Ester (hebreo) 5 - DIOSPA QHELQACHISQ

Esterqa kuraj kamachejta, Amantawan jatun mikhuyman wajyan

¹ Kinsa p'unchaymantawan Esterqa qoya p'achata churaykukuspa, kamachina wasiman yaykorqa, maypichus kuraj kamachejqa kamachinan tiyanapi tiyasqa kasharqa, chaypa ñawpaqenman. Chay tiyananqa yaykuna punku qhawarisqa karqa.

² Kuraj kamachejtaj qoya Esterta patiopi sayashajta rikuytawan, maytapuni kusikorqa. Chayrayku kuraj kamachej jap'isharqa, chay qorimanta kamachina varanta aysarerqa. Estertaj qayllaykuspa, chay varaj puntanta llankharerqa.

³ Kuraj kamachejtaj taporqa: Imataj tiyan, qoya Ester? Imatataj munankiri? Noqaqa kamachiyniymanta khuskannintapis qoykiman, nispa.

⁴ Estertaj kuraj kamachejman kuticherqa: Kuraj kamachejníy, sichus allin rijch'asunki chayqa, jamunaykita munani qanpaj jatun mikhuyta wakichisqayman Amanwan khuska, nispa.

⁵ Chayta uyarispa, kuraj kamachejqa kamachinkunata nerqa: Amanta usqhayta wajyamuychej, Esterpa nisqan ruwakunanpaj, nispa. Chantá kuraj kamachejwan, Amanwan ima Esterpa jatun mikhuyta wayk'uchisqanman rerqanku.

⁶ Chay mikhuypi mikhushajtinku, kuraj kamachejqa Esterta taporqa: Imatataj mañakuyta munankiri? Noqaqa imatachus mañawasqaykita qosqayki. Munanki chayqa, kamachiyniymanta khuskannintapis qopusqayki, nispa.

⁷ Estertajrí kuticherqa: Noqaj mañakususqayqa kayllamin:

⁸ Sichus qan munakuwanki chayqa, munankitaj imatachus mañakususqayta qowayta chayqa, q'aya ujtawan Amanwan khuska mikhuyta wakichisqayman mikhoj jamullaytaj. Q'ayallaña imatachus tapuwasqaykiman kutichisqayki, nispa.

Amanqa Mardoqueota sipichinanpaj wakichin

⁹ Chaypacha Amanqa may kusisqa, sonqo junt'asqataj chaymanta llojserqa. Chaywanpis kuraj kamachejpa wasin punkupi Mardoqueota mana sayarejta, nitaj kuyurejta rikuspa, maytapuni paypaj phiñarikorqa.

¹⁰ Jinapi manapis phiñakushanmanchu jinalla wasinman riporqa. Chantá Amán wasinman wajyachimorqa kawsaqenkunata, warmin Zerestawan ima.

¹¹ Tantakamojtinkutaj, Amanqa may qhapaj kasqanmanta, chantá ashkha wawayoj kasqanmanta ima mayta parlarqa. Jinallataj imaynatachus kuraj kamachejqa payta jatunchasqanmanta, kurajkunamanta jinallataj kuraj kamachej kamachinkunamantapis aswan pataman churasqanmantawan parlallarqataj.

¹² Chantá Amán nillarqataj: Qoya Esterpis mana pitapis kuraj kamachejwan khuska mikhunapaj wajyarqachu, manachayqa noqallata. Q'ayapajpis kuraj kamachejwan khuska mikhumunaykupaj wajyarisqallataj kani.

¹³ Chaywanpis kay tukuy imaqa mana sonqo junt'asqata ruwawanchu, kuraj kamachejpa kamachinan wasi punkullapipuni Mardoqueo judiota tiyasqata sapa rikojtiy, nispa.

¹⁴ Chantá warmin Zereswan, tukuy kawsaqenkunawan ima nerqanku: Sipinata ruwachiy. Sayaynenqa kachun iskay chunka iskayniyoj metroyoj. Q'aya paqarintaj kuraj kamachejta niy chayman Mardoqueota warkhuchinanta. Ajinata ruwaspa, qanqa kuraj kamachejwan khuska kusisqa mikhoj rinki, nispa. Chay nisqanku Amanpajqa sumaj karqa. Chantá sipinata ruwacherqapacha.