Deuteronomio 9 - DIOSPA QHELQACHISQ

Tata Dios ayllunta yanapananta nin

¹ Israelitakuna, uyariychej: Kunan Jordán mayuta chimpankichej, qankunamanta aswan atiyniyoj ashkha runata jallp'ankumanta qharqonaykichejpaj, chantá sumaj perqawan muyuykuchisqa llajtankukunatapis jap'inaykichejpaj ima.

² Chaypi tiyakojkunaqa Anacpata miraynin jatunkaray runakuna kanku. Chaykunamanta parlajta uyarinkichej: Pitaj Anacpa mirayninmanta jatunkaray runakunaman sayaykuyta atinmanri? nispa.

³ Chaywanpis qankuna yachankichej Tata Diosniykichejqa qankunaj ñawpaqeykichejta rinanta. Payqa ruphaj nina jina ñawpaqeykichejpi chay suyukunapi tiyakojkunata k'umuykuchispa, chinkachenqa. Qankunaqa Tata Dios kamachisusqaykichejman jina, paykunata wijch'unkichej, chantá uj ñawi ch'irmiyllapi tukuchinkichej.

⁴ Maypachachus Tata Diosniykichej ñawpaqeykichejmanta paykunata qharqonqa chaypacha, ama sonqoykichejpi ninkichejchu: Noqanchej allinta ruwasqanchejrayku Tata Dios kay jallp'ata qowanchej, nispa. Chayqa mana jinachu. Tata Diosqa chay runakunata millayta ruwaspa purisqankumanta wijch'onqa.

⁵ Mana sumaj runa kasqaykichejraykuchu, nitaj cheqan kajta ruwasqaykichejraykuchu paykunaj jallp'ankuta jap'inkichej. Tata Dios ñawpaqeykichejmanta paykunata qharqonqa millayta ruwaspa kawsasqankurayku. Chantá ñawpa tataykichej Abrahamman, Isaacman, Jacobman ima nisqanta junt'anqa.

⁶ Kayta sut'ita yachaychej: Manamin qankuna allinta ruwasqaykichejraykuchu chay sumaj jallp'ata jap'inaykichejpaj Tata Diosniykichej qoshasunkichej. Chayta niykichej imaraykuchus qankunaqa mana uyarikuyta munajkuna kankichej.

Horeb orqopi israelitakuna Diospa contranta oqharikunku

⁷ Qankunaqa yuyarikuychejpuni imaynatachus Tata Diosniykichejta ch'innejpi phiñachisqaykichejta. Qankunaqa Egiptomanta llojsimusqaykichejmantapacha kay jallp'aman chayamunaykichejkama, Tata Diospa contranta oqharikullarqankichejpuni.

⁸ Horeb orqopipis Tata Diosta phiñachillarqankichejtaj. Payqa qankunapaj k'arajta phiñakuspa, tukuchisunaykichejpajña kasharqa.

⁹ Noqa chay orqoman iskay p'alta rumipi qhelqasqa kamachisqakunata Tata Diosmanta jap'ej wicharerqani, qankunawan Tata Dios tratota ruwarqa, chaykunata. Chaypitaj mana mikhuspa, nitaj imatapis ujyaspa, tawa chunka p'unchayta, tawa chunka tutatawan qhepakorqani.

¹⁰ Chaypi Tata Diosqa ruk'ananwan qhelqasqan iskay p'alta rumita qowarqa. Chay qhelqapi qhelqasqa karqa, Horeb orqopi tantasqa kashajtinchej nina chawpimanta imatachus parlamusorqachej, chay.

¹¹ Tawa chunka p'unchay, tawa chunka tuta pasajtintaj, chay iskay p'alta rumipi trato ruwasqa qhelqasqata Tata Dios jaywawarqa.

¹² Chantá niwarqa: Kunanpacha kaymanta urayk'uy, imaraykuchus Egiptomanta orqhomusqayki runakunaqa manakajta ruwashanku. Noqaj kamachisqayta manaraj imapi qonqaspa, qorimanta uj lantita ruwakunku, nispa.

¹³ Tata Dios nillawarqataj: Noqa yachaniña kay runakuna mana kasukuyta munaj, k'ullu kasqankuta.

