Deuteronomio 34 - DIOSPA QHELQACHISQ

Moisés wañupun

¹ Moisés Moab ch'innejmanta Nebo orqorara cheqaman rispa, Pisga orqoman wicharerqa. Chay orqoqa Jericó llajtaj chimpapi kashan. Chaymantapacha Tata Diosqa tukuynin Galaad jap'iyta, chantá Danpa jap'iyninta ima rikucherqa.

² Jinallataj Neftalí jatun aylloj jap'iyninta, Efrainpata, chantá Manasespa jap'iyninta ima rikuchillarqataj, jinallataj Jatun Mama Qochakama tukuy Judá jatun aylloj jap'iynintapis.

³ Chaymantaqa Neguevta, Jordán valleta, palma sach'ayoj llajtata, chantá Jericó pampata Soarkama rikuchillarqataj.

⁴ Chantá Tata Diosqa Moisesta nerqa: Abrahamman, Isaacman, Jacobman, chantá mirayninman ima tiluspa qonayta nerqani, chay suyoqa kaymin. Noqa chay jallp'ata qan kikin ñawiykiwan rikunaykita munarqani. Chaywanpis mana chaymanqa yaykunkichu, nispa.

⁵ Ajinata Tata Diospa kamachin Moisesqa Tata Diospa nisqanman jina Moab suyupi wañuporqa.

⁶ Diosqa Moab suyupi, Bet Pegor llajtaj chimpanpi uj vallepi Moisespa ayanta p'amparqa. Chaywanpis maynejpichus Moisespa ayan p'ampasqa kasqanta, kunankama mana pipis rikunchu.

⁷ Moisés wañuporqa chaypachaqa, pachaj iskay chunka watayoj karqa. Payqa wañupunankama, allintaraj qhawarqa, chantá sumaj kallpanpiraj karqa.

⁸ Israelitakunaqa Moab suyupi ch'innejpi, kinsa chunka p'unchay junt'ata maytapuni Moisesmanta waqarikorqanku. Ajinata Moisés wañupusqanmanta waqana llakikuspa usunkuta junt'arqanku.

⁹ Nunpa churin Josuerí sumaj yachayniyoj kanawan junt'a karqa, Moisés paypa umanman makinta churasqanrayku. Israelitakunataj payta kasorqanku, chantá Tata Dios imaynatachus Moisesman kamachisqanman jina ruwarqanku.

¹⁰ Chaymantaqa manaña jayk'ajpis Israelpi, Moisés jina ujwan Diosmanta sut'inchaj karqachu. Nillataj pay jina Tata Dioswan uyapura parlajqa karqañachu.

¹¹ Nillataj Moisés jina, runaj mana jayk'aj rikusqan t'ukuna imakunata ruwaj karqachu. Tata Diosqa Moisesta Egipto suyuta kamachej faraonpa contranta, yanapajninkunaj contranta, chantá tukuy Egipto suyoj contranta ima t'ukuna imakunata ruwananpaj kamachisqa.

¹² Israelitakuna ukhupi, manañapuni pipis Moisés jina karqachu. Payqa israelitakunaj rikunankuta, may jina atiywan t'ukuna imakunata, manchachikunapaj jina señalkunata ruwarqa.