Eclesiastés 2 - DIOSPA QHELQACHISQ

¹ Chantá sonqoypi nerqani: Imaynachus kusikuy kasqanta yachanaypaj kunan munasqayta ruwasaj, chantapis mayta kusikusaj, nispa. Chaypis qhasi manakajlla karqa.

² Chaypacha nerqani: Kusikoyqa t'ojpirasqa kaywan ninakun. Sonqota kusichiyta munaspa munasqanta ruwaypis qhasi manakajllataj, nispa.

³ Yuyayniypi nillarqanitaj: Sonqoyta vinowan kusirichisaj, mana yuyayniyta chinkachispalla. Yachayniyoj kayta mask'aj jinataj, wampu kaymanta ch'ipakusaj. Ajinamanta yachasaj, runa kay pachapi pisi kawsayninpi kusiy tarisqan imaynachus kasqanta, nispa.

⁴ Jinallataj noqaqa jatuchaj imakunata ruwarqani: Sumaj wasikunata ruwachikorqani. Uva huertakunata mallkicherqani.

⁵ Chajratawan, huertatawan ima tarpucherqani, chaykunamantaj imaymana poqoj sach'akunata churacherqani.

⁶ Jinallataj yaku qochakunata allacherqani, chaywan tukuy tarpusqayta qarpanapaj.

⁷ Qharikunata, warmikunatawan ima wata runapaj rantikorqani, wakin wata runaykunataj wasiypi paqarikorqanku. Jinallataj ashkha waka, ashkha oveja ima tiyapullawarqataj. Noqamanta ñawpajta Jerusalenpi kajkunajmanta nisqa astawan ashkha tiyapuwarqa.

⁸ Chantaqa ashkha qolqetapis, qoritapis tantallarqanitaj. Chaykunaqa kuraj kamachejkunajta suyunkupi tiyapuyninku karqa. Takejkuna tiyapullawarqataj, tukuy imachus runaj sonqonta kusichin, chaykunapis. Warmikunapis mana yupay atina tiyapullawarqataj.

⁹ Ajinamanta noqaqa manchay uyarisqa runa karqani, Jerusalenpi noqamanta ñawpajta kamachejkunamanta nisqaqa. Chaywanpis yachayniyojllapuni karqani.

¹⁰ Tukuy ima munasqayta ruwaspa, chay ruwasqaywan sonqoyta kusicherqani. Tukuy llank'asqaypi mayta kusikorqani, chay kusikuytaj llank'asqaymanta t'inkay karqa.

¹¹ Chantaqa tukuy ima ruwasqayta watorqani, sinch'ita llank'aspa imakunatachus ruwasqayta. Chantá tukuy ima qhasi manakajlla kasqanta repararqani, wayra jap'iyta munay jinalla kasqanta. Kay pachapi mana imatapis sonqoy junt'asqa kananpaj tarerqanichu.

¹² Chaymantaqa ujtawan yachaymanta, pawisqa kaymanta, wampu kaymantawan unancharqani. Imatañataj qhepayta yaykoj kuraj kamachej ruwanmanri? Manaña imatapis, imachus ruwasqaña karqa, chayllataña ruwanqa.

¹³ Noqataj repararqani, yachayniyoj kayqa mana yuyayniyoj kaymanta astawan allin kasqanta, imaynachus k'anchayqa laqhayaymanta aswan allin, ajinata.

¹⁴ Yachayniyoj runaqa maymanchus rishasqanta yachan, wampu runarí laqhallapi purin. Chaywanpis reparallarqanitaj, kawsayninchej tukukapojtenqa, tukuypis wañupunanchejta.

¹⁵ Chaymanta sonqoypi nerqani: Imachus wampu runata qhatirin, chayllataj noqatapis qhatiriwanqa. Jina kajtenqa, ima allintaj yachayniyoj kasqayri? Chaypis qhasi manakajllataj kasqa, nispa.

¹⁶ Nitaj yachayniyojmanta, nillataj wampumantapis ni pi yuyarikonqañachu. Qhepanejman tukuy ima qonqasqa kanqa. Wampu runa, yachayniyojpis wañullanqataj.

¹⁷ Chayrayku, kay pachapi kawsayta chejnerqani, ruwasqaytaj noqapaj llasa karqa. Tukuy ima qhasi manakajlla, wayra jap'iyta munay jinalla kasqanta repararqani.

¹⁸ Jinallataj kay pachapi mayta sayk'uspa, tukuy ima ruwasqayta chejnerqani, imaraykuchus chay tukuyta qhepata jamojman saqenay kanqa.

¹⁹ Pitaj yachan qhepayta jamoj yachayniyojchus, chayrí wampuchus kanantari? Imatachus noqa kay pachapi mayta sayk'uspa, may yachayniywan ruwaspa tarisqayta, pay jap'enqa. Chaypis qhasi manakajlla kasqanta repararqani.

²⁰ Kay pachapi tukuy ima ruwasqayta qhawaspa, sonqoy p'akikorqa.

²¹ Runaqa chay jina yachaywan, sumaj yuyaywan, sumajta qhawaspa llank'an. Chaywanpis tukuy imatachus tarisqanta ni imatapis ruwajman saqenqa. Chaypis qhasi manakajlla kasqanta repararqani, jatun llakiytaj.

²² Chayrayku imatataj runa tarin chay jinatapuni kay pachapi llank'asqanmanta, phutikusqanmantawan imari?

²³ Tukuy kawsayninpi llakiyllapuni tiyan, ima ruwasqanpis phutiylla. Tutantin yuyaynenqa mana samarinchu. Chaypis qhasi manakajlla kasqanta repararqani.

²⁴ Runapajqa aswan allin mikhunan, ujyanan, ruwaspa imatachus tarisqanmanta kusikunan ima. Noqataj repararqani chay tukuy imaqa Diospa qosqan kasqanta.

²⁵ Mana Dioswan, pitaj kusiywan mikhunmanri? Pitaj sonqo junt'asqa kanmanri?

²⁶ Diosqa pichus payta kusichejman jatun yachayta, yuyayniyoj kayta, jinallataj kusikuytawan qon. Jinataj Diosqa saqellan juchasapa runa tukuy imata tantananta, qhapajyanantapis, pichus Diosta kusichejman qonanpaj. Chaypis qhasi manakajlla, wayra jap'iyta munay jinalla kasqanta repararqani.