Deuteronomio 4 - DIOSPA QHELQACHISQ

Moisés Tata Diosta kasunankuta yuyaychan

¹ Kunanqa israelitakuna, kamachisqaykunata, chantá yachachisqaykunata ima uyariychej. Yachachisqayman jinataj ruwaychej. Kasukunkichej chayqa, mana wañunkichejchu. Ñawpa tataykichejpa Tata Diosnin jallp'ata qosonqachej, chayman jap'inaykichejpaj yaykunkichej.

² Imatachus qankunaman kamachisqaymantaqa ama qhechunkichejchu, nitaj chayman imatapis yapankichejchu. Aswanpis, noqa kamachisqayman jina, Tata Diospa kamachisqanta junt'aychej ari.

³ Qankuna kikiykichej, Baal Pegorpi Tata Dios imatachus ruwasqanta rikorqankichej. Tata Diosqa qankuna ukhumanta Baal Pegor sutiyoj lantita tukuy yupaychajkunata chinkacherqa.

⁴ Chaywanpis tukuy pikunachus Tata Diosniykichejta kasojkunaqa kawsashankichejraj.

⁵ Noqaqa Tata Diosniy kamachiwasqanman jina kamachisqanta, nisqantawan ima yachacherqaykichej, jap'inkichej chay jallp'api kasunaykichejpaj.

⁶ Ajinaqa kasuspa junt'aychej. Ajinatachus ruwankichej chayqa, tukuy yachanqanku yachayniyoj, yuyayniyojtaj kasqaykichejta. Waj llajtayojkuna kay kamachisqakunamanta uyarispa, nenqanku: Kay llajtayoj runakunaqa yachayniyoj, yuyayniyojtaj kanku. Kay suyoqa sumajmin, nispa.

⁷ Mayqen jatun suyuwantaj diosninku chay jina qayllapi kashanman, imaynatachus Tata Diosninchej yanapanawanchejta mañakojtinchej qayllanchejpi kashan, jinatari?

⁸ Mana mayqen jatun suyojtapis sumaj cheqan kamachisqakuna, yachachiykunapis kapunchu, noqa kunan qankunaman qoshaykichej jinaqa.

⁹ Chayrayku qankunaqa imatachus rikusqaykichejta, ama ni jayk'aj qonqanaykichejmanta allinta qhawakuychej. Aswanpis wawaykichejkunaman, allchhiykichejkunaman ima chay kamachisqakunata yachachiychej.

Tata Dios Horeb orqopi parlan

¹⁰ Sinaí orqopi Diosniykichejpa ñawpaqenpi kashajtiykichej, Tata Dios niwarqa: Nisqayta uyarinankupaj israelitakunata tantay. Chantá kawsanankukama noqata manchachikuwaspa puriyta yachanqanku, jinallataj wawankutapis noqata manchachikuspa kawsayta yachachenqanku, nispa.

¹¹ Qankunaqa orqo k'uchuman qayllaspa, chaypi sayarqankichej. Chantá chay orqomanta jatun nina lawray llojsimuspa, may jina pataman llojserqa. Q'oshñisqanqa manchay yanayarishaj phuyu jina karqa.

¹² Tata Diostaj chay nina lawray ukhumanta parlamusorqachej. Qankunaqa parlamusqanta uyarerqankichej, chaywanpis imayna rijch'ayniyojchus kasqanta mana rikorqankichejchu.

¹³ Chantá Tata Diosqa trato ruwasqanta rejsichisorqachej, kamachisorqachejtaj chayman jina ruwanaykichejta. Chay tratoqa chunka kamachisqakuna karqa, chay kamachisqatataj iskay p'alta rumipi qhelqarqa.

¹⁴ Chaypacha Tata Dios chay yachachiykunata, kamachisqakunatawan ima qankunaman yachachinayta kamachiwarqa, qankuna jap'isqaykichej jallp'api tiyakushaspa junt'anaykichejpaj.

Lantita mana yupaychanankuta k'amin

¹⁵ Maypachachus Tata Dios Horeb orqopi nina chawpimanta parlamusorqachej chaypacha, imayna rijch'ajchus kasqanta mana rikorqankichejchu. Chayrayku ari, sumajta qhawakuychej.

