Eclesiastés 11 - DIOSPA QHELQACHISQ

¹ Mana mikhunayojman mikhunata qoriy, uj p'unchaytaj qorisqaykimanta jap'ikapunki.

² Tiyapususqanmanta atisqaykiman jina wajkunaman qoriy, imaraykuchus mana yachankichu ima mana allinchus qhepaman jamunanta.

³ Sichus phuyu yanayarin chayqa, paranqapuni. Sach'a wichaynejman, manachayrí uranejman urman chayqa, pachanpi qhepakapun.

⁴ Tarpuyta munaspaqa, ama wayrallata qhawaychu, chajrata oqharispataj, ama phuyuta qhawaychu.

⁵ Qanqa mana yachankichu maynintachus wayra risqanta. Nillataj yachankichu imaynatachus uj warmej wijsanpi wawa wiñasqanta. Jinallataj Dios imatachus ruwasqantapis mana yachankichu.

⁶ Tutamanta tarpuy, ch'isiyaykuytapis tarpullaytaj, imaraykuchus mayqen tarpusqaykichus astawan allin kananta mana yachankichu, chayrí iskayninchus allin kananta.

⁷ Cheqapuni k'anchayta rikunaqa sumajpuni, intej k'anchayninta rikunapis sumajllataj.

⁸ Runaqa unaytapis kawsachun, kawsanankama may jinatapis kusikuchun, mana allin p'unchaykuna chayamunanta yuyarinan tiyan. Chay tukuy ima qhepanejman imachus jamojqa, chaykunapis qhasi manakajlla.

Waynakunapaj, sipaskunapaj yuyaychaykuna

⁹ Waynapis, sipaspis kashaspa kusikuy, imachus allin kajwan kusikullaytaj. Sonqoykej munasqanpi, ñawiykej rikusqanpi ima puriy. Chaywanpis yachay tukuy chaykunamanta Dios cuentata mañasunanta.

¹⁰ Sonqoykimanta phiñakuyta wijch'uy, jinataj tukuy mana allin kajta ruwanata karunchay, imaraykuchus waynataj, sipastaj kayqa qhasi manakajlla.