Esdras 7 - DIOSPA QHELQACHISQ

Artajerjes Esdrasta yanapan Jerusalenman rinanpaj

¹ Chaymanta qhepaman Persiapi kuraj kamachej Artajerjes kamachishajtin, uj runa karqa, Esdras sutiyoj. Payqa Seraiaspa churin karqa. Seraiastaj Azariaspa churin, Azariastaj Hilciaspa churin karqa.

² Hilciasqa Salunpa churin karqa, Saluntaj Sadocpa churin, Sadoctaj Ajitobpa churin.

³ Ajitobqa Amariaspa churin karqa, Amariastaj Azariaspa churin, Azariastaj Merayotpa churin karqa.

⁴ Merayotqa Zeraiaspa churin karqa, Zeraiastaj Uzijpa churin, Uzitaj Buquij churin,

⁵ Buquitaj Abisuajta churin, Abisuataj Finespa churin, Finestaj Eleazarpa churin, Eleazartaj ñawpaj kaj sacerdote Aaronpa churin karqa.

⁶ Esdrasqa Tata Diospa kamachisqanmanta yachachej karqa, paytaj, Israelpa Tata Diosnin ima kamachisqatachus Moisesman qorqa, chaymanta sumajta yacharqa. Tata Dios payta yanapasqanraykutaj, kuraj kamachej Artajerjesqa tukuy ima mañasqanta payman qorqa. Chay jinamanta Esdras Babiloniamanta Jerusalenman jamorqa.

⁷ Paywan ashkha israelitakunapis jamullarqankutaj. Chaykunamanta wakin karqanku sacerdotekuna, wakintaj levitakuna, takejkuna, punkuta qhawajkuna, wakintaj Temploj kamachinpi ruwajkuna. Paykunataj Babiloniamanta puririmorqanku, kuraj kamachej Artajerjes qanchis watataña kamachishajtin.

⁸ Esdrasqa Babiloniamanta Jerusalenman chayamorqa phishqa kaj killa qallariypi, qanchis watataña Artajerjes kamachishajtin.

⁹ Diospa yanapayninwan Esdras, paywan purejkunawan ima Babiloniamanta puririmusqanku ñawpaj kaj killa qallariypi, jinataj Jerusalenman chayamorqanku phishqa kaj killa qallariypi chay kikin watapi.

¹⁰ Tata Diosqa Esdrasta yanaparqa, imaraykuchus Esdrasqa sonqonta churarqa Tata Diospa kamachisqanta sumajta yachaqananpaj, chantá junt'ananpajtaj, jinataj israelitakunaman yachachinanpaj.

¹¹ Ajina Esdras sacerdoteqa sumaj yachayniyoj karqa, Tata Dios imatachus Israelman qorqa, chay tukuy yachachisqakunamanta, kamachisqakunamantawan. Jinapi manaraj Esdras Jerusalenman puririmushajtin, kuraj kamachej Artajerjesqa Esdrasman uj cartata jaywasqa, chay cartataj kay jina karqa:

¹² Noqaqa kamachejkunaj kuraj kamachejnin Artajerjes kani, noqataj kayta qhelqashani janaj pachapi kaj Diospa kamachisqanmanta sumajta yachaj sacerdote Esdrasman. Tukuy sonqo napaykuyki:

¹³ Noqa kamachini: Kamachisqay suyupi kashanku, chay tukuy israelitakunamanta pikunachus qanwan khuska Jerusalenman ripuyta munajkuna rillachunku, chantá sacerdotekunapis, jinallataj levitakunapis.

¹⁴ Noqa Artajerjes, qanchis yuyaychajniykunawan ima qanta kachashasuyku yachamunaykipaj Judapi, jinallataj Jerusalenpipis Diospa kamachisqanta imaynatachus junt'ashasqankuta, imaraykuchus qan chay kamachisqakunata sumajta rejsinki.

