Eclesiastés 1 - DIOSPA QHELQACHISQ

Tukuy imapis qhasi manakajlla

¹ Kay nisqakunaqa Yachachejpata, Davidpa churin Jerusalenpi kaj kuraj kamachejpata kashan. Paytaj ajinata nin:

² Qhasi manakajlla, qhasi manakajlla, tukuy imapis qhasi manakaj, nispa.

³ Imatataj runa tarin chay jina sinch'ita kay pachapi llank'asqanmantari?

⁴ Wakinkunaqa paqarishanku, wakintaj wañushanku, kay pachatajrí kikillanpuni kashan.

⁵ Inteqa ujnejmanta llojsimun, ujnejmantaj chinkaykun. Chantaqa usqhayllata kutiripun ujtawan llojsimunanpaj.

⁶ Wayraqa uranejman rin, wichaynejtataj muyuykamun. Muyurispa, muyurispa wayraqa kutin kutinta muyuykamullantaj.

⁷ Tukuy mayukuna mama qochaman rinku. Chaywanpis mama qochaman yaku mana junt'anchu. Maymantachus mayukuna qallarinku, chayllamantaj kutirinku watej jamunankupaj.

⁸ Tukuy imapis sayk'uchikullan. Chaytaqa mana pipis sut'inchayta atinchu. Ñaweqa rikuspa, mana sajsakunchu, nitaj ninripis uyarispa, sayk'unchu.

⁹ Imachus ñawpajta karqa, chayllataj kanqa. Imachus ñawpajta ruwasqaña karqa, chayllataj ruwasqa kanqa. Mana ima mosoj ruwaypis kay pachapi kanchu.

¹⁰ Imallapis kanmanchu ninapaj: Kayqa mosoj, nispa? Chaypis unay karqañapuni. Manaraj noqanchej kashajtinchej, karqaña.

¹¹ Imachus ñawpajta karqa chaykunaqa, qonqasqaña kanku. Jinallataj qhepanejman kajkunaj imachus ruwasqankupis manallataj yuyarisqachu kanqanku.

Yachachejpa rikusqan

¹² Noqa Yachachejqa Jerusalenpi Israelpa kuraj kamachejnin karqani.

¹³ Chantá tukuy sonqoywan, tukuy yachaywantaj mask'aspa, kay pachapi tukuy ima ruwakusqanmanta yachayta munarqani. Kay sinch'i ruwanata Dios runaman qorqa, chayta ruwaspapuni kawsananchejpaj.

¹⁴ Kay pachapi tukuy imaymana runaj ruwasqanta qhawaspa, qhasi manakajlla, wayra jap'iyta munay jinalla kasqanta repararqani.

¹⁵ Imachus wist'u kajqa manaña cheqanchakuyta atinchu. Manakajta manaña yupana atikunchu.

¹⁶ Chantá noqa sonqoypi nerqani: Noqa manchay uyarisqa runaman tukorqani. Jerusalenpi noqamanta ñawpajta tukuy kamachejkunamanta nisqaqa, noqa astawan yachayniyoj kani, nispa.

¹⁷ Chayrayku noqaqa tukuy sonqoywan imachus jatun yachay kasqanta yachaqaj churakorqani, jinallataj imachus pawisqa kay, wampu kaywan kasqantapis. Chantá tukuy chayta yachana, wayra jap'iyta munana jinalla kasqanta repararqani.

¹⁸ Ashkhata yachanaqa uma nanayllata apamun. Astawan yachaspaqa, astawan llakiyllata tarikunchej.