Ezequiel 6 - DIOSPA QHELQACHISQ

Ezequiel lantita yupaychajkunata juchachan

¹ Ujtawan Tata Dios parlamuwaspa, niwarqa:

² Runaj churin, Israel suyupi kaj orqokunata qhawariy, sutiypitaj paykunaj contranpi kay jinata sut'inchay:

³ Israelpi orqokuna, lomakuna, vallekuna, mayukuna ima, uyariychej imatachus Tukuyta Kamachej Tata Dios nisqanta: Maqanakuta qankunaman apachimusqaykichej, lanti yupaychanaykichejtataj thuñirasaj.

⁴ Altarniykichejta, intiman rijch'akoj lantiykichejtapis phirisaj. Runaykichejkunatataj lantiykichejpa ñawpaqenkupi wañurachisaj.

⁵ Chantá israelitakunaj ayankuta lantiykichejpa ñawpaqenman wijch'usaj, tullunkutataj altarkunaykichejpa muyuyninman qhallisaj.

⁶ Maypichus paykuna tiyakunku, chay llajtakuna thuñisqallataj kanqanku. Tukuy altarninkukuna phirisqapuni kanqanku. Lantinkukunapis, intiman rijch'akoj lantinkukuna ima phirisqallataj kanqanku. Inciensota q'oshñichinanku altarkunapis thuñichisqallataj kanqanku. Tukuy ima ruwasqankupis chinkachisqa kanqa.

⁷ Chantá chay chhika runakunata wañurajta rikuspa, noqa Tata Dios kasqayta yachanqanku.

⁸ Chaywanpis noqa saqesaj paykuna ukhumanta wakinkuna mana wañunankuta, astawanpis kawsanankuta waj suyukunaman ch'eqerasqa kaspa.

⁹ Waj suyuman apasqamanta ayqekojkunataj noqamanta yuyarikuwanqanku. Reparanqanku imaynatachus llakichiwasqankuta wasanchaj sonqonkuwan noqamanta karunchakuspa. Yachallanqankutaj imaynatachus llakikusqayta khuchichakoj ñawinkuwan lantinkukunata munapayasqankumanta. Paykuna kikinku tukuy millay ruwasqankumanta, chantá tukuy imaymana khuchiriyota ruwasqankumanta millachikonqanku.

¹⁰ Chaypacha noqa Tata Dios kasqayta yachanqanku. Chantá yachallanqankutaj paykunaman mana allin kajta apachimunayta nisqayqa mana qhasichu kasqanta, nispa.

¹¹ Tukuyta Kamachej Tata Dios kaytawan nin: Qhasqoykita takakuy, chakiykikunawantaj zapateyay. Israel ayllu millayta ruwasqanmanta llakiywan qhapariy, imaraykuchus maqanakupi, yarqhaywan, onqoywan ima wañonqanku.

¹² Karupi kajkunaqa onqoywan wañonqanku, qayllapi kajkunataj maqanakupi tinkuspa wañonqanku. Kawsashajkunataj yarqhaywan wañonqanku. Ajinata phiñakuyniyta paykunawan thasnukusaj.

¹³ Paykuna wañusqakunata rikonqanku altarkunaj muyuyninpi, lantikunaj chawpinpi, chantá orqo patapi, lomaj kinrayninkunapi ima. Wañusqakunata rikullanqankutaj thansarara sach'akuna urapi, chantá maypichus tukuy lantikunaman inciensota q'oshñicherqanku, chay cheqakunapipis. Maypachachus wañusqakunata rikonqanku, chaypacharaj noqa Tata Dios kasqayta yachanqanku.

¹⁴ Uray ladopi ch'in pampamanta wichaypi kaj Diblat llajtakama makiyta oqharisaj paykunata jasut'inaypaj. Maynejpichus tiyakunku, chay suyuta mancharina ch'inman tukuchisaj. Chaypachataj paykunaqa noqa Tata Dios kasqayta yachanqanku, nispa Tata Dios nin.