Deuteronomio 22 - DIOSPA QHELQACHISQ

¹ Sichus llajta masiykej wakanta, chayrí ovejanta chinkasqata tariwaj chayqa, ama qhawakullankichu. Chay uywata qhatispa, dueñonman apapunki.

² Sichus chay uywa mana qayllaykipi tiyakojpata kanman, nitaj pejpatachus kasqantapis yachawajchu chayqa, chay uywata wasiykiman qhatinki. Chantá dueñon rikhurimojtintaj, qopunki.

³ Llajta masiykej burron chinkajtin, p'achan, chayrí iman chinkajtinpis tarispaqa, jinallatataj ruwanki. Chaykunata rikuspa, amapuni mana rikojman tukunkichu.

⁴ Sichus llajta masiykej wakanta, chayrí burronta ñanpi urmasqata rikunki chayqa, ama qhawakullankichu. Manachayqa qayllaykuspa, sayarichiyta yanapaykunki.

⁵ Warmeqa ama qharej churakunan p'achata churakonqachu, nitaj qharipis warmej churakunan p'achata churakonqachu. Pichus ajinata ruwajkunata Tata Diosniykeqa millachikun.

⁶ Sichus pipis purispa sach'api chayrí pampapi p'isqo thapata irpayojta chayrí runtuyojta, mamantataj ojllashajta tarikunman chayqa, ama mamanta irpantinta ima apakaponqachu,

⁷ manachayqa irpallanta apakonqa, mamantataj kachariponqa. Ajinatachus ruwanki chayqa, kusiy kawsayta rikunki, unaytataj kawsanki.

⁸ Mosoj wasita ruwakuspaqa, qhatanpa kantunpi juch'uy perqata muyurichinki, ama pipis wasej qhatamanta urmaykamuspa wañushananpaj. Mana jinata ruwawajchu chayqa, wasi qhatanmanta pipis urmaykamuspa wañojtin, juchachasqa kawaj.

⁹ Uva huertaykipeqa ama waj mujuta tarpunkichu. Jinatachus ruwanki chayqa, ni uvaykita, nitaj waj tarpusqaykej poqoyninta mikhuyta atinkichu, Diospaj t'aqasqa kasqanrayku.

¹⁰ Ama bueytawan, burrotawan ima yugospa llank'achinkichu.

¹¹ Amallataj millmata, linotawan chajruspa awasqa p'achata churakunkichu.

¹² Qhatakunaykej p'achanpa tawantin puntanman siraspa waych'akunata churakunki.

Warmita manakajmanta tumpajtin imatachus ruwana

¹³ Ichapis uj qhari casaraspa, warminwan puñuykuspataj, manaña munakunmanchu chayqa,

¹⁴ jinataj qhasillata tumpaspa, warminmanta mana allintachu parlayta qallarinman: Kay warmiwan casarakorqani, chantá paywan puñuykuspa, qharita rejsej warmiña kasqanta reparani, nispa,

¹⁵ chaypacha chay warmej tatankuna ususinku mana qharej chayasqan kasqanmanta señalninta llajtamanta kurajkunaman apanqanku.

¹⁶ Chantá sipaspa tatanqa kurajkunaman kay jinata nenqa: Noqa ususiyta kay runawan casaracherqani, kunantaj ususiyta chejnipun.

¹⁷ Wawaypajtaj qhasillata tumpaspa parlashan: Wawaykeqa qharej chayasqan kasqa, nispa. Jinapis qhawaychej, waway mana qharita rejsej kasqanmanta señalqa kaypi kashan, nispa. Chaymanta chay warmej tatan mamanqa ususinku casarakusqan ch'isi qosanwan puñusqan sabanata kurajkunaj ñawpaqenkuman mast'anqanku.

¹⁸ Chaymantataj kurajkunaqa chay qharita jap'ichispa, jasut'enqanku.

¹⁹ Chantá pachaj qolqeta pagachenqanku, chaytataj sipaspa tatanman qonqanku, chay jinata Israelmanta qharita mana rejsej uj sipasta qhasillata tumpasqanrayku. Chay tukuywanpis chay warmeqa warmillanpuni kanqa, kawsanankamataj mana paymanta t'aqakuyta atenqachu.

²⁰ Chaywanpis sichus chay sipas qharita rejsejña kanman karqa chayqa,

²¹ tatanpa wasinmanta jawaman orqhospa, llajtanmanta qharikuna rumiwan ch'anqaykuspa chay warmita wañuchenqanku, chay jina millayta Israel ukhupi ruwasqanrayku, chantá ayllunta p'enqaypi rikhurichisqanraykutaj. Ajinata ruwaspa, qankuna ukhumanta chay jina millay ruwanata chinkachinkichej.

²² Sichus uj qharita wajpa warminwan puñushajta jap'inkunman chayqa, iskayninkuta wañuchinkichej. Ajinata Israel ukhumanta chay jina millay ruwanata chinkachinkichej.

²³ Uj sipas casarakunanpaj parlapayasqaña kashajtin, sichus uj qhari llajtapi tinkuspa paywan puñuykunman chayqa,

²⁴ paykunata llajtamanta kurajkunaman pusankichej. Iskayninkutaj rumiwan ch'anqaykusqa kanankupaj juchachasqa kanqanku. Chay sipasqa wañuchisqa kanqa llajtapi kashaspa mana qhaparikusqanrayku. Qharitaj wañuchisqa kanqa qhari masinpa warminpa honranta t'akasqanrayku. Ajinamanta qankuna ukhupi chay jina millay juchata chinkachinkichej.

²⁵ Uj sipas casarakunanpaj parlapayasqaña kashajtin, sichus uj qhari campopi tinkuspa, chay sipas mana munashajtin paywan puñuykunman chayqa, qharilla wañuchisqa kanqa, chay warmej honranta t'akasqanrayku.

²⁶ Sipastaqa ama imanankichejchu, imaraykuchus payqa mana wañuchisqa kananpaj jina juchayojchu. Imaynachus uj runa qhari masinta taripaspa wañuchin, kayqa chayman rijch'akun.

²⁷ Chay qhareqa sipasta sapallanta campopi tariparqa. Chay sipas qhaparikushajtinpis, payta jark'arikunanpaj ni pipis uyarinmanchu karqa.

²⁸ Sichus uj qhari kallpanman atinikuspa casarakunanpaj mana parlapayasqa sipaswan puñuykunman, jap'ichikunmantaj chayqa,

²⁹ chay qhareqa sipaspa tatanman phishqa chunka qolqeta qonqa, ususinpa honranta t'akasqanrayku. Honranta t'akasqanraykutaj chay sipaswanpuni casaranan tiyan, nitaj wañunankama paymanta t'aqakuyta atenqachu.

³⁰ 30 (23.1) Ni pipis tatanpa warminwan puñuykonqachu, ama tatanta p'enqaypi rikhurichinanpaj.