Ezequiel 4 - DIOSPA QHELQACHISQ

Ezequiel Jerusalenta jap'inankuta willan

¹ Tata Dios niwarqa: Runaj churin, qanqa uj adobeta oqharispa, ñawpaqeykiman churay. Chay adobej patanpitaj Jerusalén llajtaman rijch'akojta dibujanki.

² Chaymanta soldadokunawan muyuykuchinki, maqanakupaj armakunatawan ima. Jinallataj muyuyninpi perqanta jark'achatawan ruwaray, jap'inapaj muyuykusqa llajta jina rikukunanpaj.

³ Chantá uj p'alta fierrota oqharispa, qanta llajtamanta t'aqasunanpaj perqapis kanman jina churay. Qantaj llajtanejman qhawarispa, maqanakuman yaykunaykipaj jina sayaykuy. Chayqa israelitakunapaj uj señal jina kanqa.

⁴ Chantá qan lloq'emanta siriykuspa, Israel aylloj juchanta pataykiman churaykukunki. Mashkha p'unchaykamachá siriykunki, chaykama israelitakunaj juchankuta pataykipi apanki.

⁵ Mashkha watatachus paykuna millayta ruwaspa purerqanku, chay chhika p'unchayllataj kanqa, chaytaj ruwakun 390 p'unchaykuna. Chay chhika p'unchaykunata Israel aylloj juchanta apanki.

⁶ Chay tiempo junt'akojtinkama, pañamantañataj siriykunki. Judá aylloj juchantañataj pataykiman churaykukunki tawa chunka p'unchay junt'akunankama, uj p'unchayta sapa wata millayta ruwaspa purisqankumanta.

⁷ Chantá awqankunawan muyuykusqa Jerusalén llajtaman kutirikunki. Chantá makiykita q'empirakuytawan, Jerusalenpa contranpi sutiypi parlanki.

⁸ Noqatajrí waskhawan wataykusqayki ama tijraykachakunaykipaj, mashkha p'unchaytachus ñak'arinayki kanqa, chayta junt'anaykikama, nispa.

⁹ Chantá Tata Dios nillarqataj: Kunan oqharikuy uj chhika trigota, cebadata, jabata, lentejata, mijuta, avenatawan. Chaykunata uj ch'illamipi chajruykuspataj, t'antata ruwakuy. Chayta lloq'emanta siriykusqa kashaspa mikhunki, 390 p'unchaykuna junt'akunankama.

¹⁰ Señalasqa phanillapi sapa p'unchay khuskan librallata mikhunki.

¹¹ Yakutapis señalasqa phanillapitaj sapa p'unchay khuskan litrota ujyanki.

¹² Chay mikhunata wakichinki, imaynatachus cebadamanta t'antata ruwanku, ajinata. Jinapis chay t'antata runaj wanunwan chayachinki tukuy israelitakunaj rikunankuta, nispa.

¹³ Chantá Tata Dios nillarqapuni: Israelitakunaqa ajina ch'ichipaj qhawasqa t'antata mikhonqanku, maymanchus paykunata apachisaj, chay suyukunapi, nispa.

¹⁴ Noqatajrí kuticherqani: Ay, Tukuyta Kamachej Tata Diosníy, manapuni jayk'aj ima millay ch'ichipaj qhawasqata llankharqanichu, nillataj jayk'ajpis pay kikinmanta wañusqa uywaj aychanta mikhorqanichu, nitaj k'ita animalkunaj uywa wañuchisqan aychata, nillataj ch'ichipaj qhawasqa aychatapis, nispa.

¹⁵ Chantataj Tata Dios niwarqa: Chay jinaqa t'antaykita runaj wanunwan chayachinaykitaqa, waka wanuwan t'antaykita chayachinki, nispa.

¹⁶ Chantá nillawarqataj: Runaj churin, noqa Jerusalenpi mikhuykunata pisiyachisaj. Paykunaqa t'antatapis tupusqallata llakiyllawan mikhonqanku. Yakutapis tupusqallata mancharisqalla ujyanqanku.

¹⁷ Yaku chantá mikhuna tukukojtin, may llakisqa qhawanakonqanku. Paykunaqa juchankurayku kawsashajlla tukukonqanku, nispa nerqa Tata Dios.