Deuteronomio 8 - DIOSPA QHELQACHISQ

Runaqa mana mikhunallawanchu kawsan

¹ Kunan qankunaman rejsichishaykichej, chay kamachisqakunata kasunaykichejpaj sonqota churaychej. Kasunkichej chayqa, kawsankichej, chantá ashkhayankichej ima. Jinataj Tata Diosniykichej tiluspa nerqa, chay jallp'ata jap'inkichej.

² Qankuna tukuy ch'innejta tawa chunka watata purisqaykichejta yuyarikuychej. Tata Diosniykichej chaynejta pusamusorqachej qankunata k'umuykuchinanpaj, chantá sonqoykichejpi imachus kasqanta yachananpaj.

³ Tata Diosqa ñak'arichisorqachej, yarqhachisorqachej chaypis, maná nisqata mikhuchisorqachej. Chay mikhunata qankuna, jinataj ñawpa tataykichejkunapis mana rejserqankichejchu. Tata Dios ajinata ruwaspa, yachanaykichejta munarqa, runaqa mana mikhunallawanchu kawsasqanta, aswanpis Tata Diospa tukuy nisqanwan kawsasqanta.

⁴ Chay tawa chunka wata junt'api p'achaykichejqa manallataj thantakorqachu, nitaj chakiykichejpis punkerqankuchu.

⁵ Kayta allinta yachaychej: Imaynatachus uj tata wawanta jasut'ispa cheqan ñanman churan, ajinallatataj Tata Diosqa qankunata cheqan ñanman churasorqachej, allinniykichejpaj.

⁶ Ajinaqa Tata Diosniykichej kamachisusqanta kasuychej. Payllata kasuspa, chantá may jatun respetowan qhawaspa ima puriychej.

⁷ Tata Diosniykichejqa sumaj jallp'aman pusashasunkichej. Chay jallp'aqa ashkha mayuyoj, vallemanta, orqomanta ima yaku juturiyojmin kashan.

⁸ Chay jallp'apeqa cebada, trigo poqon, uva sach'a, higo sach'a, granada, olivo ima kallantaj. Chantapis aceite, abeja misk'i ima tiyan.

⁹ Chay jallp'api mana ni imamanta usunkichejchu, nitaj imapis pisisonqachejchu. Rumimanta fierrota orqhonkichej, orqokunamantataj cobreta.

¹⁰ Chaypi mikhuspa sajsakunaykichejkama, chay jina sumaj jallp'ata qosusqaykichejmanta Tata Diosniykichejta yupaychankichej.

Diosta mana qonqanachu

¹¹ Tata Diosniykichejta ama qonqakapunaykichejmanta allinta qhawakuychej. Kunan kamachishaykichej, Diospa chay kamachisqankunata, chantá nisqanta ima junt'aychejpuni.

¹² Maypachachus mikhuspa sajsakunkichej, sumaj wasikunata ruwakuspataj tiyakunkichej chayqa, Diosniykichejmanta ama qonqakapunkichejchu.

¹³ Jinallataj wakaykichej, ovejaykichejpis mirajtin, qoriykichej, qolqeykichejpis ashkha kajtin, jinataj tukuy imaykichejpis ashkha kajtin chaypacha,

¹⁴ ama wapuykachaspa jatunchakunkichejchu. Nillataj Tata Diosniykichejmanta qonqakapunkichejchu, imaraykuchus payqa Egiptopi wata runa kashajtiykichej, chaymanta orqhomusorqachej.

¹⁵ Tata Diosqa chay jina jatun manchachikuna ch'innejta pusamusorqachej. Chaynejpeqa ashkha khanikoj nina katarikuna, atojsillukunapis tiyan. Chay ch'innejpeqa mana ima yakupis karqachu. Chaywanpis payqa thuru chhankamanta yakuta orqhospa, ujyachisorqachej.

¹⁶ Ch'innejpi maná nisqata mikhuchisorqachej, ñawpa tataykichejkunaj mana rejsisqanku mikhunata. Chaykunata payqa, qankunata k'umuykuchinanpaj, chantá sonqoykichejta yachananpaj ruwarqa, qankunaj allinniykichejpaj.

¹⁷ Ama sonqoykichejpi yuyankichejchu: Sinch'ita llank'asqaykurayku tukuy imata tarispa qhapajyayku, nispa.

¹⁸ Aswanpis Tata Diosniykichejmanta yuyarikuychejpuni, imaraykuchus paymin tukuy imata tarispa, qhapajyanaykichejpaj kallpata qosunkichej. Ajinatamin payqa ñawpa tataykichejwan trato ruwasqanta, qankunawan junt'anqa, imaynachus kunan kashan, ajinata.

¹⁹ Sichus qankuna Tata Diosniykichejmanta qonqakapuspa, waj dioskunaman k'umuykuspa yupaychankichej chayqa, noqa sut'inta niykichej cheqapuni chinkachisqa kanaykichejta.

²⁰ Sichus Tata Diosniykichejpa nisqanta mana jap'ikunkichejchu chayqa, imaynatachus Tata Dios ñawpaqeykichejmanta chay suyukunapi tiyakojkunata chinkachenqa, ajinallatataj qankunatapis chinkachisonqachej.