Ester (hebreo) 9 - DIOSPA QHELQACHISQ

Judiokuna atipanku

¹ Wata tukukuy Adar killata, chunka kinsayoj p'unchay kashajtin, kuraj kamachejpa kamachisqan junt'akunan karqa. Judiokunaj awqankutaj atipaykuyta suyasharqanku. Chaywanpis mana yuyasqanku jinachu karqa, imaraykuchus judiokunaqa paykunata chejnikojkunawan munayninkuta ruwarqanku.

² Kuraj kamachej Asueroj kamachisqan suyukunapi judiokunaqa chay llajtakunapi tantakorqanku, pikunachus paykunata wañuchiyta munarqanku, chaykunaman sayaykunankupaj. Ni pipis sayaykorqachu paykunawan maqanakojqa, imaraykuchus judiokunata anchata manchachikorqanku.

³ Chantá jilaqatakuna, sapa llajtapi kamachejkuna, waj kamachejkuna, yanapajkunapis Mardoqueota manchachikuspa, judiokunata yanaparqanku.

⁴ Mardoqueoqa kuraj kamachejpa kamachinan wasipi manchay uyarisqa runa karqa. Chay uyarisqa kasqanqa tukuy llajtaman chayarqa, sapa p'unchaytaj Mardoqueo aswan atiyniyojman tukusharqa.

⁵ Judiokunaqa awqankukunata sonqo nanayta, mana ni ujta saqespa espadawan wañucherqanku. Paykunawan chejninakojkunataqa munayninkuta ruwarqanku.

⁶ Judiokunaqa kuraj kamachejpa tiyakunan Susa llajtapi 500 qharikunata wañuracherqanku.

⁷ Chaypacha wañuchillarqankutaj Parsandatata, Dalfonta, Aspatata,

⁸ Poratata, Adaliata, Aridata,

⁹ Parmastata, Arisayta, Aridayta, Vaizatawan ima.

¹⁰ Chay chunka runakunaqa judiokunaj awqanku Hamedataj churin Amanpa churinkuna karqanku. Chaywanpis kapuyninkuta judiokunaqa mana jap'ikaporqankuchu.

¹¹ Chay p'unchaypacha kuraj kamachejman willarqanku, tiyakunan Susa llajtapi mashkha runatachus wañuchisqankuta.

¹² Chantá kuraj kamachejqa qoya Esterta nerqa: Sichus kay Susa llajtapiraj judiokuna 500 qharikunata, Amanpa chunka churinkunatawan wañuchinku chayqa, kamachishani chay waj llajtakunapeqa imakunatarajchus ruwankupis ari. Kunanqa imatawantaj mañakuwankiri? Imatachus munasqaykita ruwasaj, nispa.

¹³ Estertaj nerqa: Kuraj kamachejníy, sichus allin rijch'asunki chayqa, Susa llajtapi kaj judiokunata saqey ari, kamachisqaykiman jina imatachus kunan ruwarqanku, ajinallatataj q'ayapis ruwanankuta. Saqellaytaj Amanpa chunka churinkunaj ayankuta warkhunankuta, nispa.

¹⁴ Chantá kuraj kamachej nerqa ajinata ruwanankuta. Susa llajtapi chay kamachisqata willarachimorqa, judiokunataj Amanpa chunkantin churinkunaj ayankuta sipinaman warkhorqanku.

¹⁵ Susa llajtapi tiyakoj judiokunapis, Adar nisqa killapi chunka tawayoj kaj p'unchaypi tantakuspa, 300 runakunatawan wañucherqanku. Chaywanpis mana imankukunata jap'ikaporqankuchu.

¹⁶ Kuraj kamachej Asuero kamachisharqa, chay llajtakunapi tiyakoj judiokunaqa tantakullarqankutaj awqankunawan maqanakunankupaj, atipaspataj 75.000 runakunata wañucherqanku. Chaywanpis imankuchus kajta mana jap'ikaporqankuchu.

¹⁷ Chaytaqa Adar nisqa killapi, chunka kinsayoj p'unchaypi ruwarqanku. Q'ayantintaj samarikorqanku, sumaj mikhuyta wayk'urikuspataj, mayta kusikorqanku.

