Deuteronomio 23 - DIOSPA QHELQACHISQ

Diosta yupaychana tantakunaman pikunachus mana rinankuchu

¹ 1 (2) Kapasqa kaj, chayrí phichilun khuchusqa kajqa Tata Diospa tantakuyninman mana yaykuyta atenqachu.

² 2 (3) Jinallataj Tata Diospa sutinpi tantakuymanqa israelitakuna waj llajtayoj warmipi wawata rejsisqanku manallataj yaykuyta atenqankuchu. Chunka mirayninkamapis mana yaykuyta atenqankupunichu.

³ 3 (4) Amonitakuna, jinataj moabitakunapis nillataj Tata Diospa sutinpi tantakuyman jayk'ajpis yaykonqankuchu. Chunka mirayninkamapis mana yaykonqankuchu.

⁴ 4 (5) Paykunaqa mana yakullatapis jaywarisorqachejchu, nitaj mikhunatapis qorisorqachejchu maypachachus paykunaj jallp'ankuta Egiptomanta llojsimuspa pasasharqankichej, chaypacha. Chantapis paykunaqa Mesopotamiapi Petor llajtamanta Beorpa churin Balaamman pagarqanku, qankunata maldicisunanpaj.

⁵ 5 (6) Chaywanpis Tata Diosniykichejqa Balaamta mana uyarerqachu. Manachayqa Tata Dios munakususqaykichejrayku Balaampa maldicisqanta, qankuna saminchasqa kanaykichejpaj tukucherqa.

⁶ 6 (7) Chaynejta ama amonitakunata, nitaj moabitakunata yanapankichejchu, nitaj jayk'ajpis paykunaj allin kayninkuta mask'ankichejchu.

⁷ 7 (8) Edomitakunatarí ama chejnikunkichejchu, imaraykuchus paykunaqa aylluykichejraj kanku. Nillataj Egipto llajtayojkunatapis chejninkichejchu, imaraykuchus paykunaj llajtankupi waj llajtayoj jina tiyakorqankichej.

⁸ 8 (9) Chaykunamantaqa kinsa mitamanta qhepaman kajkuna Tata Diospa sutinpi tantakunaman yaykuyta atenqanku.

Llimphu kawsana

⁹ 9 (10) Awqaykichejwan maqanakoj rispaqa, amapuni mana allin kajtaqa ruwankichejchu, mana llimphupaj qhawasqa kanaykichejpaj.

¹⁰ 10 (11) Sichus tutan puñushajtiykichej, mayqenniykichejpata mujun llojsinman chayqa, jaramanta jawaman llojsichun, amataj yaykumuchunchu.

¹¹ 11 (12) Chantá inti yaykuyta yakuwan mayllakuchun, ch'isiyaykuytataj jaraman yaykupuchun.

¹² 12 (13) Jisp'akunaykichejpajqa jaramanta jawapi uj cheqata señalankichej.

¹³ 13 (14) Chantá armaykichejwan khuska uj k'aspita apaykachakunkichej, jisp'arikoj rispa chay k'aspiwan t'oqota allanaykichejpaj. Chantá jatun jisp'ayniykichejta jallp'awan p'ampankichej.

¹⁴ 14 (15) Tata Diosniykichejqa qankunaj chawpiykichejpi purishan, yanapanasuykichejpaj, awqaykichejtapis atipachisunaykichejpaj. Chayrayku jaraykichejqa Diospaj t'aqasqa kasqanrayku, llimphu kanan tiyan. Manachayqa qankuna ukhupi ch'ichita rikuspa, Diosqa qankunamanta karunchakonqa.

Ayqekoj wata runawan imatachus ruwana

¹⁵ 15 (16) Sichus uj wata runa patronninmanta qankunaman ayqekamunman chayqa, ama payta ñawpa patronninman kutichinkichejchu.

¹⁶ 16 (17) Chay wata runata qankunawan kakojta saqellankichej, may llajtapichá tiyakuyta munanqa, chaypi. Amataj pipis payta llakichichunchu.

Waj kamachisqakuna

¹⁷ 17 (18) Israel ukhupi ni uj warmi, nitaj ni uj qharipis khuchichakoj kanqachu, imaynatachus manakaj dioskunata yupaychajkuna ruwanku, jinaqa.

¹⁸ 18 (19) Tata Diospa templonman imatachus nisqaykita junt'anaykipaj ama apankichu, khuchiriyoman qokuspa, chayrí qharipura t'inkinakuspa ganasqayki qolqeta. Chay jina ruwanata Tata Dios mana rikuyllatapis munanchu.

¹⁹ 19 (20) Llajta masiykichejman qolqeta manusqaykichejmanta, ni mikhunamanta, chayrí waj imata mañarisqaykichejmanta ama interesta mañankichejchu.

²⁰ 20 (21) Waj llajtayojmanqa qolqeta interesniyojta manuyta atinkichej. Llajta masiykichejmantarí amapuni interesta mañankichejchu. Ajinata ruwajtiykichej, Tata Diosniykichej tukuy ima ruwasqaykichejpi yanapasonqachej, jallp'ata qosonqachej chaypi tiyakojtiykichej.

²¹ 21 (22) Tata Diosman imatachus qosaj nisqaykitaqa usqhayllata junt'anayki tiyan, imajtinchus Tata Diosniykeqa imatachus qosaj nisqaykimanta cuentata mañasonqapuni. Manachus jinata ruwanki chayqa, juchayoj rikhurinki.

²² 22 (23) Sichus mana imatapis qonaykita nerqankichu chayqa, mana juchayojchu kanki.

²³ Chaywanpis sichus sonqomanta munaspa, Tata Diosman qosaj nerqanki chayqa, imatachus nisqaykita junt'anaykipuni tiyan.

²⁴ Runa masiykej uva huertanman yaykuspaqa, atisqaykita uvata mikhuyta atinki. Jinapis canastapi mana apakuyta atinkichu.

²⁵ Runa masiykej trigo chajranman yaykuspaqa, trigo umata makiykiwan p'itiyta atinki. Chaywanpis hozewanqa mana ruthuyta atinkichu.