¹⁴ Kunanqa ama jark'akuwaychu kay runakunata wañuchispa, sutinkuta kay pachamanta chinkachinayta. Qanpa mirayniykimantarí ashkha runayoj jatun suyuta ruwasaj, israelitakunamanta aswan ashkhata, aswan kallpayojtataj, nispa.

¹⁵ Chay orqomanta urayk'amushaspa, makiypi chay trato ruwasqa qhelqasqata apamusharqani, chay orqopitaj nina lawrashallarqapuni.

¹⁶ Chantá qankuna Tata Diosniykichejpa contranta juchallikusqaykichejta rikorqani. Qankunaqa Tata Diospa kamachisqanta manaraj imapi qonqaspa, qorimanta uj waka uña lantita ruwakusqankichej.

¹⁷ Noqa chayta rikuspa, chay iskay p'alta rumita jap'isharqani, chayta qankuna rikushajtiykichej pampaman choqaspa, p'akerqani.

¹⁸ Chaymantataj Tata Diospa ñawpaqenman pampakama k'umuykukorqani. Chantá ñawpajta jina, tawa chunka p'unchayta, tawa chunka tutatawan mana mikhuspa, nitaj imatapis ujyaspa karqani. Qankuna chay jinata Tata Diospa contranta juchallispa phiñachisqaykichejmanta chayta ruwarqani.

¹⁹ Tata Dios contraykichejta phiñakuspa, qankunata ujllapi chinkachiyta munasqanta rikuspa, noqa maytapuni mancharikorqani. Chaywanpis Tata Diosqa uj kutitawan mañakusqayta uyariwarqa.

²⁰ Jinallataj Tata Diosqa Aaronpaj mayta phiñakuspa, payta chinkachiyta munallarqataj. Noqatajrí chaypacha Aaronrayku Tata Diosmanta mañapullarqanitaj.

²¹ Chaymantataj noqaqa juchallinaykichejpaj waka uña lantita ruwasqaykichejta jap'ispa, ninaman wijch'uykorqani. Ñut'uta kutaspataj, orqomanta urayk'amushaj mayuman qhalliykorqani.

²² Jinallataj qankunaqa Taberapi, Masahpi, Quibrot Hatavapi ima Tata Diosta phiñachillarqankichejtaj.

²³ Qankuna Cadés Barneapi kashajtiykichej, Tata Diosqa puririnaykichejta kamachisorqachej: Rispa, noqa qoshaykichej chay jallp'ata jap'imuychej, nispa. Qankunatajrí kasuyta mana munarqankichejchu, nitaj paymanta jap'ikorqankichejchu, nillataj payta kasorqankichejchu.

²⁴ Qankunata rejsisqay p'unchaymantapacha qankunaqa Tata Diospa contranpi oqharikullankichejpuni.

²⁵ Tata Dios qankunata wañuchinanta nisqanrayku, noqa tawa chunka p'unchayta, tawa chunka tutatawan paypa ñawpaqenpi qonqorikuspa karqani.

²⁶ Chantá Tata Diosmanta mañakuspa, nerqani: Tukuyta Kamachej Tata Diosníy, kay aylluykita ama chinkachiychu ari, imajtinchus qanpatamin kanku. Qanmin preciota pagaspa paykunata jatun atiyniykiwan kacharicherqanki, Egiptomantataj kallpaykiwan orqhomorqanki.

²⁷ Yuyarikuy ari kamachiyki Abrahammanta, Isaacmanta, Jacobmanta ima. Ama kay runakunaj rumi sonqo kasqankuta, ni sajra kayninkuta, nillataj juchankutapis qhawaychu.

²⁸ Jina kanman chayqa, may llajtamantachus orqhomuwarqayku, chay llajtayojkuna nenqanku: Tata Diosqa, mayqen jallp'atachus qonan karqa, chayman pusaykuyta mana atisqachu. Chejnikuspa, ch'innejpi wañuchinanpaj paykunata kaymanta orqhorqa, nispa.

²⁹ Chaywanpis israelitakunaqa aylluyki kanku, qanpatamin. Qanmin jatun atiyniyoj kasqaykita rikuchispa, Egiptomanta paykunata orqhomorqanki, nispa.