Efesios 5 - DIOSPA QHELQACHISQ

Diospa wawankuna jina purina

¹ Chayrayku Diospa munasqa wawankuna kaspa, pay jina kanaykichejpaj kallparikuychej.

² Jinallataj ujkunata munakuychej, imaynatachus Cristopis munakuwarqanchej, ajinata. Chayrayku pay kikin noqanchejrayku Diosman jaywaykukorqa ima munay q'aparishaj jaywana jina.

³ Qankuna ukhupirí khuchiriyopi purina ama kachunchu, nillataj millay kawsay, chayrí qolqemanta wañusqa kana ima. Chay jinata juchallispa purinaqa Diospa ayllun ukhupi mana kananchu.

⁴ Amallataj millay ch'ichi kajta parlaychejchu, nitaj wampu thawtiykunata, nillataj millay chansata, imajtinchus chaykunaqa mana pipajpis allinchu. Ajinata parlanaykichejtaqa Diosman pachis niychej.

⁵ Kayta sut'ita yachaychej: Khuchiriyopi purej, millay kajta ruwaj, chayrí qolqemanta wañusqa kajqa mana yaykonqachu Cristojta, Diospatawan kamachiyninman. Qolqemanta wañusqa kajqa lantita yupaychajpis kanman jina, imajtinchus kay pachapi kajta yupaychan.

⁶ Ama piwanpis qhasi manakaj parlasqanwan q'otiyachikuychejchu, imajtinchus chaykunata ruwasqankurayku Diospa k'araj phiñakuynin mana kasukojkunaj patankuman jamun.

⁷ Ama paykunawan chaykunata ruwaspa chajrukuychejchu.

⁸ Ñawpajta qankuna laqhayaypi karqankichej. Kunantajrí Tukuyta Kamachej Jesusman ujchasqa kaspa, k'anchaypi kashankichej. Chayrayku k'anchaymanta kajkuna jina puriychej.

⁹ Ajinata puriychej, imajtinchus qankuna ukhupi kashaj k'anchayqa allin kajta ruwachiwanchej, cheqan ruwaykunata, cheqa kajta ima.

¹⁰ Jinallataj Tukuyta Kamachej Jesuspa sonqonta imachus kusichisqanta allinta reparaychej.

¹¹ Laqhapi kajkunaj qhasi manakaj ruwasqankupirí ama ruwaysikuychejchu. Manachayqa imatachus ruwasqanku millay kasqanta reparachiychej.

¹² Chay millay runakunaj pakaypi ruwasqankumanta parlayllapis ancha p'enqaymin.

¹³ Chaywanpis tukuy ima ruwasqanku k'anchaynejta sut'inchasqa kajtin, imaynachus kasqan sut'i rikukun.

¹⁴ Chayrayku ninku: Puñushasqaykimanta rijch'ariy, wañusqakuna ukhumantataj sayariy, Cristotaj k'anchaykusonqa, nispa.

¹⁵ Chayrayku imaynatachus purishasqaykichejta allinta qhawakuychej. Amaña wampu jinaqa kawsaychejchu, manachayqa yuyayniyojkuna jina.

¹⁶ Allinta ruwanaykichejpaj jina kajtinkama, ruwaychejpacha, imaraykuchus kunan tiempo runaqa millayta ruwanaman qosqa kanku.

¹⁷ Chayrayku ama mana yuyayniyojkuna jina ruwaychejchu, manachayqa Tukuyta Kamachej Jesuspa munasqan imachus kasqanta yachanaykichejpaj atisqaykichejta ruwaychej.

¹⁸ Ama machakuychejchu, imaraykuchus machanaqa mana ruwanata ruwanaman apasunkichejman. Aswanpis Santo Espíritoj kamachiyninpi sapa p'unchay puriychej.

¹⁹ Ujkuna ujkuna kallpachanarikuychej salmokunata, yupaychana takiykunata, chantá Santo Espíritoj yuyaychasqan takiykunata takirispa ima. Tukuy sonqo takispataj, Tukuyta Kamachej Jesusta yupaychaychej.

²⁰ Jinallataj Tukuyta Kamachej Jesucristoj sutinpi tukuy imamanta Tata Diosman pachis niychejpuni.

K'umuykoj sonqowan kasunakuspa kawsakuna

²¹ Qankuna Cristota may jatun respetowan qhawasqaykichejrayku, ujkuna ujkuna k'umuykoj sonqowan kasunakuychej.

²² Qosayoj warmikuna, imaynatachus Tukuyta Kamachej Cristota may jatun respetowan qhawankichej, ajinallatataj sapa ujpis qosaykichejman k'umuykoj sonqo kaychej.

²³ Ajinata ruwaychej, imajtinchus qosaqa warminpa umanmin, imaynachus Cristopis Iglesiaj uman, ajina. Iglesiaqa Cristoj ukhunmin, paytaj qhespichejnin.

²⁴ Imaynatachus Iglesiaqa Cristota may jatun respetowan qhawan, ajinallatataj qosayoj warmikuna, sapa ujpis tukuy imapi qosankuman k'umuykoj sonqo kachunku.

²⁵ Qosakuna, sapa ujpis warmiykichejta munakuychej, imaynatachus Cristo Iglesiata munakuspa payrayku kawsayninta qorqa, ajinata.

²⁶ Chayta Cristo ruwarqa Iglesian juchamanta t'aqasqa llimphu kananpaj, simi nisqanwan mayllaspataj, yakuwan jina llimphucharqa.

²⁷ Ajinata ruwarqa pay kikinman Iglesiata pusananpaj sumaj k'ancharishajta, mana ch'ichiyojta, mana k'usuyojta, nillataj iman imanasqata. Manachayqa juchamanta t'aqasqa kanqa, mana imamanta k'aminataj.

²⁸ Ajinata qosakunapis ukhunkuta jina sapa ujpis warminta munakuchun. Pichus warminta munakojqa pay kikinta munakun.

²⁹ Mana pipis paypa ukhullantatajqa chejninchu. Aswanpis mikhunawan kallpachan, ukhun allin kananmantataj sumajta qhawan. Cristopis kikillantataj Iglesianwan ruwan.

³⁰ Iglesiaqa Cristoj ukhun, noqanchejtaj chay ukhunmanta kanchej.

³¹ Chayrayku qhareqa tatanta, mamantawan saqespa, warminwan ujchakaponqa, iskayninkutaj uj runa jinallaña kanqanku.

³² Kay yachayqa yachay mana atinamin. Noqarí kayta nispa Cristomanta, Iglesiamantawan parlashani.

³³ Chayrayku sapa ujniykichej warmiykichejta munakuychej, imaynatachus qankuna kikiychejta munakunkichej, ajinata. Qankuna warmikunapis qosaykichejta jatun respetowan qhawaychej.