Ezequiel 9 - DIOSPA QHELQACHISQ

Ezequielqa Jerusalén jasut'isqa kananta sut'inchan

¹ Chaymanta Tata Dios sinch'ita qhaparispa, kay jinata niwarqa: Ñak'arichejkuna chayamunkuña llajtata jasut'inankupaj, sapa uj thuñinapaj armanku oqharisqa, nispa.

² Chantá rikorqani sojta runakunata wichaynejman qhawaj punkunta yaykumushajta, sapa ujninkutaj armayoj karqanku. Paykunawan khuska linomanta ruwasqa p'achayoj runapis jamushallarqataj. Payqa chumpinpi qhelqanapaj imakuna aparisqa kasharqa. Chantá yaykumuytawan, paykuna broncemanta ruwasqa altar qayllapi sayarqanku.

³ Chantá Israelpa Diosninpa jatun kayninpa lliphipiynin querubinkunaj patankupi kasharqa, chaymanta pataman oqharikuspa, Diospa Templon punkunejpi sayarqa. Jinapi Tata Diosqa linomanta p'achayoj runata wajyarqa, chumpinpi qhelqanapaj imakunayoj kasharqa, chayta.

⁴ Paymantaj nerqa: Jerusalén llajtaj ukhunta purispa, mask'ay, pikunachus tukuy ima millay ruwakusqanmanta llakikuspa waqashanku, chay runakunata. Tarispataj, uj señalta sapa ujpa mat'inkuman churaykuy, nispa.

⁵ Jinallataj waj runakunaman Tata Diosta nejta uyarillarqanitaj: Qankuna paypa qhepanta llajtaman riychej. Jinapi Diospa Templonmanta qallarispa, ni pita khuyaspa wañurachiychej:

⁶ Machu runakunata, waynakunata, sipaskunata, wawakunata, warmikunata ima. Tukuyninkuta wañurachiychej. Pikunachus señalniyoj kajkunamanrí ama qayllaykullankichejpischu, nispa. Chantá chay runakunaqa, pikunachus Diospa Templonpa punkunpi kasharqanku, chay kurajkunamanta qallarispa, runakunata wañurachiyta qallarerqanku.

⁷ Jinapitaj Tata Diosqa wañuchejkunata nerqa: Tukuy Templota ch'ichichamuychej, pationman runa ayakunawan junt'arachispa, nispa. Chantá paykuna llojsispa, llajtapi kaj runakunata wañurachiyta qallarerqanku.

⁸ Chay jinata runakunata wañurachishajtinku, noqa sapallay qhepakuspa, pampakama k'umuykorqani, qhaparikuspataj nerqani: Tukuyta Kamachej Tata Dios, phiñakuyniykita Jerusalenman kachaykamuspa, tukuyninkutachu tukuchinki? Israelitakunaqa pisillaña kanku, nispa.

⁹ Tata Diostajrí kutichiwarqa: Israelmanta jinataj Judamanta runakunaj millay ruwasqankoqa may jatunpuni. Kay suyoqa runata wañuchiywan, millay ruwaywan ima junt'a kashan. Paykuna yuyanku noqa kay suyuta saqerparisqayta, yuyallankutaj imatachus ruwasqankutapis mana rikusqayta.

¹⁰ Chayrayku noqapis paykunamanta mana uj chhikallantapis khuyakusajchu, nitaj paykunata saminchasajchu. Manachayqa mana allin purisqankumanta cuentata mañaspa, ñak'arichisaj, nispa.

¹¹ Jinallapi linomanta ruwasqa p'achayoj runa, pichus chumpinpi qhelqanapaj imakunayoj kaj kutirimuspa, Tata Diosta nerqa: Kamachiwasqaykita ruwaniña, nispa.