¹⁵ Noqa chantá yuyaychajniykuna ima tukuy sonqo qolqe metalta, qoritawan qoyku, chayta Jerusalenpi kaj Israelpa Diosninman apanaykipaj.

¹⁶ Chantapis, tukuynin Babilonia suyumanta qolqeta, qoritawan tantasqaykita apallankitaj, jinallataj imatachus israelitakuna, chantá sacerdotekunapis Jerusalenpi Diosninkoj Templonpaj sonqonkumanta ofrendankuta qorqanku, chaytawan.

¹⁷ Chay qolqewantaj rantinki torillokunata, carnerokunata, corderokunata, trigota, vinotawan ima, Jerusalenpi Diosniykichejpa altarninpi jaywanaykichejpaj.

¹⁸ Chay qolqemanta, qorimantawan puchojwantaj, imachus allin rijch'asunkichej qanman, wawqeykikunamanpis, Diosniykichejpa munayninman jina, chayta ruwaychej.

¹⁹ Qanman jaywarqayku Diosniykichejpa Templonpaj, chay imakunataqa Jerusalenpi Diosniykiman qopunki.

²⁰ Sichus waj imakunatawan Diosniykej Templonpaj apayta munanki chayqa, kuraj kamachejpa jallch'anan wasimanta orqhoyta atinki.

²¹ Noqa, kuraj kamachej Artajerjesqa kaytawan kamachini, Éufrates mayoj chimpanpi kaj tukuynin qolqe waqaychajkunaman: Janaj pachapi Diospa kamachisqanmanta sumajta yachaj Esdras sacerdotemanqa tukuy ima mañasqanta jaywaychejpuni:

²² Payman jaywaychej 3.300 kilo qolqe metalta, 100 carga trigota, 2.200 litro vinota, 2.200 litro aceiteta ima, kachitataj mashkhatachus mañasqanta.

²³ Janaj pachapi kaj Diospa mañasqanta Templonpaj, chay tukuy imata usqhayllata qonkichej, ama Dios phiñakunanpaj wawaykunaj contranpi, chantá kamachiyniypa contranpipis.

²⁴ Yachallaychejtaj impuestota mana orqhona kasqanta sacerdotekunamanta, levitakunamanta, takejkunamanta, punku qhawajkunamanta, yanapajkunamanta, Tata Diospa Templonpi ruwanayojkunamanta ima.

²⁵ Qantaj Esdras, Diosniyki yachayta qosusqanman jina juezkunata churay, kamachejkunatawan, Éufrates mayoj chimpanpi tiyakojkunapaj justiciata ruwanankupaj, pikunachus Diosniykej kamachisqanta yachanku, chaykunapaj. Pikunachus manaraj yachankuchu, chaykunamantaj Diospa kamachisqanta yachachiy.

²⁶ Diosniykej kamachisqanta, chayrí kuraj kamachejpa kamachisqantapis mana junt'ajqa chaypacha juchachasqa kanan tiyan: Wañuchisqa kanqa, chayrí chay jallp'amanta wijch'usqa, chayrí multata paganqa, chayrí carcelman wisq'asqa kanqa nispa.

Esdras Tata Diosta yupaychan

²⁷ Chaypacha Esdrasqa Tata Diosta kay jinata jatuncharqa: Tatanchejpata Tata Diosnin jatunchasqa kachun, pichus churarqa kuraj kamachejpa sonqonpi Jerusalenpi Tata Diospa Templonta jatunchananpaj, chay.

²⁸ Diostaj rikuchiwarqa k'acha kayninta kuraj kamachejpa ñawpaqenpi, umachajninkunaj ñawpaqenkupi, chantá kamachiyninpi kuraj runakunaj ñawpaqenkupi ima. Tata Dios sonqochawarqa, paypa yanapayninwantaj Israelpa kurajninkunata tantaykuyta aterqani, noqawan khuska kutimpunankupaj, nispa.