Deuteronomio 32 - DIOSPA QHELQACHISQ

¹ Janaj pacha, parlasqayta uyariy. Jallp'apis, simiypa parlasqanta uyarillaytaj.

² Yachachisqayqa para jina jich'akamonqa. Yuyasqayqa chhillchi jina urmamonqa, qhora patapi chhulla jina kanqa, ch'iki patapitaj yaku sut'oj jina.

³ Noqaqa Tata Diospa sutinta jatunchasaj. Tata Diosninchejpa sutinta yupaychasaj.

⁴ Payqa pakakunanchej chhanka kashan. Ruwasqanqa mana pantayniyojmin, tukuy ruwasqantaj cheqanmin kashan. Payqa mana llullakoj Dioschu. Payqa cheqanta ruwajmin. Payqa cheqanmin, cheqa kajtaj.

⁵ Millay ch'ichi sajra sonqo runakuna, Diosta phiñachejkuna, qankunaqa mana Diospa wawan kanaykichejpaj jinachu kankichej.

⁶ Wampu runakuna, mana yachayniyojkuna, ajinatachu Tata Diosmanqa pagankichej? Manachu payqa tataykichej, ruwasojniykichejtaj? Paymin qankunata ruwasorqachej, kawsaytataj qosorqachej.

⁷ Ñawpa watakunamanta yuyarikuychej, unaypi tiyakojkunamantataj unanchaychej. Tataykichejta, kurajniykichejkunatapis tapukuychej, paykunataj willasonqachej.

⁸ Janaj pachapi kaj Diosqa suyukunaman chayaqenkuta qorqa, tukuy runatataj rak'irarqa. Suyukunamantaj mojonninkuta churarqa, Israelpa churinkuna mashkhachus kasqankuman jina.

⁹ Tata Dios chayaqenpaj kikin ayllullantataj ajllakorqa. Paypa chayaqenqa Jacobpa miraynin.

¹⁰ Paykunata ch'innejpi tarerqa, wayraj wajtasqan ch'aki jallp'api. Chantá marq'ariykukuspa, paykunata yachacherqa. Paykunata ñawi papanta jina waqaycharqa.

¹¹ Imaynatachus ankaqa thapan patata phawaykachaspa, irpankunata phawayta yachachin, ajinallatataj Tata Diosqa lijranta aysarin, wawankunata oqharispataj, lijran patapi apan.

¹² Ajinata Tata Diosqa sapallan paykunata pusaykacharqa, nitaj waj llajtayojkunaj diosninku yanapananchu karqa.

¹³ Paykunata pata orqokunaman churarqa, jallp'api poqojtataj mikhucherqa. Chhankamanta llojsimoj misk'ita mikhucherqa, chuki rumimanta llojsimoj aceitetataj ujyacherqa.

¹⁴ Uywankumanta ñojñuta mikhorqanku, lechetataj ujyarqanku. Sumaj wira corderokunaj aychanta mikhorqanku, Basanmanta kaj wira ovejakunata, cabrakunatawan ima. Sumajnin kaj trigota mikhullarqankutaj, uvamanta sumaj vino ruwasqatapis ujyallarqankutaj.

¹⁵ Chaywanpis Israelqa manchayta qhapajyarqa, ruwajnin Diosmantataj qonqaporqa. Llosq'olla kanankukama wirayarqanku. Ruwajninku Diostataj qonqaporqanku, jark'akoj, qhespichejninkutataj pisipaj qhawarqanku.

¹⁶ Waj dioskunata yupaychaspa, Diosta celosacherqanku. Millay ch'ichita ruwaspataj, phiñakuyninta k'ajaricherqanku.

¹⁷ Diosman uywata ñak'aspa jaywanankutaqa, supaykunallaman jaywarqanku. Mana jayk'aj rejsisqanku dioskunaman, chaypachalla ruwasqa dioskunaman, tatankoj ni jayk'aj yupaychasqanku lantikunaman jaywarqanku.

