Éxodo 3 - DIOSPA QHELQACHISQ

Diosqa Moisesta wajyan

¹ Jetroqa Madianpi sacerdote karqa. Moisestaj suegron Jetroj ovejankunata michej karqa. Uj kuti ch'innejpi ovejakunata michishaspa, Moisesqa Diospa orqon Horeb nisqaman chayarqa.

² Chaypitaj uj t'ankar sach'api nina lawrashaj chawpipi Tata Diospa angelnin rikhurerqa. Moisestaj t'ankarta nina mana ruphasqanta rikuspa,

³ nerqa: Imataj jaqayri? Rispa, qhawamusaj imajtinchus t'ankarta nina mana ruphashanchu, nispa.

⁴ Chantá Tata Diosqa Moisés t'ankarman qayllashasqanta rikuspa, payta wajyarqa nina lawray ukhumanta: Moisés, Moisés, nispa. Paytaj kuticherqa: Imata ninki, tatáy? nispa.

⁵ Tata Diostaj nerqa: Ama astawan qayllamuychu. Juk'utaykita orqhokuy, imaraykuchus sayashanki, chaynejqa noqapaj t'aqasqamin, nispa.

⁶ Chantá nillarqataj: Noqa ñawpa tataykikunaj Diosnin kani, Abrahampata, Isaacpata, Jacobpatawan ima, nispa. Moisestaj chayta uyarispa, uyanta qhataykukorqa, imaraykuchus Diosta qhawayta manchachikorqa.

⁷ Chantá Tata Dios nillarqataj: Noqa Egipto suyupi israelitakuna sonqo nanayta ñak'arishasqankuta rikuni. Jilaqatakuna jasut'ispa, imaynatachus waqachisqankutapis uyarini. Imaynatachus llakikushasqankuta yachallanitaj.

⁸ Chayrayku Egipto llajtayojkunaj makinmanta paykunata kacharichinaypaj urayk'amuni, Egiptomanta orqhospa, paykunata sumaj jallp'aman pusanaypaj, maypichus lechewan, abeja misk'iwan yaku jina purishan, chayman. Chay jallp'api tiyashanku: Cananeokuna, jeteokuna, amorreokuna, ferezeokuna, heveokuna, jebuseokuna ima.

⁹ Noqaqa israelitakunaj qhaparikusqankuta uyarini, chantá rikullanitaj Egipto llajtayojkuna paykunata maytapuni ñak'arichisqankuta.

¹⁰ Chayrayku kunan qan faraonman rinki. Noqa kachashayki Israelpa mirayninta Egiptomanta orqhomunaykipaj, nispa.

¹¹ Moisestajrí Diosta nerqa: Pitaj noqa kasqani faraonman rispa, Egiptomanta israelitakunata orqhomunaypajri? nispa.

¹² Chantá Dios kuticherqa: Noqamin qanwan kasaj. Noqa qanta kachasusqayta yachanaykipajtaj, kaymin señal kanqa: Maypachachus israelitakunata Egiptomanta orqhomunki chaypacha, tukuyniykichej kay orqopipuni yupaychawankichej, nispa.

¹³ Moisestajrí kuticherqa: Sichus rispa israelitakunata nisaj: Ñawpa tataykichejpata Diosnin kachamuwan, nispa chayqa, paykuna tapuwanqanku: Imataj chay Diospa sutin kasqari? nispa. Jinata tapuwajtinku, ima nispataj kutichisajri? nispa.

¹⁴ Chaypacha Dios nerqa: Noqamin kani. Israelitakunata ninki: NOQA KANI nej Dios qankunaman kachamuwan, nispa.

¹⁵ Chay jawa Diosqa Moisesta nillarqataj: Israelitakunata nillankitaj: Tata Dios, pichus ñawpa tataykichej Abrahampata, Isaacpata, Jacobpata ima Diosnin kajqa noqata qankunaman kachamuwan, nispa. Suteyqa wiñaypaj Tata Dios kanqa, chay sutiwantaj wiñaypa wiñayninkama rejsisqa kasaj.

¹⁶ Chantá qan rispa, israelitakunaj kurajninkunata tantanki, paykunatataj ninki: Ñawpa tataykichejkunaj Diosnin, Abrahampata, Isaacpata, Jacobpata ima rikhuriwaspa, kay jinata nisunkichej: Noqaqa mana qankunamanta qonqakunichu, jinataj rikuni Egipto llajtayojkuna imaynatachus qankunata ñak'arichisusqaykichejta.

¹⁷ Chayrayku noqa Egiptopi sinch'ita ñak'arinaykichejmanta qankunata kacharichisqaykichej. Pusasqaykichejtaj lechewan, abeja misk'iwan yaku jina purishan, chay sumaj jallp'aman, maypichus kunan cananeokuna, jeteokuna, amorreokuna, ferezeokuna, heveokuna, jebuseokuna ima tiyakushanku, chayman.

¹⁸ Qan Moisés, ajinata nejtiyki, israelitakunaj kurajninkuna kasusonqanku. Chantá kurajkunawan khuska Egiptopi kuraj kamachejmanñataj rispa, ninkichej: Tata Dios, israelitakunaj Diosnin rikhuriwayku. Chayrayku kinsa p'unchay puriyta ch'innejman risqayku, Tata Diosman uywata ñak'aspa, jaywamunaykupaj, nispa.

¹⁹ Chaywanpis noqa yachaniña Egiptopi kuraj kamachejqa mana rinaykichejta munananta. Manachayqa pay sinch'i mat'iykusqa kasparaj rejta saqesonqachej.

²⁰ Chayrayku noqaqa sinch'i atiyniyoj kasqayta rikuchisaj. Tukuy imaymana t'ukunata ruwaspa, Egipto llajtayojkunata ñak'arichisaj. Chaymantaraj ripojta saqesonqachej.

²¹ Noqataj Egipto llajtayojkunaj sonqonkuta llamp'uyachisaj, israelitakunawan k'acha kanankupaj. Ajinata Egiptomanta llojsishaspa, tukuy imayoj ripunkichej.

²² Sapa uj warmi, Egipto llajtayoj warmi masinmanta, chayrí paywan tiyakun waj llajtayoj warmimanta ima mañanqa qolqe metalmanta, qorimanta ruwasqa imakunata, sumaj p'achakunatawan ima. Chantá chaykunata churiykichejkunaman, jinallataj ususiykichejkunamanpis churankichej. Ajinamanta qankuna Egipto llajtayojkunata mana imayojta saqenkichej, nispa. Tata Dios ajinata Moisesta kamacherqa.