Deuteronomio 6 - DIOSPA QHELQACHISQ

Tukuy kamachisqamanta aswan jatun kaj kamachisqa

¹ Kaymin kamachisqakuna, yachachiykuna, yuyaychaykuna ima kanku. Chaykunata Tata Diosniykichej qankunaman yachachinaypaj kamachiwarqa, jap'inkichej chay jallp'api junt'anaykichejpaj.

² Qankuna, wawaykichej, allchhiykichej ima kay pachapi kawsanaykichejkama, Tata Diosniykichejta may jatun respetowan qhawakuychej. Sichus tukuy kamachisqanta, yachachisqanta ima kasunkichej chayqa, unayta kawsankichej.

³ Chayrayku ari, israelitakuna, kasukuspa ruwaychej. Uyarikunkichej chayqa, lechewan, abeja misk'iwan yaku jina purishaj chay jallp'api allin risonqachej, ashkhatataj mirankichej, ñawpa tataykichejkunaj Tata Diosnin nisusqanman jina.

⁴ Israelitakuna, uyariychej: Diosninchejqa Tata Diosmin, pay k'atalla Diosqa.

⁵ Tata Diosniykita tukuy sonqoykiwan, tukuy almaykiwan, tukuy kallpaykiwan ima munakunki.

⁶ Kunan kay tukuy kamachisqayta sumajta sonqoykipi jap'iy.

⁷ Chantá wawaykikunaman sapa kuti yachachiy. Wasipi kashaspa, ñanta purishaspa, puñukapushaspa, chayrí jatarishaspapis chaykunamanta parlallaypuni.

⁸ Kay kamachisqaykunataqa makiykipi chantá frenteykipi ima wataykukuspa, señalta jina apaykachanki.

⁹ Jinallataj wasiykej punkunpi, chantá llajtaman yaykuna punkupipis qhelqallankitaj.

Moisés israelitakunata k'amin Diosta kasunankuta

¹⁰ Tata Diosniykichejqa ñawpa tataykichej Abrahamman, Isaacman, Jacobman ima tiluspa qonanta nerqa, chayman pusasonqachej. Chay jallp'aqa jatuchaj sumaj llajtakunayoj. Chaykunataqa mana qankunachu sayaricherqankichej.

¹¹ Chaypi wasikunaqa tukuy imawan junt'asqa kashan. Chaykunata manallataj qankunachu junt'acherqankichej. Jinallataj chay jallp'aqa ashkha yaku pujyuyoj kashan. Chaykunataqa manallataj qankunachu allarqankichej. Mana qankunaj mallkisqaykichej uva sach'a, olivo sach'a kashallantaj. Qankunataj chay sach'akunaj poqosqanta sajsakunaykichejkama mikhunkichej.

¹² Jina kajtin amapuni Tata Diosta qonqapunkichejchu, imaraykuchus paymin Egiptopi wata runa kashasqaykichejmanta orqhomusorqachej.

¹³ Tata Diosniykichejta may jatun respetowan qhawankichej, payllatataj yupaychankichej. Tiluspapis, Tata Diospa sutillanpi tiluychej.

¹⁴ Muyuyniykichejpi llajtayojkunaj diosninkukunata amapuni yupaychankichejchu,

¹⁵ imajtinchus Tata Diosniykichejqa qankunawan kashan. Payqa manchay celoso. Qankunaj contraykichejpichus phiñakunman chayqa, chinkarparichisunkichejman.

¹⁶ Ama Tata Diosniykichejta atiyniyojchus manachus kasqanta yachariyta munaspa, imatapis ruwankichejchu, imaynatachus Masahpi ruwarqankichej, ajinata.

¹⁷ Tata Diosniykichej qosusqan kamachisqanta, yachachiyninta, yuyaychayninta ima allinta kasunkichej.

¹⁸ Sichus allin kajta, chantá cheqan kajta ruwankichej chayqa, Tata Diospa sonqonta kusichinkichej. Ajinaqa Tata Dios ñawpa tataykichejman tiluspa qonanta nerqa, chay sumaj jallp'api allin risonqachej.

¹⁹ Jinallataj Tata Dios nisusqanman jina, awqaykichejta ñawpaqeykichejmanta wijch'onqa.

²⁰ Qhepanejman wawaykichejkuna tapusonqanku: Tata Diosninchej kay kamachisqakunata, yachachiykunata, yuyaychaykunata ima qowasqanchej, imatataj niyta munanri? nispa.

²¹ Chaypacha qankuna ninkichej: Noqaykoqa Egiptopi faraonpata wata runan karqayku, chaymanta Tata Diosqa jatun atiyninwan orqhomuwarqayku.

²² Chaypacha Tata Diosqa Egiptopi faraonpa contranta, chantá ayllunpa contranta ima runaj mana jayk'aj rikusqanta, may t'ukuna imakunata ima rikushajtiyku ruwarqa.

²³ Egiptomanta orqhospa, kayman pusamuwarqayku, Tata Dios ñawpa tatanchejkunaman tilorqa, chay jallp'ata qonawanchejpaj.

²⁴ Chaymanta Tata Diosninchejqa tukuy kamachisqanta kasunanchejta, chantá payllata manchachikunanchejta kamachiwarqanchej, wiñaypaj allin rinawanchejpaj, kawsachinawanchejpaj ima imaynatachus kunankama kawsachishawanchej ajinata.

²⁵ Ajinaqa, sichus kamachisqanman jina Tata Diospa ñawpaqenpi tukuy kamachisqanta kasusunchej chayqa, cheqanpaj qhawasqa kasunchej, nispa.