Deuteronomio 25 - DIOSPA QHELQACHISQ

¹ Sichus iskay runakuna ima jawa ch'ajwachinakunku chayqa, justiciata tarinankupaj juezkunaman richunku. Juezkuna mana juchayojta mana juchachanqankuchu, juchayojtataj juchayoj kasqanta nenqanku.

² Sichus juchayoj runa jasut'inapaj jina kanman chayqa, juezqa chay runata pampaman winkuchispa, paypa rikunanta juchanman jina seq'onankuta kamachenqa.

³ Tawa chunkakamalla seq'oyta atenqanku, chaymanta astawanqa mana, imajtinchus astawan seq'oyqa qankunaj ñawpaqeykichejpi p'enqaypi rikhurichiy kanman.

⁴ Trillaj bueymanqa ama ñukuta churankichejchu.

Runa mana wawayoj wañupojtin imatachus ruwana

⁵ Sichus uj runa wawqenwan khuska uj wasillapi tiyakunman, ujnintaj mana wawata rejsispa wañupunman chayqa, warmin mana waj qhariwan casarakuyta atenqachu. Qosanpa wawqellanwan casarakuyta atenqa, ajinamanta wañojpa sutin ama chinkananpaj.

⁶ Chay warmejta kuraj kaj churenqa ñawpaj qosanpaj churin jina qhawasqa kanqa. Ajinamanta chay warmej ñawpaj qosanpa sutin Israel ukhumanta mana chinkanqachu.

⁷ Sichus chay qhari wawqenpa warminwan casarakuyta mana munanman chayrí, chay warmeqa llajtamanta kurajkunaman rispa, kay jinata nenqa: Wañoj qosaypa wawqenqa mana noqawan casarakuyta munanchu, wawqenpa sutin Israel ukhumanta ama chinkananpaj, nispa.

⁸ Chantá llajtamanta kurajkuna chay qharita wajyaspa, paywan parlanqanku. Sichus parlapayashajtinkupis manapuni chay warmiwan casarayta munanmanchu chayqa,

⁹ chaypacha wañoj wawqenpa warmin chimpaytawan, tukuy kurajkuna qhawashajtinku, chay qharej ujnin juk'utanta lluch'onqa. Chantá uyanpi thoqaykuspa, nenqa: Ajinata wawqenpa mirayninta chinkachiyta munaj qhariwan ruwana, nispa.

¹⁰ Jinamanta chay runaj ayllun Israel ukhupi sutichasqa kanqa “Juk'uta lluch'uchikoj runaj ayllun”, nisqa.

Waj kamachisqakuna

¹¹ Ichapis iskay qharikuna maqanakushajtinku, ujninpa warmin qosanta jark'akuyta munaspa qayllaykunman, chantataj qosanta maqaj qharita khapanmanta jap'iykunman chayqa,

¹² ama khuyakuspa chay warmej makinta khuchunkichej.

¹³ Rantinaykichejpaj, chantá vendenaykichejpaj ima, ama suwa romanata apaykachankichejchu.

¹⁴ Nillataj wasiykichejpi rantinaykichejpaj jatun tupu, nitaj vendenaykichejpaj juch'uy tupu kanqachu.

¹⁵ Manachayqa imatapis cabalta pesanaykichejpaj, jinallataj tupunaykichejpaj uj rejlla kanan tiyan, Tata Diosniykichej jallp'ata qosunkichej, chaypi unayta kawsakunaykichejpaj.

¹⁶ Tata Diosqa chay jinata ruwajkunata, ch'awkiyajkunatapis millachikun.

Amalecitakunata tukuchinapaj kamachisqakuna

¹⁷ Qankuna Egiptomanta llojsimushajtiykichej, amalecitakuna imatachus ruwasusqanta ama qonqankichejchu.

¹⁸ Ñanta sayk'usqa jamushajtiykichej, paykunaqa Diosta mana manchachikuspa maqanakoj sayaykusorqachej, qhepaykichejmantataj pisipaspa qhepakojkunata wañuracherqanku.

¹⁹ Chayrayku Tata Diosniykichej qayllaykichejpi kaj tukuy awqaykichejmanta kacharichisojtiykichej, jinataj jallp'ata qosojtiykichejqa, amalecitakunatañataj wañuchispa chinkachinkichej. Amapuni chay jinata ruwayta qonqankichejchu.