¹⁸ Susa llajtapi kaj judiokunarí chunka kinsayoj kaj p'unchaypi, q'ayantintawan ima tantakusqankurayku, chunka phishqayoj kaj p'unchaypi samarikorqanku. Sumaj mikhuyta wayk'urikuspa, mayta kusikorqanku.

¹⁹ Mana jatun perqakunawan jark'achasqa llajtakunapi tiyakoj judiokunataj Adar nisqa killapi chunka tawayoj p'unchaypi samarikorqanku. Sumaj mikhuyta wayk'urikuspa, maytapuni kusikorqanku, imankuchá tiyapusqantataj ujkuna ujkuna jaywanarikorqanku.

Purim nisqa raymi

²⁰ Mardoqueoqa chay imakunata qhelqarqa, cartakunatataj apacherqa, kuraj kamachej Asuero kamachisharqa, chay suyukunapi tiyakoj judiokunaman, chay qayllapi tiyakojkunaman, karupi tiyakojkunamanwan ima.

²¹ Chay cartapitaj judiokunaqa chay raymita sapa wata Adar nisqa killapi, chunka tawayoj p'unchaypi, q'ayantintawan ruwanankuta kamacherqa.

²² Chaytaqa ruwananku karqa chay p'unchaypi paykunapaj kusikuy kasqanmanta, chantá awqankunamanta kacharichisqa kasqankumanta, chay jina llakiypi kashajtinku, kusiy p'unchaypi rikhurisqankumanta. Chay p'unchaytaqa raymita ruwaspa, yuyarikunanku karqa, ujkuna ujkunawan jaywarinakuspa, jinallataj wajchakunamanpis jaywarispa.

²³ Judiokunaqa chay raymita sapa wata ruwarqanku, Mardoqueoj kamachisqanman jina.

²⁴ Hamedataj churin agagueo Amanqa Pur nisqa suerteta choqaspa, tukuy judiokunaj contrankuta wakichisqa, ni uj puchuyojta paykunata chinkachinanpaj.

²⁵ Estertajrí kuraj kamachejpaman rejtin, Asueroqa cartata qhelqaspa apachisqa, Amanpa tukuy sajrata judiokunapaj yuyasqanqa payllamantaj urmananpaj. Ajinamanta paywan, churinkunawan ima warkhusqa kasqanku.

²⁶ Chayrayku chay p'unchaytaqa Purim nispa suticharqanku, chaytaj Pur sutiyoj suerteta choqanamanta jamun. Mardoqueo cartanpi nisqanman jina, paykuna rikusqankuman jina, chantá paykunata imachus qhatirisqanman jinataj,

²⁷ judiokunaqa Purim nisqa raymi ruwanata usuman tukucherqanku. Paykunaqa chay raymita ruwananku karqa, jinallataj mirayninkupis. Chantá pikunachus judiokunaman k'askaporqanku, chaykunapis sapa wata ruwananku karqa iskay p'unchay junt'ata, maychus kasqanman jina.

²⁸ Chay p'unchayqa sapa ayllupi, sapa llajtapi, sapa suyupi ima, mirayninkumanta mirayninkukama raymita ruwaspa yuyarinanku karqa. Tukuy judiokunaqa chay Purim nisqa raymita waqaychananku karqa, paykunaj mirayninkutaj ni jayk'aj chayta qonqanankuchu karqa.

²⁹ Abijailpa ususin Esterwan, judío Mardoqueo ima kasuchikunankupaj jina uj cartatawan ruwarqanku, tukuy judiokuna Purim nisqa raymita mana qonqaspa sapa wata ruwanankupaj.

³⁰ Chay cartataqa 127 suyukunapi Asuero kamachisharqa, chaypi tiyakoj judiokunaman apacherqanku, sonqota tiyaykuchinanpaj jina, cheqan sonqowan parlaspa.

³¹ Chay cartapi Mardoqueowan, qoya Esterwan ima kamacherqanku, chay Purim nisqa raymi ruwakunanta, orqhosqanku, chay p'unchaypi. Jinallataj kamacherqanku tukuy judiokuna ayunaspa chantá llakikuspa yuyarikunankupaj.

³² Esterpa kamachisqanqa Purim raymi nisqamanta allinta sut'incharqa, imaynatachus sapa kuti ruwanankumanta. Chaykunataj uj qhelqapi qhelqasqa kashan.