Esdras 9 - DIOSPA QHELQACHISQ

Esdras Diosmanta israelitakunapaj mañapun

¹ Chaymanta qhepaman kurajkunaqa qayllaykamuwaspa, niwarqanku: Israelitakuna, sacerdotekuna, levitakuna ima, kay cheqakunapi tiyakoj runakunawan chhapuykukunku, manataj t'aqakunkuchu cananeokunamanta, jititakunamanta, ferezeokunamanta, jebuseokunamanta, amonitakunamanta, moabitakunamanta, Egipto llajtayojkunamanta, amorreokunamanta ima. Chantá kay llajtayojkunaj millay ruwasqankuta ruwallankutaj.

² Jinallataj israelitakunaqa, wawankukunapis kay llajtayojkunaj ususinkukunawan casararqanku. Ajinamanta waj llajtayojkunawan Diospaj t'aqasqa ayllun chhapukunku. Tukuymanta aswan ñawpajtaqa kurajkuna, kamachejkunawan ima chay juchata ruwarqanku, nispa.

³ Chayta uyarejtiy, sonqoy nanawarqa, chayraykutaj p'achayta llik'ikorqani, chujchayta, sunkhaytawan sik'irakorqani, manchay phutisqataj tiyaykukorqani.

⁴ Chaypacha pikunachus Diospa nisqanta manchachikojkunaqa noqaman tantakamorqanku, chaypitaj tukuyniyku mayta llakikorqayku Babiloniamanta kutimojkunaj juchallisqankurayku. Noqatajrí manchay phutisqa tiyaspallapuni karqani, tardenpi Diosman uywa ñak'asqata jaywanakama.

⁵ Chantá phutiyniymanta kutirerqani. Llik'isqa p'achaywantaj qonqoriykukorqani, makiyta oqharispataj, Tata Diosmanta mañakorqani:

⁶ Diosníy, Diosníy. May p'enqasqa kashani, uma muyusqa jinataj. Mana yachanichu imaynatachus qanman qayllaykamusuyta. Pantasqaykoqa may jatunpuni, juchaykutaj janaj pachakama chayan.

⁷ Unaymantapacha kunankamaqa, may millayta juchallispa kawsayku. Chantá sajra kawsayniykurayku noqayku, jinallataj kuraj kamachejniykupis, sacerdoteykukunapis jaywasqa karqayku waj suyumanta kuraj kamachejkunaj makinkuman. Paykunataj wakinta wañuchiwarqayku, presochawarqayku, kapuyniykuta suwawarqayku, p'enqaypi rikhurichiwarqayku ima. Chantá kunankama ajinallapuni kawsashayku.

⁸ Kunantajrí, Tata Diosniyku, khuyakuyniykiman jina munarqanki puchoj israelitakuna kacharichisqa kanaykuta, qanpaj t'aqasqa jallp'api tiyakunaykupaj. Wata runa kanamanta samarichiwayku, sonqoykutapis kawsarichiwayku.

⁹ Wata runakuna kashajtiykupis, mana saqerpariwarqaykuchu. Khuyakuyniykita rikuchiwarqayku Persiamanta kaj kuraj kamachejpa ñawpaqenpi. Qanmin kawsayta qowarqayku, laqaya Temploykita watejmanta ruwanaykupaj. Judapi, jinallataj Jerusalenpipis waqaychawarqayku.

¹⁰ Kunanrí, Diosniyku, imata niyta atiykuman chay jina mana allinkunata ruwasqaykumantari? Kamachisqaykita mana kasorqaykuchu,

¹¹ mayqenkunatachus Diosmanta sut'inchajnejta kamachiwarqayku, chaykunata. Qan kay jinata niwarqaykuña: Mayqen jallp'amanchus tiyakoj yaykunkichej, chaypi kaj runakunaqa sajra kawsayniyoj kanku. Millay ruwasqankuwan kay jallp'aman junt'aykucherqanku.

¹² Chayrayku amapuni ususiykichejta wawankuwan casarachinkichejchu. Paykunaj ususinkutapis amallataj churiykichejwan casarachinkichejchu. Amataj jayk'ajpis mask'ankichejchu chay runakunajpa allin kawsayninkuta, nitaj allinninkutapis munaychejchu. Ajinamanta qankuna sinch'itapuni sayankichej, chay jallp'amanta allin kajninta mikhunkichej, chaymantataj chayaqeta wiñaypaj mirayniykichejman saqenkichej, nispa niwarqayku.

¹³ Kunantajrí mana allinta ruwasqaykurayku, jatun juchaykuraykutaj tukuy kay imakuna chayamuwayku. Chaywanpis qanqa mana millayta ruwasqaykuman jinapunichu jasut'iwarqayku, manachayqa kacharichiwarqaykuraj.

¹⁴ Chantapis, kamachisqaykita p'akillaykumanpunichu, chay millay ruwayniyoj runakunawan aylluchakuspa? Manachu qanqa contraykuta phiñakuwaj, chinkachiwaykumantaj mana ujllapis kawsayniyoj qhepakunaykukama?

¹⁵ Israelpa Tata Diosnin, qan cheqan kanki noqaykuwan. Qan noqaykumanta puchoj t'aqa kawsanaykuta munarqanki, imaynachus kunan p'unchay rikushayku jina. Noqaykoqa cheqamanta ñawpaqeykipi juchayoj kayku. Ajinallapuneqa mana ñawpaqeykipi kayta atiykumanchu.