Éxodo 29 - DIOSPA QHELQACHISQ

Sacerdotekuna Diospaj t'aqasqa

¹ Tata Dios ujtawan Moisesta nillarqataj: Aaronwan, churinkunawan ima sacerdoteykuna kanankupaj t'aqaspa, kaykunata ruwanki: Mana iman imanasqa uj torillota, iskay corderotawan ima apamunki.

² Chantá sumaj trigo jak'umanta mana levadurayoj t'antatawan, olivo aceitewan puñasqa mana levadurayoj tortillatawan ruwanki. Jinallataj aceitewan jawisqa, mana levadurayoj tortillata ruwallankitaj.

³ Chantá chaykunata juch'uy canastaman churaykuspa, torillotawan, iskay corderotawan khuska jaywanawaykipaj apanki.

⁴ Chaymantataj Aaronta, churinkunatawan ima Dioswan Tinkukuna Toldo punkuman pusanki, chaypitaj paykunata yakuwan mayllanki.

⁵ Chantá kuraj kaj sacerdotekunaj p'achankuta jap'ispa, Aaronman churaykunki. Ñawpajta jatun p'achata, patanmantaj poncho jina qhatanata, patanmantaj unkuta, chaypaj patanmantaj pecherata churaykunki. Chaymantataj unkoj kantunpi ruwasqa chumpiwan chumpiykuchinki.

⁶ Chaymantataj umanman chhoqo ch'uluta churanki, chaypa patanmantaj “Diospaj t'aqasqa”, nispa nishaj sillp'a tablitata churanki.

⁷ Chantá jawina aceiteta umanman jich'aykuspa, Aaronta jawinki.

⁸ Chaymantaqa churinkunatañataj qayllamunankuta kamachinki, chantá paykunata p'achallichinki.

⁹ Chaymantá Aaronta, jinallataj churinkunatapis chumpiwan chumpinki, jinaspataj sapa ujman ch'uluta churaranki. Ajinamanta paykunaqa kamachisqaman jina wiñaypaj sacerdoteykuna kanqanku. Ajinata Aaronta, churinkunatawan ima wiñaypaj sacerdoteykuna kanankupaj t'aqanki.

¹⁰ Chaymantaqa Dioswan Tinkukuna Toldo punkuman torillota aysanki, chaypitaj Aarón, churinkunawan ima torilloj umanman makinkuta churanqanku.

¹¹ Chaymantataj Dioswan Tinkukuna Toldo punkupi, Tata Diospa ñawpaqenpi chay torillota ñak'anki.

¹² Chantá torilloj yawarninta jap'ispa, ruk'anaykiwan altarpi wajrakunata jawinki. Puchoj yawartataj altar k'uchuman jich'anki.

¹³ Chantá ch'unchulamanta, k'iwichamanta, lurunkunamantawan ima wiranta orqhospa, altarpi q'olachinki.

¹⁴ Torilloj aychanta, qaranta, wanuntawan imataj, jaramanta jawaman apaspa, chaypi ruphachinki. Chaymin kanqa juchata pampachanapaj q'olachispa jaywanaqa.

¹⁵ Chaymantaqa corderokunamanta ujninta aysamunki. Chantá Aaronwan, churinkunawan ima corderoj umanman makinkuta churallanqankutaj.

¹⁶ Chantá corderota ñak'aspa, yawarninwan altarta, chantá altarpa muyuyninta ima ch'ajchunki.

¹⁷ Chaymantataj chhikan chhikanta corderoj aychanta khuchunki. Chantá ch'unchulanta, piernantawan ima mayllaspa, umantawan khuska aycha pataman churanki.

¹⁸ Jinaytawantaj, tukuy corderota altar patapi ruphachinki. Chayta q'olachispa, Tata Diosman jaywanki, sumajta q'aparisqantaj Tata Diospa sonqonman chayanqa.

¹⁹ Chaymantaqa ujnin kaj corderotañataj aysamunki. Chantá Aaronwan, churinkunawan ima ujtawan corderoj umanman makinkuta churallanqankutaj.

²⁰ Chantá chay corderota ñak'aspa, uj chhika yawarta jap'inki. Chaywantaj Aaronpata paña ninrinpa uranta jawiykunki, jinallataj churinkunaj paña ninrinkoj uranta jawiykullankitaj. Jawillankitaj paña makinkoj machu ruk'ananta, paña chakinkoj machu ruk'anantawan ima. Puchoj yawarwantaj altarpa tukuy muyuyninta ch'ajchunki.

²¹ Altar patapi kaj yawarwan, jinataj jawina aceitewan Aaronta, chantá p'achantapis ch'ajchullankitaj. Jinallataj churinkunata, p'achankutapis ch'ajchullankitaj. Ajinamanta Aarón, churinkuna ima, jinallataj p'achankupis Diospaj t'aqasqa kanqanku.

²² Chaymantataj corderoj wiranta, chupanmanta, ch'unchulanmanta, k'iwichanmanta, chantá iskaynin lurunninmanta orqhonki. Chantá paña piernantawan orqhollankitaj, imajtinchus chay corderoqa sacerdotekunata Diospaj t'aqanapaj karqa.

²³ Tata Diospa ñawpaqenpi kashaj canastapi mana levadurayoj ruwasqa t'antamanta, uj t'antata oqharinki. Oqharillankitaj aceiteyoj puñasqamanta ruwasqa tortillata, aceitewan jawisqa tortillatapis.

²⁴ Chantá tukuyninta Aaronpa makinman, jinallataj churinkunaj makinman ima churanki. Paykunataj ikhaspa, Tata Diosman jaywanqanku.

