Ezequiel 2 - DIOSPA QHELQACHISQ

Tata Diosqa Ezequielta kamachin imatachus ruwananta

¹ Chantá chay parlamoj niwarqa: Qan, runaj churin, parlasunaypaj sayarikuy, nispa.

² Ajina parlamushawajtin, Diospa Espíritun sonqoyman junt'aykuwarqa, sayarichiwarqataj. Chantá nishawajta uyarerqani:

³ Runaj churin, qanta mana kasukoj israelitakunaman kachasqayki, noqaj contraypi oqharikoj aylluman. Paykuna jinataj ñawpa tatankukuna kunankama contraypi oqharikunku.

⁴ Noqaqa mana kasukoj rumi sonqo runakunaman kachashayki, qantaj kay jinata ninki: Tukuyta Kamachej Tata Dios ajinata nin, nispa.

⁵ Chay millay mana kasukoj runakuna uyarisuchunkupis amapis, paykuna ukhupi noqamanta uj sut'inchaj kasqanta yachanqanku.

⁶ Qanrí, runaj churin, imata nisojtinkupis, paykunamanta ama manchachikuychu, khishka chawpipi jina tarikuspapis, chayrí atojsillukuna chawpipi jina kashaspapis. Amapuni paykunaj parlasqankumanta manchachikuychu, amataj paykunaj ñawpaqenkupi kharkaychu, imaraykuchus paykuna contraypi oqharikoj ayllu kanku.

⁷ Qanqa noqaj nisqayta paykunaman willay, uyarisuchunkupis amapis. Paykuna mana uyarisonqankuchu, imaraykuchus contraypi oqharikojkuna kanku.

⁸ Qantajrí, runaj churin, parlasusqayta allinta uyariy, amataj paykuna jinaqa mana kasukoj kaychu. Kunantaj simiykita kichariy, noqataj ujta qosqayki mikhunaykipaj, nispa.

⁹ Jinapi noqa qhawarerqani, rikorqanitaj uj makita qhelqa jap'irisqata. Chay makitaj noqa ladoman aysarisqa karqa.

¹⁰ Chantá ñawpaqeypi chay k'uyusqa qhelqa kicharikorqa, puraj ladonpitaj qhelqasqa karqa llakiy yarawikuna, waqaykuna, ayqoykuna, ima.