Deuteronomio 29 - DIOSPA QHELQACHISQ

Tata Dios israelitakunawan ujtawan tratota ruwan

¹ 1 (28.69) Tata Diosqa Horeb orqopi israelitakunawan tratota ruwasqanmanta qhepata, Moisesta kamacherqa Moab suyupi israelitakunawan ujtawan uj tratota ruwananta.

² 2 (1) Chantá Moisés israelitakunata tantachispa, nerqa: Qankuna Egiptopi kashaspa, Tata Dios imatachus faraonta ruwasqanta rikorqankichej, jinallataj tukuy kamachinkunata, chantá jallp'anta ima imatachus ruwasqanta.

³ 3 (2) Qankunaqa musphana ruwasqanta, runa mana jayk'aj rikusqan t'ukunata, chantá manchay t'ukunapaj jina ruwasqanta rikorqankichej.

⁴ 4 (3) Chaywanpis kunankama Tata Diosqa entiendej sonqota manaraj qosunkichejchu, nitaj reparanaykichejta munanchu imaraykuchus chaykunata ruwasqanta.

⁵ 5 (4) Noqaqa tawa chunka wata junt'ata ch'in pampata pusamorqaykichej. Ch'innejta jamushajtiykichejqa, ni p'achaykichej, nitaj juk'utaykichejpis thantakorqachu.

⁶ 6 (5) Manallataj t'antata mikhorqankichejchu, nitaj vinota, ni ima machachikoj ujyanatapis ujyarqankichejchu, Tata Diosqa qankunaj Diosniykichej kasqanta yachanaykichejpaj.

⁷ 7 (6) Kay jallp'aman chayamojtinchej, Jesbonmanta kuraj kamachej Sijón, chantá Basanta kuraj kamachej Ogwan ima noqanchejwan maqanakoj llojsimorqanku. Paykunatataj atiparqanchej.

⁸ 8 (7) Chaymantataj suyunkuta jap'ispa, Rubén jatun aylluman, Gad jatun aylluman, chantá Manasespa khuskan jatun aylluman ima qoporqanchej.

⁹ 9 (8) Chayrayku qankunaqa tukuy ima ruwasqaykichejpi allin risunaykichejpaj, kay tratopi imatachus nisqanta junt'aychej, ruwaychejtaj.

¹⁰ 10 (9) Kunan Tata Diosniykichejpa ñawpaqenpi tukuyniykichej tantasqa kashankichej: Sapa jatun aylluta kamachejkuna, kurajkuna, capitankuna, Israelmanta qharikuna,

¹¹ 11 (10) wawakuna, warmikuna, qankunawan tiyakoj waj llajtayojkuna, pikunachus llant'ata pallanku, chantá yakuta aysanku ima kaypi kashankichej.

¹² 12 (11) Tata Diosniykichej qankunawan tratota ruwasqanta junt'anaykichejta tilunkichej.

¹³ 13 (12) Jinallataj Tata Diosqa nisusqanman jina, chantá ñawpa tataykichej Abrahamman, Isaacman, chantá Jacobman ima tiluspa nisqanman jina, kunan sut'inchasunkichej paypa ayllun kasqaykichejta, paytaj Diosniykichej kasqanta.

¹⁴ 14 (13) Tata Diosqa tiluspa, kay tratota mana qankunallawanchu ruwan.

¹⁵ 15 (14) Manachayqa pikunachus manaraj kunan noqanchejwanchu Tata Diospa ñawpaqenpi kashanku, chaykunawanpis ruwallantaj.

¹⁶ 16 (15) Qankunaqa imaynatachus Egiptopi tiyakusqanchejta sumajta yachankichej, yachallankichejtaj imaynatachus waj suyukunaj jallp'ankunanejta pasamusqanchejta.

¹⁷ 17 (16) Chay suyukunanejta jamushaspa, k'ullumanta, rumimanta, qolqe metalmanta, qorimanta ima ruwasqa lantikunata chay llajtayojkuna yupaychasqankuta rikorqanchej. Chay lantikunaqa millay chejnina kanku.

¹⁸ 18 (17) Qankuna ukhupi qhari, warmi, wasi ayllu, chayrí ima ayllupis Tata Diosninchejta qhesachaspa, chay suyukunaj diosninkukunata yupaychaj ama kachunchu. Pikunachus jinata ruwajkunaqa jaya qhora jina, chayrí venenoyoj qhora jina kankuman.

¹⁹ 19 (18) Ichá pipis tiluspa kay trato ruwasqapi imatachus nisqanta uyarishaspa, sonqonpi ninman: Mana kasukuspa sonqoypa munasqanta ruwasaj chaypis, allillanpuni riwanqa, nispa chayqa, chay runarayku tukuyniykichejta mana allinchu risonqachej.

²⁰ 20 (19) Tata Diosqa chay runaj juchanta mana pampachayta munanqachu, manachayqa k'arajta chay runaj contranta phiñakonqa. Kay qhelqapi qhelqasqa kaj tukuy llakiykunataj patanpi kanqa. Ajinata ruwaspa, Tata Diosqa chay runaj sutinta kay pachamanta chinkachenqa.

²¹ 21 (20) Tata Diosqa chay runata tukuy Israel ayllumanta ñak'arichisqa kananpaj t'aqanqa. Kay trato ruwasqapi qhelqasqa kasqanman jina, tukuy llakiykuna payman chayanqa.

²² 22 (20) Qhepanejman wawaykichejkuna, jinallataj waj llajtayojkuna ima Tata Dios kay jallp'aman imaymana ñak'ariykunata, onqoykunata ima apachimusqanta rikonqanku.

²³ 23 (22) Tukuy suyu azufrella, kachilla, ruphasqa jallp'alla kasqanta rikonqanku. Chay jina jallp'api mana imatapis tarpuyta atenqankuchu, nitaj imapis poqoyta munanqachu. Ni qhorallapis wiñanqachu. Imaynatachus Tata Dios sinch'i phiñakusqanrayku Sodoma llajtata, Gomorrata, Admata, chantá Zeboyin llajtata ima chinkarparicherqa, ajinallataj suyuykichejta ch'inman tukuchenqa.

²⁴ 24 (23) Chayrayku tukuy suyumanta runakuna tapukonqanku: Imaraykutaj Tata Dios kay suyuta chay jinata ruwanri? Imaraykutaj Tata Dios kay suyoj contranta chay jina k'arajta phiñakorqari? nispa.

²⁵ 25 (24) Kutichenqankutaj: Ñawpa tatankoj Tata Diosnin Egiptomanta orqhomuspa, paykunawan uj tratota ruwasqa. Paykunataj chay tratota qonqapuspa, mana junt'asqankuchu.

²⁶ 26 (25) Paykunaqa qonqorikuspa waj dioskunata yupaycharqanku. Chay dioskunata mana ni jayk'ajpis rejserqankuchu, nitaj chay lantikuna paykunaman imatapis qorqankuchu.

²⁷ 27 (26) Chayrayku Tata Diosqa kay suyoj contranta phiñakuspa, kay qhelqapi llakiykuna qhelqasqa kashan, chaykunata paykunaj patankuman kachaykamorqa.

²⁸ 28 (27) Sinch'i k'arajta phiñakuspataj, paykunata karu suyuman wijch'orqa, imaynachus kunan kashanku, ajina, nispa.

²⁹ Pakasqa imakunaqa Tata Diosninchejpata kashan. Diosninchej sut'inchawasqanchejrí noqanchejpata, wawanchejkunajtawan ima wiñaypaj kanku, tukuy chay kamachisqakunata junt'ananchejpaj.