Ester (hebreo) 7 - DIOSPA QHELQACHISQAmán sipisqa wañun 1 Kuraj kamachejwan, Amanwan ima qoya Esterpa jatun mikhuyninman rerqanku. 2 Chay p'unchaypipis kuraj kamachejqa vinota ujyaj jina watejmanta Esterta taporqa: Imatataj kunan mañakuwanki, qoya Ester? Noqataj mañakuwasqaykita qosqayki. Imatataj mañakuyta munankiri? Munajtiykeqa kamachiyniymanta khuskannintapis qosqayki, nispa. 3 Chaypacha qoya Esterqa kuticherqa: Sichus qan allinpaj qhawawanki, allintaj qanman rijch'asunkiman chayqa, mañakuyki ama wañuchichinawaykita, jinallataj yawar masiykunatapis ama wañuchichinaykita. 4 Noqatawan, yawar masiykunatawan ima uj runa vendewayku wañurachinawaykupaj, ni uj puchuyojtataj chinkachinawaykupaj. Sichus wiñaypaj wata runa kanaykupaj vendesqa kaykuman karqa chayqa, ch'inlla kakuyman karqa. Chaywanpis, sichus ajinata wañurachiwasqayku chayqa, kuraj kamachejniypaj manapuni allinchu kanqa, nispa. 5 Chantá kuraj kamachej Asueroqa qoya Esterta nerqa: Pitaj chantá chay runari? Maypitaj kashan chay sajra sonqo runari? nispa. 6 Estertaj nerqa: Chay jinata ruwaj, chay sajra sonqo runaqa kay Amanmin, nispa. Amantajrí mana imanakuyta atispa, kharkatitisharqa kuraj kamachejpa ñawpaqenpi, qoyaj ñawpaqenpiwan ima. 7 Kuraj kamachej Asuerotaj mikhusharqa, chaymanta manchay phiñasqa sayariytawan, kamachina wasej ukhu huertanman rerqa. Amantajrí kikinpi qhepakorqa, qoya Estermanta mañakuspa ama payta wañuchichinanta. Payqa yachakorqaña imatachus kuraj kamachej payta ruwananta. 8 Amanqa, maypichus Ester winkusharqa, chayman wijch'uykukusqa mañakuspa ama wañuchichinanta. Jinapi kuraj kamachejqa huertamanta kutimorqa, maypichus mikhusharqanku, chayman. Amanta ajinata rikuspataj, kuraj kamachejqa nerqa: Kikin wasiypichu qoyaj honranta t'akayta munanki? nispa. Chayta kuraj kamachej nejtinkamataj, kuraj kamachejpa kamachinkunaqa Amanpa umanta qhataykorqanku, ajinamanta yachayta qospa wañuchisqapuni kananmanta. Chantá, kuraj kamachejpa ujnin kamachin 9 Jarbonaqa kuraj kamachejta nerqa: Amanpa wasinpi runa sipina ruwasqa kashan iskay chunka iskayniyoj metro sayayniyoj. Chayta kay Amán ruwachisqa, qanpaj allin ruwaj Mardoqueota chaypi sipichinanpaj, nispa. Kuraj kamachejtaj chayta uyariytawan, kamacherqa: Chayman Amanta warkhumuychej, nispa. 10 Ajinata Amantaqa Mardoqueopaj ruwachisqan sipinallapitaj siperqanku. Chaywantaj kuraj kamachejpa sonqonqa phiñasqa kasqanmanta tiyaykorqa. |
Revisión Biblia Quechua Boliviano © Sociedad Bíblica Boliviana, 2017.
Bolivian Bible Society