Ester (hebreo) 3 - DIOSPA QHELQACHISQ

Mardoqueowan Amanwan

¹ Chaymanta qhepata kuraj kamachej Asueroqa agagueo miraymanta Hamedataj churin Amanta churarqa kamachina wasipi tukuy kamachejkunamanta kuraj kananpaj.

² Kuraj kamachejpa kamachisqanman jina, kamachina wasi punkupi tukuynin kamachikuna qonqorikuspa, Amanta napaykoj kanku. Mardoqueotajrí mana qonqorikojchu, nitaj kasutapis ruwajchu.

³ Chantá kuraj kamachejpa kamachinkuna Mardoqueota taporqanku: Imajtintaj kuraj kamachejpa kamachisqanta mana kasunkichuri? nispa.

⁴ Chaywanpis sapa kuti ajinata tapojtinku, Mardoqueoqa mana kutichejchu, nitaj kasutapis ruwajchu. Chayrayku Amanman willaykamorqanku, nisqanta junt'anqachus manachus, chayta yachanankupaj, imaraykuchus Mardoqueo nisqaña judío kasqanta.

⁵ Amanqa Mardoqueota ñawpaqenpi mana qonqorikojta, nitaj k'umuykukojta rikuspa, maytapuni phiñarikorqa.

⁶ Amanqa Mardoqueo judío kasqanta yachaspa, mana payllatachu wañuchiyta munarqa, manachayqa kuraj kamachej Asueroj suyunpi tukuy judiokunata wañurachiyta munarqa.

Amanqa judiokunata chinkachiyta munan

⁷ Kuraj kamachej Asuero chunka iskayniyoj watataña kamachishajtin, Nisán nisqa wata qallariy killapi Amanqa suerteta choqacherqa, ajinamanta ajllananpaj uj killata, uj p'unchaytawan chay wakichisqanta ruwananpaj. Suertetaj wata tukukuy, Adar sutiyoj killapaj llojserqa.

⁸ Chantá Amanqa kuraj kamachej Asuerota nerqa: Kuraj kamachejníy, kamachishanki kay suyu ukhupi waj llajtayoj runakuna t'aqa t'aqalla kashanku. Paykunataj kamachisqaykita mana kasukunkuchu. Paykunaj usunkoqa waj jinataj. Chaykunata kawsajta saqespataj, mana imata tarinkichu.

⁹ Chayrayku, kuraj kamachejníy, sichus kay nisusqay allin rijch'asunki chayqa, chay runakuna chinkachisqa kanankuta kamachiy. Noqataj kuraj kamachejpa qolqenta waqaychajkunaman 3.300 carga qolqe metalta jaywasaj, kuraj kamachejpa qolqe jallch'ana cajanman churasqa kananpaj, nispa.

¹⁰ Chantá kuraj kamachejqa anillonta makinmanta orqhokuspa, agagueo miraymanta Hamedataj churin Amanman jaywarqa, pichus judiokunaj awqanku karqa, chayman.

¹¹ Kuraj kamachejtaj payta nerqa: Qowayta munanki, chay qolqeqa qanllapaj kachun. Nishanki, chay runakunawantajrí munasqaykita ruway, nispa.

¹² Chantá wata qallariy killapi chunka kinsayoj kaj p'unchayta, Amanqa kuraj kamachejpa qhelqerinkunata tantacherqa. Paykunaqa sapa suyumanta runakunaj qhelqayninkuman jina, parlayninkuman jinataj qhelqarqanku, Amán imatachus sapa uj kurajkunaman, kuraj kamachejpa kamachinkunaman, sapa llajtapi kamachejkunaman ima kamachisqanta. Chaytataj kuraj kamachejpa sutinpi anillonwan sellaykuspa qhelqarqanku.

¹³ Chay cartakunatataj chaskikuna tukuynejman aparqanku. Chay cartapitaj kamachisharqa tukuy judiokunata wañuchinankuta. Wata tukukuy killapi, chunka kinsayoj p'unchayta, uj p'unchayllapi tukuyninkuta wañurachinanku karqa: Wayna runakunata, machu runakunata, warmikunata, wawakunata ima. Chantá nillarqataj imankuchus kajta jap'ikapunankuta.

¹⁴ Chay kamachisqata sapa llajtapi willachinanku karqa, mayk'ajpajchus orqhosqa karqa, chay p'unchaypaj tukuyninku wakichisqa kanankupaj.

¹⁵ Chantapis chaskikunaqa kuraj kamachejpa kamachisqanman jina tukuy llajtakunaman usqhayta chay cartata apararqanku. Jinallataj kuraj kamachejpa tiyanan Susa llajtapi sut'inchakojtin, llajtayojkunaqa maytapuni qhollpikusharqanku chay imakunata yachaspa. Chaykamataj kuraj kamachejwan, Amanwanqa tiyaykurispa, vinowan ch'allarisharqanku.