Deuteronomio 31 - DIOSPA QHELQACHISQ

Josué Moisespa cuentanmanta kamachinanpaj churasqa

¹ Moisés israelitakunata ujtawan nillarqataj:

² Noqaqa 120 watayojña kashani, chayrayku Manaña kayman jaqayman rinaypaj kallpay kanñachu. Chay jawa Tata Diosqa Jordán mayuta mana chimpanayta niwarqa.

³ Chaywanpis Tata Diosniykichej ñawpaqeykichejta chimpanqa. Risqaykichejman jinataj chay suyukunapi runata chinkachenqa, jallp'ankutataj jap'ikapunkichej. Tata Dios nisqanman jina, Josué kurajniykichej jina, ñawpaqeykichejta rispa pusasonqachej.

⁴ Imaynatachus Tata Dios amorreokunaj kuraj kamachejninku Sijonta, chantá Ogta ima ruwarqa, ajinallatataj chay suyukunapi runata chinkachinankama ruwanqa.

⁵ Tata Dios chay suyukunata makiykichejman jaywaykusojtiykichejqa, qankuna kamachisqayman jina paykunawan ruwanaykichej tiyan.

⁶ Jinaqa kallpachakuspa wapu kaychej. Chay runakunata ama manchachikuychejchu, nitaj kharkatitiychejchu, imaraykuchus Tata Diosniykichejqa qankunawan kashan. Payqa mana saqerpayasonqachejchu, nitaj wijch'urpayasonqachejchu, nispa.

⁷ Chantá Moisesqa Josueta wajyaspa, tukuy israelitakunaj ñawpaqenkupi kay jinata nerqa: Kallpachakuy, chantá wapu kay. Qanmin israelitakunata chay jallp'aman pusanayki tiyan, Tata Dios ñawpa tatankuman tiluspa qonanta nerqa, chayman. Qan chay jallp'ata jap'inankupaj pusaykunki.

⁸ Tata Dios pay kikinpuni ñawpaqeykita renqa, qanwantaj kanqa. Payqa mana saqerpayasonqachu, nitaj qonqarparisonqachu. Ama manchachikuychu, nitaj kharkatitiychu, nispa.

Diospa kamachisqan qhelqasqata ñawirina

⁹ Moisesqa kay kamachisqata qhelqaspa, Tata Diospa trato ruwasqan arcata apajkuna Leví jatun ayllumanta sacerdotekunaman, chantá israelitakunaj tukuy kurajninkuman ima jaywarqa.

¹⁰ Chantá kamacherqa: Sapa qanchis watapi, manu qonqapuna chay watapi, Ch'ujlla Ruwana raymipi,

¹¹ tukuy israelitakuna Diospa ñawpaqenpi, pay ajllakonqa chay cheqapi tantakunkichej. Chantá kay kamachisqakuna qhelqasqata tukuy israelitakunaj uyarinankuta ñawirinkichej.

¹² Tukuy israelitakuna, qharikuna, warmikuna, wawakuna, chantá llajtaykichejpi tiyakoj waj llajtayojkuna ima tantakunanku tiyan, kamachisqakuna qhelqasqata uyarinankupaj, Tata Diosniykichejta jatunchayta yachaqakunankupaj, chantá manchachikuspa kay kamachisqakunata junt'anankupaj ima.

¹³ Ajinata ruwajtiykichej, wawaykichejkuna, pikunachus kamachisqakunamanta mana yachajkuna uyarispa, Tata Diosta may jatun respetowan qhawayta yachanqanku. Ajinata ruwankichej Jordán mayuta chimpaspa jallp'ata jap'inkichej, chaypi kawsanaykichejkama, nispa.

Moisés manaraj wañupushajtin, Tata Diospa qhepa kamachisqan

¹⁴ Chantá Tata Diosqa Moisesta nillarqataj: Wañupunayki qayllallapiña kashan. Ajinaqa Josueta wajyay, chantá iskayniykichej Dioswan Tinkukuna Toldoj pationpi suyawaychej. Noqataj payman imatachus ruwananta kamachisaj, nispa. Chantá Moiseswan, Josuewan ima Dioswan Tinkukuna Toldoman rerqanku.

