Deuteronomio 24 - DIOSPA QHELQACHISQ

Qhari warmi t'aqanakunamanta

¹ Sichus uj qhari warmichakuspa, qhepanejman warmin mana allin ruwasqanta yachanman chayqa, warminmanta t'aqakuyta atin. Chaypajqa t'aqanakuy papelta warminman qopuspa, wasinmanta kachaponqa.

² Chantá chay warmi qosanpa wasinmanta ripuspa, waj qhariwanñataj casarakuyta atenqa.

³ Sichus qhepa kaj qosanñataj payta chejninman chayqa, t'aqanakuy papelta payman jaywanqa, jinaspataj, kachaponqa. Chayrí sichus chay qhepa kaj qosan wañupunman chayqa,

⁴ ñawpaj kaj qosan manaña ujtawan paywan casarakuyta atenqachu, chay warmej honran t'akasqa kasqanrayku. Chay jina ruwanaqa Tata Diospa ñawpaqenpi manchay millaymin kanman. Tata Diosniyki jallp'ata qosusqanta ama ch'ichichankichu.

Runa masimanta qhawarinapaj kamachisqakuna

⁵ Sichus uj qhari chaypachallaraj warmichakun chayqa, maqanakuman mana rinanchu tiyan, nitaj ima junt'anata ruwananchu tiyan, wasinpi uj wata junt'ata warminwan kusikunanpaj.

⁶ Ama pejpatapis maranninta, chantá uña maranninta ima prendata jina jap'inkichejchu. Chaykunata prendata jina jap'inaqa runaj kawsaynintapis prendata jap'ishawaj jina kanman.

⁷ Sichus mayqellanpis llajta masinta suwaspa, wata runa kananpaj, chayrí vendenanpaj apanman, jap'ichikunmantaj chayqa, chay runa suwataqa wañuchinkichej. Ajinata ruwaspa, chay jina millay ruwanata qankuna ukhumanta chinkachinkichej.

⁸ Llejti onqoymantaqa imaynatachus Leví jatun ayllumanta sacerdotekuna kamachisusqaykichejman jina ruwaychej. Chaytaqa imaynatachus noqa paykunaman kamachisqayman jina kikinta ruwaychej.

⁹ Allinta yuyarikuychej Egiptomanta llojsimushajtiykichej, Tata Dios imaynatachus llejtiwan Mariata onqochisqanta.

¹⁰ Sichus runa masiykichejman imallatapis manurinkichej chayqa, ama wasinman prendata oqharej yaykunkichejchu.

¹¹ Manachayqa jawallapi suyankichej, payllamanta imatapis orqhomuspa prendata qosunaykichejpaj.

¹² Sichus chay runa pisi tiyapuyniyojlla kanman chayqa, prenda qosusqanta ama q'ayantinkama jap'ikunkichejchu.

¹³ Inti chinkaykuyta prenda qosqasunta kutichipunaykipuni tiyan, chaywan qhataykukuspa puñukunanpaj. Ajinata ruwasqaykichejrayku pay saminchasonqachej, chay ruwasqaykitaj Tata Diosniykichejpa ñawpaqenpi allinpaj qhawasqa kanqa.

¹⁴ Mana kapuyniyoj runawan imatapis ruwachikuspaqa, maychus kajta pagapunkichej, llajta masiykichejpis kachun, chayrí llajtaykichejpi tiyakoj waj llajtayojpis kachun.

¹⁵ Chay kikin p'unchaypacha, manaraj inti chinkaykushajtin, ruwasqanmanta pagapunkichej. Payqa pisi tiyapuyniyoj runa, kawsananpaj chay qolqeta necesitan. Manachus jinata ruwankichej chayqa, chay runa contraykita Tata Diosman qhaparikonqa, qankunataj juchachasqa kankichej.

¹⁶ Mana pipis wawanpa juchanrayku wañuchisqa kanqachu, nillataj pipis tatanpa juchanrayku wañuchisqa kallanqatajchu. Manachayqa sapa uj juchanmanta wañuchisqa kanqa.

¹⁷ Ama waj llajtayojkunata, nitaj wajcha wawakunatapis mana allinta ruwaspa waqachinkichejchu. Amallataj warmisapamantapis p'achankuta prendata jina jap'inkichejchu.

¹⁸ Qankunaqa Egiptopi wata runa kasqaykichejta, chantá Tata Diosniykichej chaymanta preciota pagaspa kacharichisusqaykichejta ima ama qonqankichejchu. Chayrayku kay tukuy imata junt'anaykichejta noqa kamachiykichej.

¹⁹ Sichus ruthushaspa uj trigo marq'ata qonqaspa saqerpariwajchej chayqa, amaña chayta oqharej kutinkichejchu. Saqeychej waj llajtayoj runa, chayrí wajcha wawa, chayrí warmisapa chayta oqharikunanpaj. Ajinata ruwajtiykichej, tukuy ima ruwasqaykichejpi Tata Diosniykichej yanapasonqachej.

²⁰ Aceitunata pallaspaqa amaña chajmankichejchu. Waj llajtayojkuna, wajcha wawakuna, chantá warmisapakuna ima chajmakunankupaj saqeychej.

²¹ Uvata pallaspapis, amaña chajmankichejchu. Waj llajtayojkuna, wajcha wawakuna, chantá warmisapakuna ima chajmakunankupaj saqellaychejtaj.

²² Qankunaqa Egiptopi wata runa kasqaykichejta ama qonqankichejchu. Chayrayku chay tukuy imata junt'anaykichejta kamachiykichej.