Deuteronomio 26 - DIOSPA QHELQACHISQ

Ñawpaj kaj poqoyta Diosman jaywana

¹ Maypachachus Tata Diosniyki jallp'ata qosonqa, chantá chaypiña tiyakunki chaypacha,

² chay jallp'api tarpuspa, oqharisqaykimanta ñawpaj kaj poqoyta t'aqaspa uj canastaman churanki. Chantá Tata Diosniyki may cheqatachus sutin jatunchasqa kananpaj ajllakonqa, chayman apanki.

³ Chaypitaj sacerdote mit'anpi kashajman qayllaspa, ninki: Noqaqa kunan Tata Diospa ñawpaqenpi nini, Tata Dios ñawpa tatanchejkunaman tiluspa qonanta nerqa, chay jallp'api tiyakushasqaytaña, nispa.

⁴ Chantá sacerdoteqa chay apasqayki canastata jap'ispa, Tata Diosniykej altarninpa ñawpaqenman churanqa.

⁵ Chaypacha Tata Diosniykej ñawpaqenpi kay jinata nillankitaj: Ñawpa tatayqa Arammanta karqa. Ayllun pisillaraj kashajtin, Egiptoman ripuspa, chaypi tiyakorqa. Chantá chaypi ashkhata miraspa, sinch'i atiyniyoj aylluman tukorqa.

⁶ Chaypitaj Egipto llajtayojkuna mayta ñak'arichiwarqanchej, llakichiwarqanchej ima, chantá wata runata jina sinch'ita ñak'arichiwarqanchej.

⁷ Chaypacha ñawpa tataykoj Tata Diosninmanta yanapanawaykuta mañakorqayku. Paytaj mañakusqaykuta uyariwarqayku. Llakiyniykuta, sinch'i ruwanaman churasqa kasqaykuta, chantá k'umuykachachisqa kasqaykuta ima rikullarqataj.

⁸ Ajinata Tata Diosniykoqa jatun atiyninta rikuchispa, Egiptomanta orqhomuwarqayku, runaj mana jayk'aj rikusqan t'ukuna imakunata ruwaspa.

⁹ Chaymantataj kayman pusamuspa, lechewan, abeja misk'iwan purishaj jallp'ata qowarqayku.

¹⁰ Chayrayku kunan, Tata Diospa qowasqan jallp'aj ñawpaj kaj poqosqanta apamuni, nispa. Chantá chay canastata Tata Diosniykej ñawpaqenman churanki, qonqorikuspataj, payta yupaychanki.

¹¹ Chaymantaqa tukuy aylluykiwan, qanwan tiyakoj levitakunawan, jinallataj llajtaykipi tiyakoj waj llajtayojwan ima mayta kusikunki, Tata Diosniyki qanman, chantá aylluykiman ima, tukuy imata qosusqanmanta.

Sapa kinsa kaj watapi Tata Diospaj t'aqapuna

¹² Sapa kinsa kaj watapi chunkamanta ujta qona watapi, tukuy poqochisqaykimanta sapa chunkamanta ujta t'aqanki. Chay t'aqasqaykitaqa levitakunaman, llajtaykipi tiyakoj waj llajtayojman, wajcha wawakunaman, llajtaykipi kaj warmisapakunaman ima qonki, paykuna sajsakunankukama mikhunankupaj.

¹³ Chaymantataj Tata Diosniykej ñawpaqenpi ninki: Imatachus Tata Diosniypaj t'aqasqayta wasiymanta orqhomuspa, niwasqaykiman jina qoniña levitakunaman, waj llajtayojkunaman, wajcha wawakunaman, warmisapakunaman ima. Mana qonqaspa, kamachiwasqaykita kasuspa, tukuyninta junt'ani.

¹⁴ Wañusqayoj llakisqa kashaspa, chayrí mana llimphupaj qhawasqa kashaspa, manapuni chay t'aqasqay mikhunamanta mikhorqanichu. Nillataj wañusqakunamanpis jaywarqanichu. Tata Diosníy, niwasqaykita kasuni, kamachiwasqaykiman jinataj tukuy imata ruwani.

¹⁵ Diosníy, janaj pachamanta qhawarimuy, tiyakunki chaymantapachataj Israel aylluykita saminchay. Jinallataj kay qowasqayku jallp'ata, maypichus lechewan, abeja misk'iwan yaku jina purishan, chayta saminchallaytaj, ñawpa tataykunaman nisqaykiman jina, nispa.

Israelqa Tata Diospaj t'aqasqa ayllu

¹⁶ Kunanqa Tata Diosniyki kay kamachisqakunata, yuyaychaykunata ima junt'anaykita kamachisunki. Chaykunataqa tukuy sonqoykiwan, tukuy almaykiwan ima kasuspa ruway.

¹⁷ Israelitakuna kunan p'unchay Tata Diosqa Diosniyki kasqanta sut'inchankichej. Jinallataj nisqanta kasuspa purinaykichejta, kamachisqankunata, yuyaychayninkunata, chantá nisqanta ima junt'anaykichejta nillankichejtaj.

¹⁸ Jinallataj Tata Diospis kunan nisunkichej, nisusqanman jina qankuna paypa ayllun kasqaykichejta. Ajinaqa tukuy kamachisqanta junt'aychej.

¹⁹ Payqa tukuy sayachisqan suyukunamanta qankunata aswan pataman churasonqachej, manchay uyarisqa, maypaj qhawana kanaykichejpaj. Ajinaqa nisqanman jina qankuna Tata Diosniykichejpaj t'aqasqa suyu kankichej, nispa.