Éxodo 31 - DIOSPA QHELQACHISQ

Diosqa Besalelta, Aholiabtawan wajyan

¹ Chantá Tata Diosqa Moisesta nillarqataj:

² Judá jatun ayllumanta Jurpaj allchhin, Urij churin Besalel sutiyojta noqa ajllani.

³ Payta Diospa espiritunwan kallpachani, yachayniyoj, yuyayniyoj kananpaj. Ajinamanta payqa tukuy imata ruwayta yachanqa,

⁴ qorimanta, qolqe metalmanta, broncemanta ima.

⁵ Chhitanapaj, lliphipirishaj rumita ch'eqonanpaj, k'aspimanta t'illmispa ruwananpaj, jinallataj tukuy imata ruwanapaj yuyayniyoj, yachayniyojtaj kanqa.

⁶ Ajllallanitaj Besalelta yanapananpaj Dan jatun ayllumanta Ajisamacpata churin Aholiabta. Chay waj yachayniyojkunamanpis astawan yachayta qollanitaj, qanman kamachisusqayta tukuyninta ruwanankupaj.

⁷ Paykuna Dioswan Tinkukuna Toldota, Diospa trato ruwasqan arcata, Khuyakuyta Tarina nisqa kirpanatapis ruwanqanku. Jinallataj Dioswan Tinkukuna Toldopi kaj imakunatapis ruwallanqankutaj.

⁸ Chantá mesata tukuy imantinta, sumaj qorimanta candelerota tukuy imantinta, inciensota q'oshñichina altarta ima ruwanqanku.

⁹ Jinallataj q'olachina altarta tukuy imantinta, mayllakuna ch'illamita, sayanantawan ima ruwanqanku.

¹⁰ Chantá sacerdotekuna ruwanankuta ruwanankupaj chay yachayniyojkuna p'achatapis ruwallanqankutaj Aaronpaj, churinkunapaj ima.

¹¹ Jinallataj Diospaj t'aqanapaj jawina aceiteta ruwallanqankutaj, Dioswan Tinkukuna Toldopaj sumaj k'achituta q'apashaj inciensota ima. Paykuna chay tukuy imata ruwanqanku, imaynatachus kamachishayki chayman jina, nispa.

Samarina p'unchay

¹² Tata Dios ujtawan Moiseswan parlaspa, nillarqataj:

¹³ Israelitakunaman kay jinata ninki: Qankunaqa samarina p'unchayniyta maypaj qhawankichej, imaraykuchus samarina p'unchayqa qankunawan, mirayniykichejwan ima wiñaypaj tratota ruwasqaymanta señal kanqa. Chaynejta yachankichej noqa Tata Diosmin qankunata ajllakusqayta.

¹⁴ Samarina p'unchayta maypaj qhawankichej, imaraykuchus qankunapaj samarina p'unchay kanqa. Pichus chay p'unchayta mana waqaychajqa wañuchisqa kanqa. Chantapis pichus chay p'unchaypi imatachus ruwananta ruwajqa israelitakuna ukhumanta chinkachisqa kallanqataj.

¹⁵ Sojta p'unchayta llank'ankichej, qanchis kaj p'unchaytaj samarina p'unchay Tata Diospaj t'aqasqa kanqa. Chayrayku pichus chay p'unchaypi imatachus ruwananta ruwajqa wañuchisqa kanqa.

¹⁶ Ajinata israelitakunaqa samarina p'unchayta waqaychanqanku, wiñaypaj trato ruwasqay kasqanrayku.

¹⁷ Chay p'unchayqa noqawan, israelitakunawan ima wiñaypaj señal kanqa, imaraykuchus Tata Diosqa sojta p'unchaypi janajta, kay pachatawan ruwarqa, qanchis kaj p'unchaypitaj samarikorqa.

Qorimanta waka uñata ruwanku

¹⁸ Tata Diosqa Sinaí Orqopi Moiseswan parlayta tukuytawan, kamachisqakunata p'alta rumipi qhelqasqata Moisesman qorqa. Chay kamachisqakunataqa kikin Diospuni makinwan qhelqarqa.