejpi michishaspa, yaku juturikunata tarerqa.

²⁵ Anajta uj qhari wawan Disón sutiyoj karqa, ususintaj Aholibama sutiyoj karqa.

²⁶ Disonpa churinkuna karqanku: Hemdán, Esbán, Itrán, Querán ima.

²⁷ Eserpa churinkunataj karqanku: Bilán, Zaván, Achán ima.

²⁸ Disanpa churinkuna karqanku Uzwan, Aranwan ima.

²⁹ Hor ayllukunapi kurajkuna karqanku: Lotán, Sobal, Sibón, Aná,

³⁰ Disón, Eser, chantá Disán ima. Paykuna Seir jap'iypi, horeokunamanta sapa ayllupi kurajkuna karqanku.

Edom suyupi kamachejkuna

³¹ Edom suyupi kuraj kamachejkuna kaykuna karqanku. Paykunaqa manaraj israelitakuna kuraj kamachejniyoj kashajtinku kamacherqanku.

³² Beorpa churin Belaqa Edompi kuraj kamachej karqa, llajtantaj Dinaba karqa.

³³ Bela wañupojtintaj, Zerajpa churin Jobab kamacherqa. Payqa Bosra llajtamanta karqa.

³⁴ Jobab wañupojtintaj, Temanmanta Jusán kamacherqa.

³⁵ Jusán wañupojtintaj, Avit llajtamanta Bedadpa churin Hadad kamacherqa. Bedadqa Moabpi Madián llajtayojkunata atiparqa.

³⁶ Hadad wañupojtintaj, Masreca llajtamanta Samla kamacherqa.

³⁷ Samla wañupojtintaj, Éufrates mayu kantupi Rejobot llajtamanta Saúl kamacherqa.

³⁸ Saúl wañupojtintaj, Acborpa churin Baal Janán kamacherqa.

³⁹ Acborpa churin Baal Janán wañupojtintaj, Pau llajtamanta Hadar kamacherqa. Hadarpa warmintaj Mehitabel karqa, Matredpa churin Mezabpa allchhin.

⁴⁰ Kaykuna Esaúj mirayninmanta kurajkuna karqanku, sapa ayllunkupi, sapa cheqapi: Timna, Alva, Jetet,

⁴¹ Aholibama, Elá, Pinón,

⁴² Cenaz, Temán, Mibsar,

⁴³ Magdiel, Iram ima. Paykuna tiyakunankupaj jap'ikusqanku jallp'api kuraj kamachejkuna karqanku. Esaujpata ujnin sutin Edom karqa. Paymin edomitakunaj tatanku karqa.