¹⁶ Amapuni ni qhariman, nitaj warmiman rijch'akoj lantita ruwaspa, mana allinta ruwanaman qokunkichejchu.

¹⁷ Nillataj kay pachapi kaj animalkunaman rijch'akojta, nitaj phawajkunaman rijch'akoj lantita ruwankichejchu.

¹⁸ Amallataj pampata qhatatakuspa purejkunaman, nitaj challwakunaman rijch'akoj lantita ruwankichejchu.

¹⁹ Janajpi kaj intita, killata, ch'askakunata, imachus janajpi tiyan, chay tukuyta rikuspa, pajtataj chaykunaman qonqorikuspa, yupaychawajchej. Tata Diosniykichejqa tukuy chaykunata kay pachapi runakunapaj ruwarqa.

²⁰ Tata Diosqa Egiptomanta metalta unuyachina hornomanta jina qankunata orqhomusorqachej, paypata ayllun kanaykichejpaj, imaynachus kunan kashankichej, ajina.

²¹ Chaywanpis Tata Diosqa qankunarayku noqapaj mayta phiñakorqa. Chantá tiluspa, Tata Dios niwarqa Jordán mayuta manapuni chimpanayta, nillataj qankunaman qosunkichej, chay sumaj jallp'aman yaykunayta.

²² Jinaqa noqa kay cheqapi wañupusaj, manataj Jordán mayuta chimpasajchu. Qankunarí chay mayuta chimpaspa, sumaj jallp'ata jap'imunkichej.

²³ Allinta qhawakuychej, Tata Diosniykichej qankunawan tratota ruwasqanta ama qonqanaykichejpaj. Ama ni imaman rijch'akoj lantita ruwakunkichejchu. Tata Diosniykichejqa lantikunata ruwakunaykichejta mana munanchu.

²⁴ Tata Diosniykichejqa manchay celosomin. Sichus pay jasut'isunkichejman chayqa, tukuy imata ruphaj nina jina tukuchisunkichejman.

²⁵ Qankuna wawayoj, allchhiyoj kaspa, jap'isqaykichej jallp'api machuyaspa, sichus ima lantitapis, chayrí imaman rijch'akojtapis ruwakuspa pierdekuwajchej chayqa, Tata Diosniykichejpa contranpi juchallispa, payta phiñachiwajchej.

²⁶ Chaytachus ruwawajchej chayqa, noqa janaj pacha, kay pacha uyarinanta niykichej: Qankunaqa Jordán mayu chimpapi jallp'ata jap'inkichej, chaymanta chinkachisqa kankichej. Chay jallp'api mana unaytachu tiyakunkichej, manachayqa ujkama chinkachisqa kankichej.

²⁷ Tata Diosqa waj suyukunaman ch'eqerachisonqachej, chay jallp'apitaj pisillaña qhepakunkichej.

²⁸ Chay suyukunapi qankunaqa runaj makinwan ruwasqa dioskunata yupaychankichej. K'ullumanta, rumimanta ruwasqa lantikunata, mana rikojkunata, mana uyarejkunata, mana mikhojkunata, nitaj muskhiyta atej lantikunata yupaychankichej.

²⁹ Chaywanpis sichus chaypi tiyakushaspa, tukuy sonqoykichejwan, tukuy almaykichejwan ima Tata Diosniykichejta mask'ankichej chayqa, payta tarinkichej.

³⁰ Maypachachus llakiykuna phutiykunapis chayamusojtiykichej chay qhepata, qankunaqa Tata Diosman kutirikuspa, payta kasunkichej.

³¹ Tata Diosniykichejqa manchay khuyakuyniyoj kasqanrayku, mana saqerparisonqachejchu, nitaj chinkachisonqachejchu, nillataj ñawpa tataykichejkunawan tiluspa trato ruwasqanta qonqaponqachu.

³² Qankunamanta aswan ñawpajta, Dios kay pachapi runata ruwasqanmantapacha, imaynachus kasqanta tapukuychej. Jinallataj tukuynejpi tapukuychej: Chay jina t'ukuna mayk'ajpis ruwasqa karqachu? Chayrí chay jinaman rijch'asqa mayk'ajpis yachakorqachu?

³³ Mayqen suyutaj, qankuna jina, nina chawpimanta Diospa parlamusqanta uyarispa, mana wañorqachuri?

