Eclesiastés 6 - DIOSPA QHELQACHISQ

¹ Kay pachapi kaytawan mana allin kasqanta rikullanitaj, chaytaj tukuy runata llakichin:

² Diosqa qhapajyachispa, runaman tukuy imata qon, allinpaj qhawasqa kayta, imatachus munasqanta ima. Chaywanpis Dios mana chay runata imatachus tarisqanwan kusikunanta saqenchu, manachayqa wajkunaraj imatachus tarisqanmanta kawsanku. Chayqa jatun llakiy, qhasi manakajllataj kasqanta repararqani.

³ Runaqa pachaj wawayojpis kachun, chayrí unaytapis kawsachun. Chaywanpis sichus allin kajta tarisqanwan mana sonqo junt'asqachu karqa, nitaj allin p'ampasqachu karqa chayqa, noqa nini uj sullusqa wawaraj chay runamanta nisqaqa aswan allin kasqanta.

⁴ Sullusqa wawaqa yanqhata paqarin, laqhayaymantaj ripun, jinataj sutin laqhayaypi p'ampasqa kashan.

⁵ Payqa mana intita rikunchu, nitaj imatapis rejsinchu. Chaywanpis payqa chay runamanta nisqaqa astawan misk'itaraj samarikonqa.

⁶ Ichá pipis 2.000 watata kawsayta atinman, chaywanpis tiyapuyninmanta mana kusikunmanchu. Chaywanpis manachu tukuypis uj cheqallaman rinku?

⁷ Runaj tukuy llank'asqanqa mikhunallanpaj. Chaywanpis manapuni sajsakuyta atinchu.

⁸ Imapitaj yachayniyoj kay astawan walej kanman wampu kanamanta nisqari? Wajcha runapajqa llakiyninmanta llojsinan astawan sumaj.

⁹ Imachus runaj makinpiña kashan, chayqa aswan allin, imatachus munapayaspalla mana tariyta atinchu, chaymanta nisqaqa. Chaypis qhasi manakajlla, wayra jap'iyta munay jinalla kasqanta repararqani.

¹⁰ Kunan imachus kajqa ñawpajtaña sutichasqa karqa, runa imaynachus kanantaj ña yachasqaña karqa. Chayrayku paymanta aswan atiyniyoj Dioswanqa mana pipis churanakuyta atinmanchu.

¹¹ Anchata parlaspaqa, qhasi manakaj thawtinallata parlasunman, manataj imapajpis allinchu.

¹² Cheqapuni mana pipis yachanchu paypaj imachus astawan allin kananta, imaraykuchus chay tukuy qhasi manakaj ruwasqanqa llanthu jinalla chinkarin. Wañupusqanmanta qhepaman, imachus kay pachapi kananta, pitaj runaman willanqari?