Ester (hebreo) 2 - DIOSPA QHELQACHISQ

Esterta qoyapaj ajllanku

¹ Chay qhepata kuraj kamachej Asuero, sonqon tiyaykojtin, Vastimanta yuyarikorqa. Asuero yuyarikullarqataj warminpa mana allinta ruwasqanmanta, chantá paypa contranta kamachiyta orqhosqanmantawan.

² Chantá kuraj kamachejpa yanapajninkuna payta nerqanku: Qanpajqa, kuraj kamachejníy, allinmin kanman qharita mana rejsej k'achita sipaskunata mask'ananku.

³ Chaypajtaj kamachiyniykipi kashan, chay suyukunapi runakunata churay, paykuna chay tukuy llajtamanta k'achita sipaskunata ajllanankupaj. Chantá Susa llajtapi kamachinayki wasiman chay sipaskunata pusamuchunku. Chaypitaj warmikunata qhawaj eunuco Jegay paykunata qhawachun, paykunamantaj k'achanchakunankupaj imakunata jaywachun.

⁴ Chantá mayqen sipaschá kuraj kamachejpa sonqonta suwanqa, chay sipasmin Vastij cuentanmanta qoya kachun, nispa. Chay nisqankutaj kuraj kamachejpajqa allin karqa, kikintataj ruwarqa.

⁵ Chaypacha kuraj kamachejpa tiyakunan Susa llajtapi uj judío karqa, Yairpa churin Mardoqueo sutiyoj. Payqa Cispa mirayninmanta, Simeypa mirayninmanta, Benjamín jatun ayllumanta karqa.

⁶ Babiloniapi kuraj kamachej Nabucodonosorqa Mardoqueota Babiloniaman apachimusqa, Jerusalenmanta presochasqa waj ashkha runakunatawan, chantá Judá suyoj kuraj kamachejnin Jeconiaswan khuskata.

⁷ Mardoqueoqa tionpa ususin Jadasá sutiyojta wawanta jina uywasqa, tatan maman wañupojtinku wajchita kasqanrayku. Chay ch'iriskaj waj sutin karqa Ester, paytaj may k'achita karqa. Payta Mardoqueoqa wawanta jina uywakusqa.

⁸ Maypachachus kuraj kamachejpa kamachinkuna chay kamachisqanta tukuy llajtaman willachimorqanku chaypacha, ashkha sipaskunata Susa llajtapi kuraj kamachejpa wasinman pusamorqanku, chaypitaj Jegayqa sipaskunata qhawasharqa. Chaykama Ester sipasña karqa, jinataj paytapis chayllamantaj pusarqanku.

⁹ Ester k'acha sipas kasqanrayku, Jegayqa allin ñawiwan payta qhawarqa. Chayrayku Jegayqa k'achanchakunapaj jawinata, allin mikhunata ima Esterman qonankuta kamacherqa. Esterpa kamachinkuna kanankupajtaj, kuraj kamachejpa wasinpi kaj qanchis ajllasqa sipaskunata qollarqataj. Chantá Esterta, chay sipaskunatawan kamachina wasipi sumaj cuartoman pusarqa.

¹⁰ Chaywanpis Esterqa mana pimanpis willakorqachu maymantachus kasqanta, nitaj ima ayllumantachus kasqantapis, Mardoqueo ama willakunanta kamachisqanrayku.

¹¹ Jinapi Mardoqueoqa sapa p'unchay ajllasqa warmikunaj wasej pationpa ñawpaqenpi puriykachaj, yachananpaj imaynachus Ester kashasqanta, chantá imaynatachus payta qhawashasqankutawan.

¹² Chay sipaskunaqa chunka iskayniyoj killata k'achanchakunanku karqa, kuraj kamachej Asueroj ñawpaqenman ujmanta uj yaykunankupaj, mit'a chayamunankama. Sojta killa junt'ata, mirra aceitewan tukuy ukhunkuta jawikunanku karqa. Sojta killapitaj waj sumaj q'apashaj jawinawan jawikunanku karqa.

¹³ Chay sipaskunataj ajllasqa warmikunaj wasimanta kuraj kamachejpaman rinankupaj, k'achanchakunankupaj imatachus munasqankuta mañakoj kanku.

¹⁴ Mit'an kashajtinña, chay sipasqa ch'isiyaykuyta kuraj kamachejpa wasinman rej. Q'ayantin paqarintaj kuraj kamachejpa ujnin kaj warminkunaj wasinman kutipoj. Chay warmikunapaj wasitaqa eunuco runa Sasgaz sutiyojqa qhawarqa, kuraj kamachejpa warminkunata qhawaj kasqanrayku. Chantá chay sipasqa kuraj kamachejman ujtawan mana kutillajchu, manachus kuraj kamachejqa sutinmanta wajyachej chayqa.

¹⁵ Mardoqueoj tion Abijailpata ususin Esterman rinan chayamojtin, Esterqa ni imata mañakorqachu apakunanpaj, manachayqa kuraj kamachejpa kamachin warmikunata qhawaj Jegay imatachus apakunanta nerqa, chayllata apakorqa. Esterqa tukuywan mayta munachikusqa.

¹⁶ Chantá Estertaqa kuraj kamachej Asueroj kamachinan wasiman pusarqanku, chunka killa kashajtin, Tebet nisqa killapi, qanchis watataña Asuero kamachishajtin.

¹⁷ Chantá kuraj kamachej Asueroqa Esterta astawan munakorqa tukuynin sipaskunamanta nisqaqa. Ajinamanta, Esterqa kuraj kamachejpa sonqonta suwarqa. Chayrayku kuraj kamachej Asueroqa Esterta pillucherqa, Vastij cuentanmanta qoya kananpaj.

¹⁸ Chaymantá kuraj kamachejqa Esterpa sutinpi jatun mikhuyta wayk'ucherqa, yanapajninkunaman, kamachinkunamanwan mikhuchinanpaj. Jinallataj tukuy suyupi impuestota pisiyachinanta kamacherqa, t'inkatapis tukuy runaman jaywachillarqataj.

¹⁹ Chaypacha ujtawan waj sipaskunapaj ajllasqa wasiman chay sipaskuna tantasqa kashajtinku, Mardoqueoqa kamachina wasi punkupi tiyasharqa.

²⁰ Esterrí Mardoqueoj nisqanman jina, manapuni rimarisqachu may suyumantachus kasqanta, nitaj pi ayllumantachus kasqantapis. Payqa Mardoqueoj nisqallanta kasorqa, imaynachus juch'uy kashaspa kasorqa, jinata.

Mardoqueoqa kuraj kamachejpa contranta oqharikojkunata ch'ataykun

²¹ Chaypacha kuraj kamachejpa kamachinan wasej punkunpi Mardoqueo tiyashajtin, punkuta qhawaj soldadokunata kamachejkuna Bigtanwan, Tereswan ima manchay phiñasqa kuraj kamachej Asuerota wañuchinankupaj wakichikushasqanku.

²² Chayta yachaytawan, Mardoqueoqa qoya Esterman willaykorqa. Estertaj Mardoqueoj sutinpi kuraj kamachejman willaykullarqataj.

²³ Chantá kuraj kamachejqa tapuchisqa ajinapuni kasqanta yachaytawan, chay iskaynin kamachinkunata sipirparicherqa. Chay tukuytaj kuraj kamachejpa ruwasqanmanta willaj qhelqapi qhelqasqa karqa.