Eclesiastés 8 - DIOSPA QHELQACHISQ

¹ Pitaj yachayniyoj runa jinari? Pitaj imakunapis imatachus niyta munasqanta yachanmanri? Yachayniyoj kayqa runata kusichin. Phiña uyatapis k'achaman tukuchin.

Kuraj kamachejta kasuna

² Kuraj kamachejniykita kasuy, imaraykuchus Diospa sutinrayku kasunaykita tilorqanki.

³ Ama ancha usqhayta kuraj kamachejpa ñawpaqenmanta llojsiychu. Amataj mana allin kajta ruwanaman chhapukuychu, imaraykuchus kuraj kamachejqa imatachá munasqanta ruwanqa.

⁴ Kuraj kamachejpa kamachisqanqa kasunapajpuni, manataj pipis payta niyta atinchu: Imatá kayta ruwankiri? nispa.

⁵ Pichus kamachisqata kasukojqa mana ima llakiytapis rikonqachu. Yachayniyoj runaqa allinta yachan mayk'ajchus, imaynatatajchus junt'ananta.

⁶ Imatapis imaynatachus, chantá mayk'ajchus ruwanapaj tiempo tiyan. Chaywanpis runaj jatun llakiynenqa

⁷ qhepanejman imachus kanamanta mana yachasqan, manataj pipis imachus kananmanta willaykurej kanchu.

Kawsayqa yachay mana atina

⁸ Mana pipis kawsayninmanta dueñochu jark'ayta atinanpaj, nitaj pipis mayk'ajchus wañunanta niyta atinmanchu. Wañuywan kawsaywanqa maqanakupi kanku. Chayrayku ni pi kacharichikuyta atinmanchu, ni millayta ruwaspa kawsajkunapis.

⁹ Kay pachapi runakunaj tukuy ima ruwasqankuta waturispa, unancharqani: Runaqa runa masinta ñak'arichinanpaj atiyniyoj.

¹⁰ Jinallataj millayta purej runa wañupojtin, sumajta p'ampashajta rikorqani. Allinta ruwaj runa wañupojtinrí, kikin llajtanpi ni pipis yuyarikullankupischu. Chaypis qhasi manakajlla kasqanta rikorqani.

¹¹ Millayta purej runata mana usqhayta jasut'ejtinkoqa, astawan millayta ruwanaman qokun.

¹² Juchasapaqa pachaj kutita juchallikuspapis, unayta kawsan. Jinapis yachallarqanitaj, pikunachus Diosta may jatun respetowan qhawaspa kawsakunku, chaykunata allinpuni rinanta.

¹³ Millayta ruwajkunatarí mana allin rinanta nitaj unayta kawsanankuta yacharqani. Diosta mana jatun respetowan qhawasqankurayku, kawsayninku llanthu jinalla chinkarinanta yachallarqanitaj.

¹⁴ Kay pachapi yanqha manakaj imakuna kallantaj: Allinta ruwaj runata manapis cheqantachu ruwanman jina mana allinchu rin. Mana allinta ruwaj runatarí, cheqantapis ruwanman jina allin rin. Chaymantapis noqa nini qhasi manakajlla kasqanta.

¹⁵ Chayrayku noqa nini: Kusikuna aswan sumajmin, nispa. Runaqa kayta ruwaspa allinta ruwanqa, mikhunan, ujyanan, kusikunan ima, imaraykuchus runaqa chayllata tukuy ruwasqanmanta tarenqa, kay pachapi Dios kawsayta qonankama.

¹⁶ Kay pachapi imatachus runakuna ruwasqankuta yachayta munarqani, jinallataj yachayniyoj kay imachus kasqanta yachayta munallarqanitaj. Chay tukuy imapi tuta p'unchay yuyasqayrayku, mana puñuyta aterqanichu.

¹⁷ Ajinapi Diospa tukuy ima ruwasqanta rikuni. Jinallataj runa kay pachapi Diospa tukuy ruwasqanta mana yachayta atisqanta rikullanitaj. May jinata mask'ashaspapis, runaqa manapuni watuyta atinchu. Yachayniyoj runa: Yachaniña, nispa nichunpis, chaywanpis manapuni yachayta atenqachu.