³⁴ Uj diosllapis kanchu, uj suyuta tukuy suyoj chawpinkumanta ajllakoj, imaynatachus Tata Dios Egiptopi qankunawan ruwarqa, ajinata ruwajqa? Tata Diosmin ñawpaqeykichejpi tukuy imaymana t'ukunata ruwaspa, maqanakuspa, may jina atiyniyoj kasqanta rikuchispa, t'ukuspa mancharinapaj jina imakunata ruwarqa.

³⁵ Tata Dios chaykunata rikuchisorqachej, paylla cheqapuni Dios kasqanta yachanaykichejpaj, paymanta jawataj waj dios manapuni kasqanta.

³⁶ Payqa allin ñanman churasunaykichejpaj janaj pachamantapacha parlasqanta uyarichisorqachej. Kay pachapitaj mancharinapaj jina jatun nina lawrayninta rikuchisorqachej. Chay nina chawpimanta parlasqanta uyarerqankichej.

³⁷ Payqa ñawpa tataykichejkunata munakusqanrayku, mirayninkuta ajllakorqa. Paymin jatun atiyninwan Egiptomanta orqhomusorqachej.

³⁸ Payqa ashkha runayoj suyukunata, qankunamanta aswan atiyniyojkunata ñawpaqeykichejmanta qharqorqa. Ajinata ruwarqa llajtankuman yaykuchisunaykichejpaj, jallp'ankutataj chayaqeta jina jap'inaykichejpaj, imaynachus kunan kashan, ajina.

³⁹ Chayrayku kunanqa yachaychej, sonqoykichejpitaj unanchaychej, janaj pachapi, kay pachapipis Tata Dioslla Dios kasqanta. Paymanta jawaqa mana waj diosqa kanchu.

⁴⁰ Kunan p'unchay kay kamachisqaykunata, yachachiykunata ima qoshaykichej, chayta junt'aychej. Kasojtiykichej, qankunata, jinallataj mirayniykichejtapis allin risonqachej. Tata Diosniykichej wiñaypaj qosonqachej, chay jallp'apitaj unayta kawsankichej, nispa.

Jordán mayu chimpapi pakakunapaj llajtakuna

⁴¹ Chantá Moisesqa Jordán mayumanta inti llojsimuynejpi, pakakunapaj kinsa llajtakunata ajllarqa.

⁴² Sichus pipis runa masinta mana yuyasqallamanta, nitaj chejnikuspachu wañuchinman chayqa, mana wañuchisqa kananpaj chay llajtakunamanta ujninman ayqekonqa.

⁴³ Chay llajtakunaqa kaykuna karqanku: Ch'innejpi Beser llajtaqa Rubén jatun ayllupaj karqa. Galaadpi Ramot llajtaqa Gad jatun ayllupaj karqa. Basanpi Golán llajtaqa Manasés khuskan jatun ayllupaj kallarqataj.

⁴⁴ Moisés kay kamachisqakunata israelitakunaman rejsicherqa.

⁴⁵ Egiptomanta llojsimusqankumanta qhepata kay kamachisqakunata, yachachiykunata, yuyaychaykunata ima israelitakunaman Moisés qorqa.

⁴⁶ Chayqa Jordán mayoj inti llojsimuynej, Bet Pegorpa chimpanpi kasharqanku, chaypacha karqa. Chay jallp'aqa amorreokunaj kuraj kamachejninku Sijonpata karqa, paytaj Jesbón llajtapi tiyakorqa. Egiptomanta llojsimuspa, Moiseswan, israelitakunawan ima payta atiparqanku.

⁴⁷ Israelitakunaqa Sijonpata, chantá Basanta kuraj kamachej Ogpata jallp'antapis jap'ikapullarqankutaj. Amorreokunaj chay iskay kuraj kamachejninkoqa Jordán mayumanta inti llojsimuynejpi tiyakorqanku.

⁴⁸ Chay kamachejkunaj jap'iyninkoqa Arnón mayu kantupi Aroermanta, Sión orqokama karqa. Chay orqojta ujnin sutinrí, Hermón karqa.

⁴⁹ Chaymanta mojonnenqa tukuynin Arabanejta rillarqapuni, Jordán mayoj inti llojsimuyninta Wañusqa Qochakama, chantá Pisga orqo k'uchukama karqa.