¹⁵ Chaypitaj Tata Dios sayashaj phuyu ukhupi paykunaman rikhurerqa, chay phuyutaj Dioswan Tinkukuna Toldo punkupi sayarqa.

¹⁶ Chaymantá Tata Diosqa Moisesta nerqa: Qanqa wañupunkiña. Kay israelitakunarí kunan yaykonqanku, chay jallp'api waj suyukunaj diosninkukunata yupaychaspa juchallenqanku. Jinata ruwaspa, paykunaqa qonqapuwanqanku, paykunawan ruwasqay tratotataj p'akenqanku.

¹⁷ Ajina kasqanrayku phiñakuyneyqa paykunaj contrankuta k'ajarenqa. Paykunata saqerparisaj, manañataj qhawarisajchu. Chay chhika nanaykuna, llakiykuna ima patankuman jamojtintaj, nenqanku: Manachu kay llakiykuna manaña Diosninchej noqanchejwan kasqanrayku qhatirishawanchej? nispa.

¹⁸ Chaypacha noqaqa astawan paykunamanta karunchakusaj, waj dioskunata yupaychaspa chay tukuy millayta ruwasqankumanta.

¹⁹ Kunanqa kay takiyta qhelqaspa, takirikunankupaj israelitakunaman yachachiy. Kay takeyqa paykuna yuyarikunankupaj kanqa.

²⁰ Ñawpa tatankuman tiluspa qonayta nerqani, chayman paykunata pusaykusaj. Chay jallp'apeqa lechewan, abeja misk'iwan yaku jina purishan. Chaypi sajsakunankukama mikhuspa wirayanqanku, chantá waj dioskunaj qhepanta rispa, yupaychanqanku. Noqata pisipaj qhawawaspataj, ruwasqay tratota p'akenqanku.

²¹ Chay chhika nanaykuna, llakiykuna ima patankuman jamojtintaj, kay takiymanta yuyarikonqanku, imaraykuchus mirayninku yuyarikuspa takenqanku. Paykuna qonayta nerqani, chay jallp'aman manaraj yaykunkurajchu chaypis, noqa paykuna sonqonku ukhupi imatachus yuyashasqankuta yachaniña, nispa.

²² Chantá Moisesqa chay p'unchaypacha kay takiyta ruwaspa, israelitakunaman yachacherqa.

²³ Tata Diostaj Nunpa churin Josueman kay jinata kamacherqa: Qanqa kallpachakuy, waputaj kay, imaraykuchus qanmin israelitakunata, paykunaman qonayta nerqani, chay jallp'aman pusaykunki. Noqataj qanwanpuni kasaj, nispa.

²⁴ Chantá Moisés kay kamachisqakunata uj p'anqaman qhelqayta tukuytawan,

²⁵ Diospa trato ruwasqan arcata apajkuna levitakunata nerqa:

²⁶ Kay qhelqata jap'ispa, Tata Diosniykichejpa trato ruwasqan arcaj qayllanman churaychej, chaypi qankunaj contraykichejpi parlananpaj.

²⁷ Noqa yachani qankunaqa mana kasukoj rumi sonqo kasqaykichejta. Qankunaqa noqa kawsashajtillayraj Tata Diosta mana kasorqankichejchu. Q'aya minchha noqa wañupojteyqa, astawanrajchá mana kasunkichejchu.

²⁸ Kunanqa sapa jatun ayllumanta kuraj kamachejkunata, kurajkunatawan ima kayman pusamuwaychej, kay imakunamanta paykunaman parlanaypaj. Noqaqa paykunaj contrankuta janajta, chantá kay pachatawan ima testigota jina churasaj.

²⁹ Noqa yachani wañupusqaymanta qhepaman qankunaqa manaña Diosta kasunaykichejta, yachachisqaytapis mana kasuta ruwanaykichejta. Yachallanitaj qhepamanqa sinch'i llakiykuna qhatirisunaykichejta, Tata Diospa ñawpaqenpi mana allin kajta ruwasqaykichejrayku, millayta ruwaspataj, payta phiñachisqaykichejrayku, nispa.

Moisespa takiynin

³⁰ Chantá Moisesqa kay takiyta israelitakunaj rikunankuta qallariyninmantapacha tukukuyninkama ajinata ñawirerqa: