Deuteronomio 5 - DIOSPA QHELQACHISQ

Chunka kamachisqakuna

¹ Moisés tukuy israelitakunata tantaspa, nerqa: Israelitakuna, kamachisqakunata, yachachiykunata ima kunan willashaykichej, chaykunata uyariychej. Sumajta yachaqaychej, chaykunaman jinataj ruwaychej.

² Tata Diosninchejqa noqanchejwan uj tratota Horeb orqopi ruwarqa.

³ Chay tratota payqa mana ñawpa tatanchejkunallawanchu ruwarqa, manachayqa noqanchejwanpis ruwallarqataj, pikunachus kunan kaypi kawsashaj kashanchej, chaykunawan.

⁴ Tata Diosqa orqopi nina chawpimanta pay kikinpuni parlamusorqachej.

⁵ Chaypacha noqaqa Tata Dioswan qankunawan chawpiykichejpi kasharqani, Tata Diospa simi nisqanta qankunaman willanaypaj, imaraykuchus qankunaqa ninata manchachikuspa, mana orqoman wicharerqankichejchu. Chaypacha Tata Dios ajinata nerqa:

⁶ Noqa Tata Diosniyki kani. Noqamin Egipto suyupi wata runa kashajtiyki, orqhomorqayki.

⁷ Noqamanta jawaqa ama waj dioskuna kapusuchunchu.

⁸ Ama ni imaman rijch'akoj lantita ruwakunkichu, ni janajpi kajman, ni kay pachapi kajman, nitaj yakupi kajkunaman rijch'akojta.

⁹ Ama chaykunaman qonqorikunkichu, amataj yupaychankichu, imaraykuchus noqamin Tata Diosniyki kani, celoso Dios. Noqata chejnikuwaj tata mama juchallisqankurayku, wawankuta, allchhinkuta, chantá allchhinkoj wawanta ima jasut'ispa, ñak'arichini.

¹⁰ Pikunachus noqata munakuwaspa, kamachisqayta kasunku chaykunatarí, tukuy wawankuta k'acha kayninwan qhawasaj.

¹¹ Ama qhasi manakajta Tata Diosniykej sutinta oqharinkichu, pichus sutinta yanqhata oqharejtaqa Tata Dios mana qhawakullanqachu.

¹² Samarina p'unchayta Tata Diospaj t'aqanaykimanta ama qonqankichu, imaynatachus Tata Dios kamachisusqanman jina.

¹³ Sojta p'unchayta llank'anki, chay p'unchaykunapi tukuy ruwanayki kajta ruwanki.

¹⁴ Qanchis kaj p'unchayrí samarina p'unchay Tata Diosniykipaj t'aqasqa kanqa. Chay p'unchayqa ama ni ima ruwanaykita ruwankichu, ni churiyki, ni ususiyki, ni qhari kamachiyki, ni warmi kamachiyki, ni wakayki, ni burroyki, ni ima uywayki, nitaj wasiykipi tiyakoj waj llajtayojpis imatapis ruwanqachu. Chay p'unchayqa qhari kamachiyki, chayrí warmi kamachiykipis qan jina samarenqanku.

¹⁵ Qanqa Egiptopi wata runa kasqaykita yuyarikuy. Tata Diosniyki may jatun atiyninwan chaymanta orqhomusorqa. Chayrayku Tata Diosniyki kamachisunki, samarina p'unchaypi samarinaykita.

¹⁶ Tata Diosniyki kamachisusqanman jina, tataykita, mamaykitapis jatun respetowan qhawakunki. Ajinata ruwanki chayqa, Tata Diosniyki jallp'ata qosonqa chaypitaj unayta kawsanki, chantá allillan risonqa.

¹⁷ Ama runa masiykita wañuchinkichu.

¹⁸ Ama casarasqaykita wajwan wasanchaspa, khuchichakunkichu.

¹⁹ Ama suwankichu.

²⁰ Ama runa masiykimanta manakajta, nitaj llullakuspa parlankichu.

²¹ Ama runa masiykej warminta munapayankichu. Nillataj wasinta, ni jallp'anta, ni qhari kamachinta, ni warmi kamachinta, ni wakanta, ni burronta, nitaj iman kajtapis munapayankichu, nispa.

Israelitakuna manchachikunku

²² Orqo k'uchupi tantasqa kashajtiykichej, Tata Diosqa chay kamachisqakunata jatunmanta parlaspa nerqa, orqopi nina chawpimanta, laqha phuyu ukhumantapacha. Chaymantaqa manaña astawan imatapis nerqachu, chay kamachisqakunatataj iskay p'alta rumipi qhelqaspa noqaman jaywawarqa.

²³ Maypachachus laqhayay ukhumanta Tata Dios parlamojta uyarerqankichej, rikorqankichejtaj Sinaí orqota lawrarishajta chaypacha, sapa jatun ayllumanta kamachejkuna, kurajkuna ima noqawan parlaj jamuspa, niwarqankichej:

²⁴ Cheqatapuni Tata Diosniykoqa jatun kayninpa lliphipiyninta, qhapaj atiyninta ima rikuchiwayku. Parlamusqantataj nina lawray chawpimanta uyariyku. Kunan yachayku Diosqa runawan parlayta atisqanta, runataj mana wañusqanta.

²⁵ Chaywanpis, imapajtaj kay jina mancharinata lawraj ninapi ruphasqa wañuykumanri? Sichus ujtawan Tata Diosniykoj parlasqanta uyarisqayku chayqa, wañusqayku.

²⁶ Pi runataj chay jina nina lawray chawpimanta kawsaj Diospa parlasqanta uyarinman, noqanchej jina mana wañuspallari?

²⁷ Chayrayku aswan walej kanman qanlla Tata Diosninchejman qayllaspa, imatachus nisusqanta uyarinayki. Chantá imatachus nisusqanta willawayku, noqaykutaj niwasqaykuman jina junt'asqayku, nispa.

²⁸ Ajinata nishawajtiykichej Tata Dios parlawasqaykichejta uyarisharqa. Chantá niwarqa: Kay runakuna imatachus nisusqankuta noqa uyarini. Imatachus nisqankoqa allinmin rijch'awan.

²⁹ Mayta munayman ajinallatapuni yuyanankuta, noqatataj yupaychanawankuta, kamachisqaytapis sapa p'unchay kasunankuta. Ajinata ruwaspa, paykuna jinataj wawankupis wiñaypaj kusiy kawsayta rikonqanku.

³⁰ Kunanqa rispa, paykunata nimuy toldonkuman kutipunankuta.

³¹ Qanrí kaypi noqawan qhepakuy. Noqa tukuy kamachisqaykunata, yachachiykunata, yuyaychaykunata ima qanman nisqayki, qantaj paykunaman yachachinki, qosqay jallp'api tiyakushaspa junt'anankupaj, nispa.

³² Chayrayku Tata Diosniykichej kamachisusqanta kasunaykichejmanta allinta qhawaychej, ama pañaman, nitaj lloq'eman ladoyaspa.

³³ Qankunaqa Tata Diosniykichejpa kamachisusqanta kasuspa, allinta puriychej, Tata Dios qosonqachej chay jallp'api unayta kawsakunaykichejpaj, chantá allin rinasuykichejpaj.