¹⁸ Israelqa jark'akoj tatanmanta qonqaporqa, kawsayta qoj Diosninmanta.

¹⁹ Chayta rikuspa, Tata Diosqa mayta phiñarikorqa. Chantá qhari wawankunata, warmi wawankunata ima qhesacharqa.

²⁰ Nerqataj: Paykunata wasanchasaj, yachasajtaj imapichus tukukunankuta. Cheqamanta paykunaqa millayta ruwaspa purejkuna kanku, puraj uya wawakunataj kanku.

²¹ Manakaj dioskunata yupaychaspa, celosachiwanku. Lantinkuwan sonqoyta t'impurichiwanku. Noqapis paykunata manakaj aylluwan sonqonkuta nanachisaj, mana yuyayniyoj runakunawantaj paykunata phiñachisaj.

²² Phiñakuyneyqa nina jina lawrarin, chay ninataj ukhu pachakama lawrarenqa. Jallp'ata, tukuy imantinta q'olaykonqa. Orqokunatapis saphinmantapacha ruphaykonqa.

²³ Imaymana ñak'ariykunata paykunaj patankuman kachaykusaj. Paykunaj contrankuta arcoywan tukuy flechaykunata kacharisaj.

²⁴ Yarqhaywan, chantá k'aja onqoywan ima wañonqanku. Uj millay onqoy paykunata tukuchenqa. Paykunaman khanikoj animalkunata kachaykusaj, venenoyoj katarikunata ima.

²⁵ Ñankunapi wawanku espadawan wañuchisqa kanqanku, wasi ukhupitaj manchay manchachikuy kanqa. Waynakuna, sipaskuna, machu runakuna, ñuñoj wawakuna ima, tukuyninku wañuchisqa kanqanku.

²⁶ Noqa tiluspa nerqani, tukuynejman paykunata ch'eqerachinayta, kay jallp'a patamantataj sutinkuta chinkachinayta.

²⁷ Noqarí awqankukuna asikuspa kanankuta mana munarqanichu, nillataj wapuykachaspa ninankuta: Mana Tata Dioschu chayta ruwarqa, noqanchejmin atiyninchejwan ruwarqanchej, nispa.

²⁸ Israelitakunaqa mana yuyayniyoj kanku. Mana umachakuyta atinkuchu.

²⁹ Sichus paykuna yuyayniyoj kankuman chayqa, reparakunkuman imapichus tukukunankuta.

³⁰ Imaynamantataj uj runalla waranqa runakunata qhatiykuyta atinmanri? Imaynatataj iskay runalla chunka waranqa runakunata ayqechiyta atinkumanri? Ajina kanqa paykunata jark'akoj Tata Diosninku awqankuman jaywaykunanta nisqanrayku.

³¹ Wajkunaj jark'akojninku chhankaqa mana jark'akuwajninchej chhanka jinachu. Chayta awqanchejkunapis allinta yachanku.

³² Paykunaqa Sodoma, chantá Gomorra llajtayojkuna jina kanku. Mana allin uva chhullchu jina, venenoyoj poqoj yura jina kanku.

³³ Vinonkoqa katarej venenon jina, katarej venenon jina wañuchin.

³⁴ Tata Diosqa nin: Chay tukuy imata jallch'akushani, qhapaj kapuyniyta jina waqaychashani.

³⁵ Vengakunayqa noqajta, noqataj pagapusaj. Maychus wakichisqay p'unchaypi misk'anqanku, sonqo nanayman tukuchisqa kananku p'unchay qayllallapiña. Juzgasqa kanankupis kayllapiña kashan, nispa.

³⁶ Chaypacha Tata Diosqa pisi kallpayojta, rikuspa ayllunman kutikonqa. Tata Diosqa kamachinkunamanta khuyakonqa, manaña kallpayoj, nitaj pisi kallpayoj qhepakusqankuta rikuspa.

