Eclesiastés 12 - DIOSPA QHELQACHISQ

¹ Waynapis, sipaspis kashaspa, pichus ruwasoj Diosniykimanta yuyarikuy. Manaraj mana allin p'unchaykuna chayamushajtin, chay watakunapitaj qan niwaj: Kay kawsayqa mana kusikunaypaj jinachu, nispa.

² Chayrayku paymanta yuyarikuypuni, manaraj intej k'anchaynin chinkapushajtin, niraj killajta, ch'askakunajtapis k'anchaynin chinkapushajtin. Parajtinkamapis phuyu kashajtillanraj Diosmanta yuyarikuypuni.

³ Uj p'unchay chayamonqa, chaypachataj chakiykeqa wasita qhawajkuna jina kharkatitenqanku. Lijraykipis kallpayojkuna jina k'umpuykaponqanku. Kiruykikunapis muthu molino jina manaña kutanqankuchu. Ñawiykikunaqa wasi jusk'umanta qhawajkuna jina ayphullata rikonqanku.

⁴ Diosmanta yuyarikuy imatapis ruwanapaj jina manaraj tukukushajtin. Chaypacha molinoj kutasqanta uyarinapis pisiyaponqa, p'isqokunaj takisqankutapis manaña uyarinkichu.

⁵ Diosmanta yuyarikuy wichayman rinapis manaraj mancharikuna kashajtin, ñanta purinapis manaraj manchay manchachikuna kashajtin. Chaypacha chujchayki almendro t'ika jina yurajyanqa. Kallpaykipis pisiyajtin, wañuy patapi kashaj phinki phinki jina ñak'ayllataña purinki. Jinallataj warmi munayniykipis chinkaponqa. Diosmanta yuyarikuy manaraj runaj wiñaypaj tiyananman ripushajtiyki. Chaypacha p'ampakuman rejkuna qanmanta waqanqanku.

⁶ Yuyarikuy Ruwasojniykimanta, manaraj qolqemanta cadena p'itikushajtin, manaraj qorimanta mankapis p'akikushajtin. Paymanta yuyarikuy, manaraj yaku yurupis yaku patapi p'akikushajtin, manaraj yaku aysana waskhapis p'itikushajtin.

⁷ Chay p'unchay jallp'aqa jallp'allamantaj kutenqa, ñawpajta karqa, chayllamantaj. Qanman kawsay qosqa karqa, chaytaj Diosman kutiponqa.

⁸ Kaytaqa noqa Yachachej kaj nini: Qhasi manakaj, qhasi manakajlla, kay pachapi tukuy imapis qhasi manakajlla, nispa.

Runajta imachus ruwanan

⁹ Noqa Yachachej astawan yachayniyoj kasqayman jina, imatachus yachasqayta runakunaman yachacherqani. Tukuy imata allinta yachaqarqani, sumajtataj unancharqani, chantá yachaywan ashkha nisqakunata wakicherqani.

¹⁰ Noqa yachachejqa sumaj k'acha simikunata mask'arqani, chantá mana pantarispa cheqanta qhelqarqani.

¹¹ Yachayniyojkunaj nisqankoqa ayjon jina kanku. Tantasqa nisqankutaj Diosmanta jamun, chayrayku toldota sayachinapaj sumaj estaca jina kanku.

¹² Kunanqa wawáy, kay yuyaychasqaytawan jap'ikuy: P'anqakunata qhelqanaqa mana jayk'ajpis tukukunmanchu. Anchata yachayta munanataj sayk'uchikun.

¹³ Chay tukuy imaj tukukuynenqa kaymin: Diosta may jatun respetowan qhaway, kamachisqantataj junt'ay. Chayllata runaqa ruwanan tiyan.

¹⁴ Diosqa tukuy ima ruwasqanchejmanta cuentata mañawasunchej. Jinallataj pakasqa kajmanta, sut'ipi kajmanta, allin kajmanta, mana allin kajmantapis watuwasunchej.