Gálatas 5 - DIOSPA QHELQACHISQ

Jesucristonejta kacharichisqa kanchej

¹ Cristo cheqatapuni kacharichiwarqanchej. Chayrayku kacharisqa kaypi thuruta sayaychej, amataj ujtawan Moisespa kamachisqankunaj wata runan ruwakuychejchu.

² Uyariwaychej: Noqa Pablo niykichej: Sichus qankuna circuncidachikunkichej chayqa, Cristoj wañusqan qankunapaj yanqhalla kanqa.

³ Ujtawan niykichej: Pichus circuncidachikojqa Moisespa tukuy kamachisqanta junt'ananpuni tiyan.

⁴ Sichus qankuna kamachisqakunata junt'aspa cheqan runapaj qhawasqa kayta munankichej chayqa, Cristomanta t'aqakunkichej, Diospa qhasilla k'acha yanapaynintataj qhesachashankichej.

⁵ Noqanchejrí Santo Espirituman jina kawsajkuna imata jina suyashanchej cheqan runapaj qhawasqa kayta Cristopi atinikusqanchejrayku.

⁶ Cristo Jesuspi atinikusqanchejrayku circuncidasqa kay chayrí mana circuncidasqa kaypis mana ni imapi yanapawanchejchu. Aswanqa Jesucristopi atinikuylla valen, chaytaj wajkunata munakuyta yanapawanchej.

⁷ Qankunaqa walejllata ñawpajman risharqankichej. Pitaj jark'arqasunkichej cheqa kajta mana kasunaykichejpajri?

⁸ Chay jina yachacheyqa mana wajyasojniykichej Diosmantachu.

⁹ Runaqa nin: Uj pisi levaduralla tukuynin masata poqochin, nispa.

¹⁰ Noqaqa Tukuyta Kamachej Jesuspi atinikuni qankunata waqaychananta mana cheqan yachachiykunata mana jap'ikunaykichejpaj. Pichus umaykichejta muyuchej runatarí Dios ruwasqanman jina juzganqa, pipis kachun.

¹¹ Wawqe panakuna, sichus noqa yachachiymanraj circuncidachikunapuni kasqanta chayqa, imaraykutaj judiokuna chejnispa qhatiykachallawankupuniri? Chaytachus yachachiyman chayqa, Cristo cruzpi wañusqanmanta parlasqayqa runata mana phiñachinmanchu.

¹² Walej kanman, pikunachus circuncidakunaykichej tiyan nispa pantachishasunkichej, chaykuna ujkama khuchuspa orqhokunanku.

¹³ Qankuna wawqe panakuna, Moisespa kamachisqanta junt'anamanta kacharichisqa jina kawsanaykichejpaj wajyasqa kankichej. Chaywanpis kacharichisqa kasqaykichejqa ama juchallinaman aysaj sonqoykichejpa munasqanta ruwanaykichejpajchu kachun. Manachayqa kacharichisqa kasqaykichejrayku munakuspa ujkuna ujkuna yanapanakuychej.

¹⁴ Ajinata ruwaychej, imaraykuchus Moisespa tukuy kamachisqanta junt'anchej kay kamachisqata kasuspa: Runa masiykita qan kikiykita jina munakunki, nispa kamachisqanta.

¹⁵ Sichus qankunapura khaninakuspa mikhunakuwajchej chayrí, pajtataj qankunapura tukuchinakuwajchej.

Diospa Espiritunta kasuspa purina

¹⁶ Niykichej ari: Diospa Espiritunta kasuspa kawsaychej. Ajinata ruwankichej chayqa, juchallinaman aysaj sonqoykichejpa munasqanta kasunawan mana apachikunkichejchu.

¹⁷ Juchallinaman aysaj sonqoj millayta ruwayta munasqanqa Santo Espíritoj contranpi. Santo Espiritupis juchallinaman aysaj sonqoj munasqanpa contrallanpitaj. Ajinaqa paykunapura churanakunku. Chayrayku qankuna mana imatapis munasqaykichejta ruwayta atillankichejchu.

¹⁸ Sichus Santo Espíritu pusaykachasunkichej chayrí, manaña Moisespa kamachisqankunata junt'anaykichejchu tiyan.

¹⁹ Juchallinaman aysaj sonqoj ruwayta munasqanqa kaykuna kanku: Khuchichakuy, ch'ichi kawsay, millay puriy, khuchiriyopi puriyta munapayay,

²⁰ lantita yupaychay, layqa kay, chejninakuy, maqanakuy, tumpanakuy, phiñanakuy, churanakuy, phiñanakuspa t'aqanakuy, mana cheqan yachachiykunata kasuy,

²¹ envidianakuy, machakuykuna, raymita ruwaspa millay kajta ruway, chantá waj jina mana allin kajta ruway ima. Imaynatachus ñawpajta nerqaykichejña, kunan ujtawan nillaykichejtaj: Chaykunata ruwajkunaqa Diospa kamachiyninman mana yaykonqankuchu, nispa.

²² Cristota qhatej runapi Santo Espíritoj ruwasqanrí kaykuna kanku: Munakuyniyoj kay, kusikuyniyoj kay, sonqo tiyaykusqa kay, pacienciayoj kay, khuyakuyniyoj kay, k'acha kay, nisqanta junt'aj kay,

²³ llamp'u sonqo kay, sonqonpa munasqanwan mana atipachikoj kay ima. Ajinata ruwaspa purejkunata mana pipis kamachisqakunata p'akishasqanmanta juchachayta atenqachu.

²⁴ Cristojta kajkunaqa juchallinaman aysaj sonqonkuta chakatanku, millay ruwayta yachasqa kaynintawan khuskata.

²⁵ Noqanchej Santo Espíritoj kawsachisqan kasqanchejrayku, Santo Espíritu pusaykachanawanchejta saqena.

²⁶ Ama runaykachanachu, nitaj ujkuna ujkuna phiñanakunapaj jina imatapis ruwanachu, nillataj envidiawan qhawanakunachu.