³⁷ Chaypacha Tata Diosqa paykunata nenqa: Maypitaj diosniykichejkuna kashanku, jap'ikorqankichej, chay jark'akusojniykichejri?

³⁸ Maypitaj kashanku uywa jaywasqaj wiranta mikhojkunari? Maypitaj kashanku vino jaywasqaykichejmanta ujyajkunari? Chaykuna qankunata yanapaj sayarimuchunku. Jinallataj qankunata jark'akoj jamuchunku.

³⁹ Yachaychej noqalla Dios kasqayta, noqamanta jawa waj dioskunaqa mana kanchu. Noqalla kawsayta qoni, chantá qhechunitaj. Noqa onqochini, jampinitaj. Mana pipis makiymanta kacharichikuyta atinmanchu.

⁴⁰ Noqaqa makiyta janaj pachaman oqharispa, wiñaypaj kawsaj Dios kasqayrayku tiluni.

⁴¹ Lliphipishaj espadayta filoyachisaj, justiciata ruwanaypaj espadayta jap'isaj, awqaykunawantaj pagachikusaj. Chejniwajkunaman ruwasqankuman jina qopusaj.

⁴² Flechaykunata yawarman chhapusaj, espadaytaj paykunata wañuchispa, tukuchenqa. K'irinchasqakunaj, chantá jap'isqakunaj yawarninkuwan ima chhapusaj, chujchasapa awqaykunata kamachejkunaj yawarninkuwan ima, nispa.

⁴³ Waj suyukuna, Diospa ayllunwan khuska kusikuychej, imaraykuchus Diosqa kamachinkunata wañuchisqankumanta pagachikonqa. Awqankunawan pagachikuspa, payqa suyunpata, ayllunpatawan ima juchankuta pampachanqa, nispa.

Moisés manaraj wañupushaspa qhepa kaj kamachisqan

⁴⁴ Chantá Moisés Nunpa churin Josuepiwan ima jamuspa, kay takiyta israelitakunaj ñawpaqenkupi qallariyninmanta tukukuyninkama ñawirerqa.

⁴⁵ Chantá Moisés israelitakunaj uyarinankuta ñawiriyta tukuytawan, paykunata nerqa:

⁴⁶ Kay tukuy nisusqaypi allinta unanchaychej, chantá wawaykichejkunata kay kamachisqakunata junt'anankuta kamachiychej.

⁴⁷ Kay nisqayqa mana qhasi manakajllachu, imaraykuchus kawsanaykichejqa chaymanta kashan. Sichus qankuna kasunkichej chayqa, kunan Jordán mayu chimpapi jap'inkichej chay jallp'api, unayta kawsankichej, nispa.

Moisesqa Canaán suyuta karullamanta rikun

⁴⁸ Chay p'unchaypacha Tata Diosqa Moisesta nerqa:

⁴⁹ Abarín orqokunaman rispa, Nebo orqoman wichariy. Chay orqoqa Moab suyupi, Jericó llajtaj chimpanpi kashan. Chay orqomantataj, israelitakunaman qosaj, chay Canaán suyuta qhawarinki.

⁵⁰ Chantá mayqen orqomanchus wicharinki, chaypi wañupunki. Jinamanta ñawpajta wañoj aylluykikunawan tantakoj ripunki, imaynatachus wawqeyki Aaronpis Hor orqopi wañupuspa, wañoj ayllunwan tantakoj riporqa, ajinata.

⁵¹ Qanwan, Aaronwan ima Zin sutiyoj ch'innejpi, chantá Cades Meribapi yaku llojsimushajtin, noqaj contrayta juchallerqankichej. Israelitakunaj ñawpaqenkupitaj mana jatunchawarqankichejchu.

⁵² Chayrayku, israelitakunaman qosaj, chay jallp'ata karullamanta rikunki. Chaywanpis mana chay jallp'aman yaykunkichu, nispa.