Deuteronomio 7 - DIOSPA QHELQACHISQ

Moisés lantikunata mana yupaychanankupaj k'amin

¹ Maypachachus Tata Diosniykichej, jap'inaykichej kashan, chay jallp'aman pusasonqachej chaypachaqa, ñawpaqeykichejmanta qanchis suyukunapi tiyakojkunata wijch'onqa. Chay suyukunapi tiyakojkunaqa qankunamanta aswan ashkha, chantá aswan kallpayoj kanku. Chaykunaqa kanku: Jititakuna, gergeseokuna, amorreokuna, cananeokuna, ferezeokuna, jivitakuna, chantá jebuseokuna ima.

² Maypachachus Tata Diosniykichej, chay suyukunata atipanaykichejpaj makiykichejman jaywasonqachej chaypacha, paykunata kantumanta wañuchinkichej. Amapuni paykunawan ni ima tratota ruwankichejchu, nitaj khuyarikullankichejpischu.

³ Ama paykunawan aylluchakunkichejchu. Ama churiykichejta ususinkuwan, nitaj ususiykichejta churinkuwan casarachinkichejchu.

⁴ Ajinatachus ruwawaychej chayqa, paykuna wajkunaj diosninkuta yupaychanankupaj churiykichejta, ususiykichejta ima Tata Diosmanta karunchachinkuman. Jina kanman chayqa, Tata Dios qankunaj contraykichejpi anchatataj phiñakuspa, manaraj imapi chinkachisunkichejman.

⁵ Chayrayku qankunaqa kayta ruwanaykichej tiyan: Chay runakunaj altarninkuta thuñinkichej, yupaychana ruminkuta, yupaychana k'ullunkutawan ima p'akirankichej. Jinallataj lantinkutapis ninawan ruphaykuchinkichej.

⁶ Qankunaqa Tata Diosniykichejpaj t'aqasqa ayllu kankichej. Paymin kay pachapi tukuy suyumanta ajllakusorqachej, paypata may munasqa ayllun kanaykichejpaj.

Diospaj t'aqasqa ayllu

⁷ Tata Diosqa qankunata munakususqanrayku ajllakusorqachej, mana waj llajtayojkunamanta nisqa aswan ashkha kasqaykichejraykuchu. Qankunaqa paykunamanta nisqa mana kasu ruwana karqankichej.

⁸ Tata Diosqa qankunata munakususqaykichejrayku, jinataj ñawpa tataykichejkunaman tilusqanta junt'ananpaj ajllakusorqachej. Chayrayku payqa Egiptopi ñak'arichisqa kashajtiykichej, chantá faraonpa makinpi kashajtiykichej, preciota pagaspa may jina atiyninwan kacharichisorqachej.

⁹ Chayrayku yachaychej ari, Tata Diosniykichejqa pay k'atalla cheqa kaj Dios kasqanta. Yachallaychejtaj payqa, pikunachus payta munakojkunawan, kamachisqantataj junt'ajkunawan ima, may chhika miraykama trato ruwasqanta junt'aj kasqanta.

¹⁰ Payta chejnikojkunatarí millayta ruwasqankumanta chinkarparichin, usqhayllatataj jasut'in.

¹¹ Chayrayku kamachisqanta, yachachisqanta, chantá imatachus nisqanta ima kasuychej, kunan qankunaman chaykunata junt'anaykichejpaj qoykichej, chayta.

Kasukojkuna kusiy kawsayta rikonqanku

¹² Sichus qankuna Tata Diospa kamachisqanta uyarispa kasunkichej, chayman jinataj kawsankichej chayqa, Tata Diosniykichejpis ñawpa tataykichejkunawan trato ruwasqanta junt'allanqataj, khuyakususqantataj rikuchisonqachej.

