Deuteronomio 30 - DIOSPA QHELQACHISQ

Saminchasqa kanapaj Tata Diosman kutirikuna

¹ Chantá Moisés nillarqataj: Sichus ajllakunaykichejpaj kunan willasqay saminchaykuna, chayrí llakiykuna chayamusunkichejman chayqa, Tata Diosniykichej wijch'usonqachej chay suyukunapi kunan nisqaypi unanchankichej.

² Chantá sichus qanwan, churiykikuna ima Tata Diosman kutirikunkichej, tukuy sonqowan, tukuy almataj payta kasunkichej, imaynatachus kunan kamachishaykichej ajinata chayqa,

³ chaypacha Tata Diosniykichejqa karu llajtamanta kutichimusonqachej, khuyakusonqachejtaj. Ujtawantaj maykunamanchus wijch'usorqachej, chaymanta tantamusonqachej.

⁴ Kay pachaj k'uchunkamapis ch'eqerachisqa kawajchej chaypis, chaymantapacha Tata Diosniykichejqa kutirichimusonqachej.

⁵ Ajinata ruwaspa Tata Diosniykichejqa, tataykichej jap'erqanku, chay jallp'aman ujtawan kutichimusonqachej, qankunataj ujtawan chay jallp'ata jap'inkichej. Chaypi Tata Diosqa allin risunanpaj yanapasonqachej, ñawpa tataykichejmantapis astawanraj mirachisonqachej.

⁶ Tata Diosniykichejqa qankunaj sonqoykichejta, chantá wawaykichejkunaj sonqonkutapis kasukuyta munana sonqota ruwasonqachej, payta tukuy sonqoykichejwan, tukuy almaykichejwan ima munakunaykichejpaj. Ajinata ruwasqaykichejrayku unayta kawsankichej.

⁷ Tata Diosniykichejqa chay tukuy llakiykunata awqaykichejpa patanman kachaykonqa, pikunachus chejnikuspa qhatiykachasorqachej, chaykunaman.

⁸ Qankunaqa Tata Diosman kutirikunkichej, kunan kamachishaykichej, chaykunata kasuspataj, junt'ankichej.

⁹ Chantá Tata Diosqa tukuy ima ruwasqaykichejpi allin risunanta ruwanqa. Ashkha wawayoj kankichej, ashkha uywayoj ima. Jinallataj Diosqa chajraykichejta sumajta poqochenqa. Tata Diosniykichejqa qankunapaj ujtawan allinta ruwaspa, kusikonqa, imaynatachus ñawpa tataykichejkunapaj allinta ruwaspa kusikorqa, ajinata.

¹⁰ Ajina kanqa maypachachus Tata Diosniykichejpa nisqanta kasunkichej, chantá kamachisqanta, kay qhelqapi kamachisqakunata ima junt'ankichej, chaypacha. Jinallataj tukuy sonqo, tukuy almaykichejwan ima Tata Diosman kutirikunkichej chaypacha, Tata Dios manchayta kusikonqa.

¹¹ Kay kamachisqakunata kunan qoshaykichej chayqa kasunapaj jinalla, pipis junt'ayta atinanpaj jinalla kashan.

¹² Kay kamachisqakunaqa mana janaj pachapichu kashan, ninaykichejpaj: Pitaj janaj pachaman wicharipuwasunman apamuspa rejsichinawanchejpaj, yachaspataj chayman jina ruwananchejpaj? nispa.

¹³ Manataj mama qochaj chimpanpichu kashan ninaykichejpaj: Pitaj mama qochata chimpapuwasunman apamuspa rejsichinawanchejpaj, yachaspataj chayman jina ruwananchejpaj? nispa.

¹⁴ Mana jinata ninaykichejpaj kanchu, imajtinchus kamachisqakunaqa qankunawan kashan, simiykichejpi, sonqoykichejpi ima junt'ayta atinaykipaj jina.

¹⁵ Chayrayku kunan ñawpaqeykichejman churani kawsayta, wañuytawan, allin kajta, chantá mana allin kajtawan ajllakunaykichejpaj.

¹⁶ Sichus kunan kamachishaykichej, chaykunata kasunkichej, Tata Diosta munakuspa munasqanman jina purispa, kamachisqanta, yuyaychasqanta, nisqantawan ima junt'aspa chayqa, kawsayta rikunkichej, ashkha wawayojtaj kankichej. Tata Diosniykichejtaj qosonqachej, chay jallp'api saminchasonqachej.

¹⁷ Sitajchus kay tukuy kamachisqakunata mana kasuspa, waj dioskunaman qonqorikuspa yupaychanaykichejpaj sonqoykichejwan aysachikuwajchej chayqa,

¹⁸ cheqatapuni niykichej wañuchisqapuni kanaykichejta. Jordán mayuta chimpaspa, jap'isqaykichej jallp'api mana unaytachu tiyakunkichej.

¹⁹ Jinaqa janajta, kay pachatawan ima testigota jina churani, kawsayta, chayrí wañuyta, chantá saminchasqa kanata, chayrí maldicisqa kanatachus ajllakunaykichejpaj nisusqaymanta. Noqarí niykichejman, astawan walej kanman qan, jinataj wawaykikuna ima kawsayta ajllakunaykichej.

²⁰ Jinallataj Tata Diosniykichejta munakuychej, kasuychej, chantá payta mana wasanchaspa qhatikuychej ima. Ñawpa tataykichej Abrahamman, Isaacman, Jacobman ima Tata Dios tiluspa qonanta nisqan jallp'api unayta kawsanaykichejpajqa, qankunamantamin kashan, nispa.