²⁵ Chantataj makinkumanta chay t'antakunata jap'ispa, q'olachinapaj aychatawan khuska altar patapi ruphachinki, noqapaj ima munayta q'aparishaj jaywana kananpaj. Chayqa noqapaj q'olachisqa jaywana kanqa.

²⁶ Aaronta kuraj kaj sacerdotey kananpaj t'aqashaspa, corderoj qhasqonta ikhaspa, noqaman jaywawanki. Chaytaj qanpaj kanqa.

²⁷ Aaronwan, churinkunawan ima Tata Diospaj t'aqasqa kanankupaj, corderoj qhasqonta, piernantawan ima ikhasqa jaywawasqaykita t'aqanki. Chaykunataj Aaronpaj, churinkunapajwan kanqa.

²⁸ Tukuy chaykunataqa Aaronman, churinkunamanwan ima qonki. Kayqa israelitakunapaj wiñaypaj kamachisqa kanqa. Israelitakuna Tata Diosman allinyakuna jaywanata jaywaspa, corderoj qhasqonta, piernantawan sacerdotekunaman qonqanku.

²⁹ Aarón wañupusqanmanta qhepaman, sacerdote jina churakunan p'achakunaqa churinkunapaj kanqa. Paykuna chay p'achata churakonqanku, aceitewan jawisqa, chantá sacerdote t'aqasqa kanankupaj.

³⁰ Aarón wañupojtin, mayqen churinpis cuentanmanta kuraj kaj sacerdote jina sayanqa, payqa chay sacerdote p'achata churakonqa. Chantá Dioswan Tinkukuna Toldoman yaykuspa, qanchis p'unchayta Diospaj T'aqasqa Cheqapi qhepakonqa kuraj kaj sacerdotej ruwananta ruwaspa.

³¹ Chantá sacerdote kanankupaj t'aqaspa jaywasqayki corderoj aychanta Diospaj T'aqasqa Cheqapi chayachinki.

³² Chaymantataj Aaronwan, churinkunawan ima Dioswan Tinkukuna Toldo punkupi cordero aychata, canastamanta t'antatawan mikhonqanku.

³³ Sacerdote kanankupaj t'aqasqa karqanku, chantá juchanku pampachasqa kananpaj Diosman jaywasqa karqa, chay corderoj aychanta canastamanta t'antawan mikhonqanku. Chaykunataqa sacerdotekunalla mikhonqanku, wajkunarí mana, Diospaj t'aqasqa kasqanrayku.

³⁴ Sichus Diosman jaywasqa aychamanta, t'antamantawan ima puchunman chayqa, ruphachinki. Chay puchojta mana pipis mikhunanchu tiyan, imaraykuchus chayqa Diospaj t'aqasqamin.

³⁵ Imaynatachus kamachisusqayman jina, ajinata Aaronwan, churinkunawan ima ruwanki. Sacerdoteykuna kanankupaj t'aqaspa, qanchis p'unchayta chay tukuy imata ruwanki.

³⁶ Chantaqa jucha pampachasqa kananpaj, uj torillota ñak'aspa, sapa p'unchay q'olachispa Tata Diosman jaywanki. Chantá altarta llimphuchanki jucha pampachasqa kananpaj, jinataj altarta Diospaj t'aqanki Diosman jaywanata jaywaspa chantá aceitewan jawispa ima.

³⁷ Qanchis p'unchayta altarpi, jucha pampachasqa kananpaj, uywa ñak'asqata Diosman jaywanki. Ajinata ruwaspa altarta Diospaj t'aqanki. Altartaj may llimphupaj qhawasqa kanqa. Imallapis altarman chayaykojqa Diospaj t'aqasqa kanqa.

Sapa p'unchay jaywanamanta

³⁸ Sapa p'unchay mana qonqaspa, uj watayoj iskay corderota altarpi Diosman jaywanki.

³⁹ Ujnin kajta tutamanta, ujnin kajtataj inti yaykuyta Diosman jaywanki.

⁴⁰ Ñawpaj kaj corderotawan khuska, trigo jak'umanta sumaj kajta iskay kilota jina, uj litro olivo aceitewan chajrusqata jaywallankitaj. Chaymantaj uj litro vinota ofrendata jina ch'ajchuykunki.

⁴¹ Chay ujnin kaj corderotataj inti yaykuykuyta jaywanki, imaynatachus tutamanta jak'utawan, vinotawan ima jaywarqanki, ajinallatataj. Chayqa ima munayta q'apashaj Tata Diospa sonqonman chayaj kanqa.

⁴² Ajina noqaj sutiypi q'olachisqa jaywanataqa wawaykichejkuna wiñaypaj wiñayninkama ñawpaqeypi jaywallanqankupuni. Chaytaqa Dioswan Tinkukuna Toldo punkupi, maypichus noqa qanwan parlanaypaj tinkusaj, chaypi jaywanqanku.

⁴³ Chaypi israelitakunawan tantakullasajtaj. Chay cheqataj, chaypi noqa kasqayrayku, noqajta kananpaj t'aqasqa kanqa.

⁴⁴ Jinallataj Dioswan Tinkukuna Toldota, altarta ima noqapaj t'aqasaj. Chantá Aaronta, churinkunatawan ima sacerdoteykuna kanankupaj t'aqallasajtaj.

⁴⁵ Israelitakuna ukhupi noqa tiyakusaj, Diosninkutaj kasaj.

⁴⁶ Ajinamanta paykunaqa noqamin Tata Diosninku kasqayta yachanqanku. Noqa paykunaj chawpinkupi tiyakunaypaj Egiptomanta orqhomorqani. Noqa, Tata Diosmin Diosninku kani.