¹³ Qankunata munakusonqachej, yanapasonqachej, ashkhatataj mirachisonqachej. Ñawpa tataykichejkunaman tiluspa qonanta nerqa, chay jallp'api wawaykichejkunata saminchanqa. Jinallataj chajra oqharisqaykichejta, trigoykichejta, vinoykichejta, aceiteykichejta, waka uñaykichejta, oveja uñaykichejtapis saminchallanqataj.

¹⁴ Qankuna tukuy suyupi tiyakojkunamanta nisqaqa, astawan saminchasqa kankichej. Qankuna ukhupi warmipis, qharipis, mana wawayoj mana kanqachu. Nillataj uywaykichej ukhupipis mana uñayojqa kanqachu.

¹⁵ Tata Diosqa tukuy imaymana onqoykunata qankunamanta karunchanqa. Egiptopi rikorqankichej, chay millay onqoykunata mana qankunaman apachimonqachu. Manachayqa chejnikusojkunata chaykunawan ñak'arichenqa.

¹⁶ Tata Dios makiykichejman jaywasonqachej, chay suyukunapi tiyakojkunata wañuchispa tukuchinaykichej tiyan. Paykunataqa ama khuyankichejchu, diosninkutapis ama yupaychankichejchu. Mana jinata ruwankichejchu chayqa, qankuna pantaykunaykichejpaj tojlla jina kanman.

¹⁷ Ichapis sonqoykichejpi niwajchej: Kay suyukunapi runaqa noqaykumanta aswan ashkha kanku. Imaynatataj paykunata wijch'uyta atiykumanri? nispa.

¹⁸ Qankunaqa ama paykunata manchachikuychejchu. Tata Diosniykichej faraonwan, chantá tukuy Egipto llajtayojkunawan imatachus ruwasqanta yuyarikuychej.

¹⁹ Yuyarikuychej Tata Diosniykichejqa runaj mana jayk'aj rikusqan t'ukuna imakunata ruwaspa, jinataj may jina atiyninwan Egiptomanta orqhomususqaykichejta. Chaykunata qankuna rikorqankichej. Ajinallatataj Tata Diosqa, qankuna manchachikushankichej, chay tukuy suyuwan ruwanqa.

²⁰ Chantapis Tata Diosqa puchojkunaman, jinataj qankunamanta pakakuspa ayqekojkunaman, wayronqokunata kachaykonqa, paykunata tukuchinanpaj.

²¹ Chayrayku paykunata rikuspa, ama q'ewayaychejchu, imaraykuchus may jina atiyniyoj manchachikuna Tata Diosniykichejqa qankunawan kashan.

²² Tata Diosniykichejqa pisimanta pisi chay suyukunapi tiyakojkunata ñawpaqeykichejmanta qharqonqa. Qankunaqa mana paykunata ujllapi tukuchiyta atiwajchejchu, imaraykuchus k'ita animalkuna miraykuspa, qankunata mithaj yaykumusunkichejman.

²³ Jinapis Tata Diosniykichejqa chay suyukunata makiykichejman jaywasonqachej. Paykunata sinch'ita ñak'arichispa, tukuchenqa.

²⁴ Kuraj kamachejninkutapis Tata Diosqa makillaykichejmantaj churasonqachej. Paykunamanta yuyarikunatapis kay pachamanta chinkachinkichej. Paykunata tukuchinaykichejkama, mana pipis qankunaman sayaykuyta atisonqachejchu.

²⁵ Lantinkuta ninaman wijch'uykuspa, ruphachinkichej. Chay lantinkoj qorinta, qolqentapis munapayaspa, ama jap'ikapunkichejchu. Chaykunatachus jap'ikapuwajchej chayqa, juchallinaykichejpaj tojlla jina kasunkichejman. Tata Diosqa chaykunata millachikuspa, rikuyta mana atinchu.

²⁶ Chayrayku qankunaqa millachikuna lantinkukunata amapuni wasiykichejman apakapunkichejchu, ama qankunapis chinkachisqa kanaykichejpaj. Chaykunaqa chinkachisqa kananpaj churasqa kashan. Chayrayku chaykunata chejninaykichej tiyan.