Deuteronomio 27 - DIOSPA QHELQACHISQ

Israelitakuna Canaanman yaykunankupaj wakichikunku

¹ Moiseswan, chantá tukuy kurajkunawan ima israelitakunata kay jinata kamacherqanku: Kunan kamacherqaykichej, chaykunata tukuyninta kasuychej.

² Maypachachus Jordán mayuta chimpaspa, Tata Diosniykichej qosonqachej chay jallp'aman yaykunkichej chaypacha, jatuchaj rumikunata sayachispa, calwan llut'aykunkichej.

³ Chantá chay jallp'aman chayaytawankama, chay rumikunapi kay tukuy kamachisqayta qhelqankichej, maypichus lechewan, abeja misk'iwan yaku jina purishan, chay jallp'api. Chay jallp'ata Tata Diosniykichej ñawpa tataykichejkunaman nisqanman jina qosonqachej.

⁴ Ajinaqa Jordán mayuta chimpaytawankama Ebal orqo patapi chay rumikunata calwan llut'aspa sayachinkichej, kunan kamachisusqayman jina.

⁵ Chantá chaypi Tata Diosniykichejpaj rumimanta uj altarta ruwankichej. Chay rumikunaqa mana ch'eqosqachu kananku tiyan.

⁶ Jinataj mana ch'eqosqa rumikunamanta altartaqa ruwaspa, chay patapi q'olachisqa jaywanata Tata Diosniykichejman jaywankichej.

⁷ Chantá k'achata kawsakuy jaywanata jaywallankichejtaj. Chaypitaj Tata Diosniykichejpa ñawpaqenpi mikhunkichej, chantá kusikunkichej ima.

⁸ Kunan qankunata kamachishaykichej, chaykunata chay rumikunapi sumaj sut'ita qhelqankichej, nispa.

⁹ Chantá Moisés, Leví jatun ayllumanta sacerdotekunawan khuska israelitakunata kay jinata nillarqataj: Israelitakuna, ch'inyakuychej, kay nisqayta uyariychej: Kunan qankunaqa Tata Diosniykichejpa ayllunman tukunkichej.

¹⁰ Chayrayku qankunaqa payta uyarinaykichej tiyan, jinataj kunan kamachishaykichej, chay kamachisqanta, chantá yuyaychasqantawan ima junt'anaykichej tiyan, nispa.

Mana kasukojkuna maldicisqa kanqanku

¹¹ Chay p'unchaypacha Moisés israelitakunata kay jinata kamachillarqataj:

¹² Jordán mayuta chimpajtiykichejkama, israelitakunata saminchanankupaj Guerizín orqoman kay jatun ayllukuna wicharenqanku: Simeón, Leví, Judá, Isacar, José, chantá Benjamín ima.

¹³ Mana kasukojkuna maldicisqa kanankuta ninankupajtaj, Ebal orqoman kay jatun ayllukuna wicharenqanku: Rubén, Gad, Aser, Zabulón, Dan, chantá Neftalí ima.

¹⁴ Chantá levitakunaqa jatunmanta parlaspa, tukuy israelitakunata kay jinata nenqanku:

¹⁵ Maldicisqa kachun pichus k'aspimanta, chayrí metalta unuyachispa lantita ruwajqa, chayrí yachajwan lantita ruwachikuspa pakajqa. Chayqa Tata Diospaj manchay millachikunamin, nispa. Chantá tukuy israelitakuna nenqanku: Ajina kachun, nispa.

¹⁶ Jinallataj levitakuna nillanqankutaj: Maldicisqa kachun pichus tatanta, mamanta pisipaj qhawajqa, nispa. Tukuy israelitakunataj nenqanku: Ajina kachun, nispa.

¹⁷ Chantá nillanqankutaj: Maldicisqa kachun pichus qayllanpi kaj runa masinpa jallp'anpa mojonninta suchuchispa suwajqa, nispa. Tukuy israelitakunataj nenqanku: Ajina kachun, nispa.

¹⁸ Chantá levitakuna nillanqankutaj: Maldicisqa kachun pichus ñawsa runata q'otiyaspa ñanninmanta musphachejqa, nispa. Tukuy israelitakunataj nenqanku: Ajina kachun, nispa.

¹⁹ Levitakuna nillanqankutaj: Maldicisqa kachun pikunachus waj llajtayojkunaj contranpi, chayrí warmisapaj, chayrí wajcha wawakunaj contranta ima justiciata q'ewejkuna, nispa. Tukuy israelitakunataj nenqanku: Ajina kachun, nispa.

²⁰ Nillanqankutaj: Maldicisqa kachun tatanpa warminwan pichus puñuykojqa, tatanta p'enqaypi rikhurichisqanrayku, nispa. Tukuy israelitakunataj nenqanku: Ajina kachun, nispa.

²¹ Chantá levitakuna nillanqankutaj: Maldicisqa kachun pichus ima animalwanpis warmiwan jina t'inkinakojqa, nispa. Tukuy israelitakunataj nenqanku: Ajina kachun, nispa.

²² Jinallataj levitakuna nillanqankutaj: Maldicisqa kachun tatanmanta pananwan, chayrí mamanmanta pananwan pichus puñuykojqa, nispa. Tukuy israelitakunataj nenqanku: Ajina kachun, nispa.

²³ Nillanqankutaj: Maldicisqa kachun warminpa mamanwan pichus puñuykojqa, nispa. Tukuy israelitakunataj nenqanku: Ajina kachun, nispa.

²⁴ Chantá levitakuna nillanqankutaj: Maldicisqa kachun pichus runa masinta wasanchaspa wañuchejqa, nispa. Tukuy israelitakunataj nenqanku: Ajina kachun, nispa.

²⁵ Levitakuna nillanqankutaj: Maldicisqa kachun pichus mana juchayoj runata wañuchinanpaj qolqeta jap'ejqa, nispa. Tukuy israelitakunataj nenqanku: Ajina kachun, nispa.

²⁶ Chantá nillanqankutaj: Maldicisqa kachun pichus Diospa kay tukuy nisqanta mana kasojqa, nitaj ruwajqa, nispa. Tukuy israelitakunataj nenqanku: Ajina kachun, nispa.