Ester (hebreo) 8 - DIOSPA QHELQACHISQ

Judiokunaman kutisqa kamachisqata orqhonku

¹ Chay kikin p'unchaypacha kuraj kamachej Asueroqa qoya Esterman judiokunaj awqanku Amanpa imanchus kaj chhikata qoporqa. Mardoqueotaj kuraj kamachejpa ñawpaqenman yaykumorqa, imaraykuchus qoyaqa Asueroman willasqaña Mardoqueo ayllun kasqanta.

² Chantá kuraj kamachejqa Amanmanta qhechusqan anillota Mardoqueoman qorqa. Estertaj Mardoqueota mayordomomanta churarqa, Amanpata karqa, chay tukuy kapuyninta qhawananpaj.

³ Chantá Esterqa mayta waqaspa, ujtawan kuraj kamachejwan parlamorqa. Chakinman wijch'uykukuspa, mañakorqa, Amán agagueo judiokunata sajrata ruwananpaj, chay kamachisqanta chinkachinanta.

⁴ Chaypacha kuraj kamachejqa qorimanta kamachina varanta ujtawan Esterman aysarerqa. Estertaj jatarispa, kamachejpa ñawpaqenpi sayarqa.

⁵ Chantá Esterqa kuraj kamachejta nerqa: Kuraj kamachejníy, sichus kay nisqay qanman allin rijch'asunki, khuyakuyniykitataj tariyman, sitajchus munakuwanki chayqa, uj kamachiyta orqhoy ari, agagueo Hamedataj churin Amán judiokunaj contrankuta kamachisqan ama junt'akunanpaj. Chay kamachisqaqa churasqa kashan, kamachishanki, chay tukuy suyupi judiokunata wañuchinankupaj.

⁶ Imaynatataj noqaqa qhawakullayman judío masiykunaman kay llakiy chayanantari? Imaynatataj saqellayman yawar masiykuna tukuchisqa kanankutari? nispa.

⁷ Chantá kuraj kamachejqa Esterman, judío Mardoqueomanwan nerqa: Esterman Amanpa tukuy kapuyninta qopuni, Amantataj sipinkuña, judiokunaj contrankuta makinta oqharisqanrayku.

⁸ Kunanqa qankuna imachus allin rijch'asusqaykichejta sutiypi qhelqaspa, anilloywan sellaychej, chantá tukuy judiokunamantaj apachiychej. Ima kamachisqapis kuraj kamachejpa sutinpi ruwakojqa kuraj kamachejpa anillonwan sellasqa kaspa, junt'akunanpuni tiyan, nispa.

⁹ Chaypacha kuraj kamachejqa tukuy qhelqerinkunata wajyacherqa Siván nisqa kinsa kaj killapi, iskay chunka kinsayoj p'unchayninpi. Chay qhelqerikunataj Mardoqueoj nisqanta qhelqarqanku judiokunaman, jilaqatakunaman, sapa llajtapi kamachejkunaman, waj kurajkunamanwan ima. Tukuyninpi 127 suyukunaman, Indiamanta Etiopiakama apacherqa. Chantapis chay qhelqaqa karqa, sapa llajtapi imaynatachus qhelqayta yachasqankuman jina, parlayninkuman jinataj. Judiokunamanpis parlayninkuman jina, qhelqayninkuman jinataj apachillarqankutaj.

¹⁰ Chay qhelqata Asueroj sutinpi wakicherqanku, anillonwantaj sellaykorqanku. Chaymantataj kachakunaqa kuraj kamachejpa aswan sumaj caballokunapi lloq'aspa, chay qhelqata aparqanku.

¹¹ Chay qhelqapi kuraj kamachejqa kamachisharqa tukuy judiokunaman, may llajtakunapichá tiyakusharqanku, chaypi tantaykukuytawan, awqankunaj contrankuta maqanakunankuta. Mayqen llajtamantapis, chayrí mayqen suyumantapis paykunaj contrankupi jamojtinku, kuraj kamachejqa nerqa chay awqankunata wañuchinankuta, mana warmikunata, nitaj wawakunatapis khuyaspa. Chantá tukuy kapuyninkuta jap'ikapunanku karqa.

¹² Chay tukuy uj p'unchayllapi kanan karqa, kuraj kamachej Asueroj kamachisqan tukuy suyupi, wata tukukuy Adar killamanta, chunka kinsayoj p'unchay kashajtin.

¹³ Kuraj kamachejpa kamachisqanqa sapa llajtapi willakunan karqa. Chaypitaj nisharqa tukuy judiokuna chay p'unchaypaj sumaj wakichisqa kanankuta, awqankunaman sajramanta sajrallatataj kutichinankupaj.

¹⁴ Kuraj kamachejpa kamachisqantataj kacha runakuna sumajta t'ijoj caballonkunapi aparqanku. Chay kamachisqata kuraj kamachejpa tiyanan Susa llajtapipis willallarqankutaj.

¹⁵ Mardoqueoqa kuraj kamachejpa ñawpaqenmanta llojserqa kuraj kamachejpa churakunan anqawan yurajwan p'achayoj, umanpi jatun qori pillu churaykusqa, linomanta ruwasqa uj jatun puka mantawan llijllaykusqataj. Payta ajinata rikuspataj, Susa llajtapi tukuy tiyakojkunaqa maytapuni kusikorqanku.

¹⁶ Judiokunapaj chay p'unchayqa jatun kusiy, jinataj jatunchasqa kananku p'unchay karqa.

¹⁷ Tukuy suyupi, tukuy llajtapi ima, maykunamanchus chay kamachisqata willachimorqanku, chaypi judiokunaqa kusiymanta sumaj mikhunata wayk'urikuspa kusikorqanku. Waj runakunapis chayta rikuytawanqa, judiokunaman tukorqanku, imaraykuchus judiokunata manchachikorqanku.