Eclesiastés 7 - DIOSPA QHELQACHISQ

Allin kajllata qhawarina

¹ Sumaj runapaj rejsisqa kayqa astawan allin sumaj q'apashaj jawinamanta nisqaqa. Wañupuna p'unchay astawan allin paqarina p'unchaymanta nisqaqa.

² Wañuy wasiman rina aswan allin raymi wasiman rinamanta nisqaqa, imaraykuchus tukuy runaj tukukuyninchejqa wañuymin. Kawsashajkunaqa chayta yuyarikunanchej tiyan.

³ Astawan allinmin waqana asinamanta nisqaqa. Llakiy uyata ruwan chaypis, llakeyqa sonqopaj allin.

⁴ Yachayniyojqa uj p'unchay wañupunanpi yuyan. Wampu runarí kusikuyllapi yuyan.

⁵ Aswan allinmin yachayniyoj runaj k'amisqanta uyareyqa wampu runaj takisqanta uyarinamanta nisqaqa.

⁶ Wampu runaj asisqanqa q'oncha ukhupi t'una khishka t'ojyarasqanman rijch'akun. Chaypis qhasi manakajlla kasqanta repararqani.

⁷ Kallpaman atinikuspa sajrata ruwanaqa yachayniyojta wampuyachin. Lluk'inataj runaj sonqonta mana allinman tijrachin.

⁸ Imatapis tukuychanaqa astawan allin qallarinamanta nisqaqa. Pacienciayoj kayqa aswan allin machu machu kanamanta nisqaqa.

⁹ Ama imamantapis usqhayllata phiñakuychu, imaraykuchus phiñakoyqa wampu runakunallapaj allin.

¹⁰ Ama jayk'ajpis tapukuychu: Imaraykutaj ñawpa tiempo kunanmanta nisqa astawan allin karqari? nispa. Chay jina tapukoyqa mana yachayniyojpatachu.

¹¹ Yachayniyoj kayqa uj chayaqe jina, manchay sumajpuni kay pachapi tiyakoj runapaj.

¹² Yachaywan, qolqewan, kay pachapi kawsajkunata yanapawanchej. Yachayrí astawan allinraj, imaraykuchus yachayniyojkunaman kawsayta qon.

¹³ Diospa ruwasqanta allinta qhawariy: Diospa q'ewisqanta pitaj cheqanyachinmanri?

¹⁴ Allin risojtenqa, kusikuy. Mana allin risojtinrí, sumajta unanchakuy, imajtinchus allinpi kayta, mana allinpi kaytapis Diospuni qon. Chayrayku runaqa imachus qhepaman jamunanta mana yachayta atinchu.

¹⁵ Tukuy kayta qhasi manakaj kawsayniypi rikuni: Allin kajta ruwaj runakuna, k'acha kashaspapis, wañupunku. Millay runakunatajrí chay jina millayta ruwashaspapis, unaytaraj kawsanku.

¹⁶ Ajinaqa, ama ancha cheqan kaychu, nitaj ancha yachayniyojpis. Imapajtaj qhasita llakiyta mask'akuwajri?

¹⁷ Amallataj ancha millay runa kaychu, nillataj wampupis. Imapajtaj manaraj wañunaykipi wañuwajri?

¹⁸ Chay yuyaychaykunata allinta uyariy, amataj chaymanta kacharikuychu, imaraykuchus Diosta may jatun respetowan qhawajtaqa tukuy imapi allin renqa.

¹⁹ Yachayqa yachayniyoj runata mayta kallpachan uj llajtapi chunka kallpayoj runakunamanta astawanraj.

²⁰ Cheqapuni kay pachapi mana uj runallapis cheqan runaqa kanchu, mana jayk'aj juchallikuspa cheqanta ruwajqa.

²¹ Runakuna imatapis parlajtinku, ama tukuy nisqankuta kasuta ruwaychu. Ajinamanta contraykita kamachiykej parlasqantapis mana uyarinkichu.

²² Qanpis sonqoykipi allinta yachakunki, mashkha kutitachus runa masiykikunaj contranta parlasqaykita.

Yachayniyoj kanata mask'ana

²³ Kay tukuy imata noqa yachaywan qhawarqani: Yachayniyoj kasaj, nispa. Chaywanpis yachayta mana taripayta aterqanichu.

²⁴ Yachayniyoj kayqa ancha karupi kashan, ancha jatuntaj. Pitaj taripayta atinmanri?

²⁵ Ajinaqa yachayniyoj kayta munaspa, thawispa yachayta mask'arqani, imaynachus imakunaj kasqantapis watorqani. Ajinata ruwaspa, wampu kayqa mana allinchu kasqanta yacharqani, pantakuytaj pawisqa kay jina kasqanta.

²⁶ Noqa wañuymantapis imachus astawan mana allin kasqanta tarini: Chayqa sajra purikoj warmimin. Sonqonqa uj tojlla jina, makinkunataj cadena jina mana qharita kacharinchu. Diosta kasoj runaqa chay jina warmimanta ayqekonqa. Juchasapa runarí chay warmej tojllanpi urmanqa.

²⁷ Noqa, pichus kayta qhelqaj Yachachejqa nini: Kay imakunata ujmanta uj allinta watorqani.

²⁸ Chaywanpis imatachus mask'asqayta manarajpuni tarinichu. Astawanqa kayta tarini: Waranqa qharikunamanta uj k'ata cheqan runallata tarini. Warmikuna ukhumantarí mana uj allin warmillatapis tarinichu.

²⁹ Kayllata tarini: Diosqa runata cheqanta ruwarqa, chaywanpis runaqa ashkha mana allin imakunata mask'akun, nispa.